بۇعان دەيىن داعدارىستىڭ الدىن الۋ ءۇشىن «قازمۇنايگاز» ۇلتتىق كومپانياسى قىزمەتكەرلەرىنىڭ سانىن قىسقارتاتىنىن ايتقان بولاتىن. ەندى وعان قوسا سىياقى مەن بونۋستى توقتاتىپ, قىزمەتتىك كولىكتەن باس تارتپاق. بۇل تۋرالى كومپانيانىڭ ادامي رەسۋرستاردى باسقارۋ جونىندەگى باسقارۋشى ديرەكتورى داۋلەتجان حاسانوۆ حابارلادى.
كوروناۆيرۋستىق ىندەتكە بايلانىستى مۇناي ونىمدەرىنە سۇرانىستىڭ تومەندەۋى كومپانيانىڭ شىعىنىن ۇلعايتتى. وسىعان بايلانىستى, قارجىلىق جاعدايدى تۇراقتاندىرۋ جانە نارىقتىق كونيۋنكتۋرانىڭ تەرىس اسەرىن ازايتۋ ءۇشىن «قازمۇنايگازدا» داعدارىسقا قارسى ستراتەگيا جاساقتالۋدا.
– بۇل ستراتەگيا كومپانياعا شىعىنداردى ازايتۋعا جانە داعدارىستان كەيىنگى كەزەڭدە مەكەمەنىڭ تەز ءارى ءتيىمدى دامۋىنا مۇمكىندىك بەرەدى. وسى شارالاردىڭ اياسىندا ديرەكتورلار كەڭەسىنىڭ شەشىمى نەگىزىندە كومپانيانىڭ جاڭا قۇرىلىمى بەكىتىلدى. وسىعان سايكەس, ورتالىق اپپاراتتىڭ شتاتتىق سانى 34 پايىزعا, ياعني 729-دان 480-گە دەيىن قىسقاردى. سونىمەن قاتار ورتالىق اپپاراتتاعى دەپارتامەنتتەر سانى 3 ەسەگە ازايىپ, باسقارۋشى ديرەكتورلار لاۋازىمى جويىلدى. «قازمۇنايگاز» ۇلتتىق كومپانياسىنىڭ ورتالىق اپپاراتى نارىقتا بولىپ جاتقان وزگەرىستەرگە تەز جانە ءتيىمدى جاۋاپ بەرە الاتىنداي جيناقى بولىپ قايتا قۇرىلادى, – دەدى د.حاسانوۆ.
ونىڭ ايتۋىنشا, كومپانيانىڭ ءبىرىنشى توقسانداعى تابىسى بىلتىرعىمەن سالىستىرعاندا 3 ەسەگە قىسقارعان. ءتىپتى, الەمدىك نارىقتا مۇناي باعاسىنىڭ كۇرت قۇلدىراۋى سالدارىنان كەيبىر ەنشىلەس كاسىپورىندار قارجى تاپشىلىعىنا تاپ بولعان.
ءباسپاسوز ءماسليحاتى بارىسىندا 12 مامىردا باسقارما شەشىمىمەن ورتالىق اپپاراتتىڭ جاڭا جالاقى تولەۋ جۇيەسى بەكىتىلگەنى ايتىلدى. ول جۇيە بويىنشا «قازمۇنايگاز» باسشىلىق قۇرامىنىڭ جالاقىسى 30 پايىزعا ازايادى, ال باسشىلىق قىزمەتتەر سانىنىڭ قىسقارۋىنا بايلانىستى تومەنگى لاۋازىمعا تاعايىندالاتىن ورتا بۋىنداعى مەنەدجەرلەردىڭ جالاقىلارى 20 پايىزعا دەيىن تومەندەيدى. باسقا قاتارداعى قىزمەتكەرلەردىڭ جالاقىسى بۇرىنعى دەڭگەيدە ساقتالادى. سونداي-اق كومپانيانىڭ قارجىلىق جاعدايىنا بايلانىستى جىل سوڭىنا دەيىن ەشقانداي سىياقى نەمەسە بونۋستار تولەنبەيدى.
– مۇناي نارىعىنداعى قالىپتاسقان جاعداي قانشالىقتى قيىن بولسا دا, ءبىز ءاربىر قىزمەتكەردىڭ, ولاردىڭ وتباسىلارىنىڭ الدىنداعى الەۋمەتتىك جاۋاپكەرشىلىگىمىزدى تولىق سەزىنەمىز. سوندىقتان «سامۇرىق قازىنا» قورىنىڭ تاپسىرماسى بويىنشا الەۋمەتتىك-جاۋاپكەرشىلىكتى بوساتۋ باعدارلاماسىن ازىرلەدىك. وسى باعدارلاماعا سايكەس بوساتىلعان قىزمەتكەرلەرگە بارىنشا قولداۋ كورسەتەمىز, – دەدى سپيكەر.
ايتا كەتەيىك, كومپەنساتسيالىق تولەم جيىنتىعى 3 ايلىق جالاقى مولشەرىندەگى بىرجولعى تولەمدى, تابىسىنان ايىرىلعاندارعا وتەماقى رەتىندە 6 اي بويى قارجىلىق قولداۋدى جانە كەلەر جىلدىڭ اقپان ايىنا دەيىن كومپانيا ەسەبىنەن مەديتسينالىق ساقتاندىرۋ قىزمەتتەرىن پايدالانۋ قۇقىعىن قامتيدى.