«ازاماتتاردىڭ مەملەكەتتىك قىزمەتكە ورنالاسۋ ۇدەرىسىن جەڭىلدەتۋ ءۇشىن جانە كونكۋرستاردى بارىنشا اشىق وتكىزۋ ءۇشىن اگەنتتىكتىڭ باستاماسىمەن «مەملەكەتتىك قىزمەتكە ورنالاسۋ ەرەجەلەرىنە» وزگەرىستەر ەنگىزىلدى.
بىرىنشىدەن, قولدانىستاعى ەرەجەلەر بويىنشا ۇمىتكەرلەر بايقاۋلارعا قاجەتتىلىك بويىنشا ۇيدەن شىقپاي-اق قاتىسا الادى. ول ءۇشىن قۇجاتتاردى ەلەكتروندى پوشتا ارقىلى تاپسىرۋعا مۇمكىندىك بەرىلدى, ياعني بۇرىن تالاپ ەتىلگەندەي, مەملەكەتتىك ورگانعا قۇجاتتاردىڭ قاعاز نۇسقالارىن اكەلۋ قاجەتتىلىگى جويىلدى. سونىمەن قاتار اڭگىمەلەسۋدەن ءوتۋ ءۇشىن كانديداتتىڭ مەملەكەتتىك ورگانعا كەلۋى قاجەت ەمەس. وسىلايشا تۇزەتۋلەرگە سايكەس اڭگىمەلەسۋ قاشىقتان بەينە بايلانىس قۇرالدارى ارقىلى جۇرگىزىلۋى مۇمكىن.
ەكىنشىدەن, بۇرىن مەملەكەتتىك قىزمەتكە ورنالاسۋ بويىنشا كونكۋرسقا قاتىسۋ ءۇشىن ۇمىتكەرلەر كونكۋرس قورىتىندىسىنا قاراماستان تولىق قۇجاتتار ءتىزىمىن دايىنداۋ قاجەت بولاتىن. ەندى كونكۋرسقا قاتىسۋ ءۇشىن ۇمىتكەرلەر ءوز وتىنىشىنە تەك ەكى قۇجاتتى: ديپلومنىڭ كوشىرمەسىن جانە قىزمەتتىك ءتىزىمنىڭ كوشىرمەسىن قوسا ۇسىنادى. قالعان تالاپ ەتىلەتىن قۇجاتتاردى كونكۋرستىق كوميسسيانىڭ وڭ شەشىمىن العان كانديدات قانا تاپسىرادى.
ۇشىنشىدەن, اگەنتتىك كونكۋرستىق راسىمدەردىڭ اشىقتىعىن ودان ءارى ارتتىرۋعا باعىتتالعان تۇزەتۋلەر قابىلدادى. وسىلايشا سوڭعى تۇزەتۋلەرگە سايكەس, كونكۋرسقا قاتىسا الاتىن الەۋەتتى باقىلاۋشىلار قاتارى بارىنشا كەڭەيتىلدى. بۇعان دەيىن باقىلاۋشىلار توبىنا دەپۋتاتتار, باق, قوعامدىق بىرلەستىكتەردىڭ, ساياسي پارتيالاردىڭ وكىلدەرى, اگەنتتىك جانە وزگە دە مەملەكەتتىك ورگانداردىڭ قىزمەتكەرلەرى كىرگەن-ءدى. ەندى ءاربىر كامەلەت جاسقا تولعان, ارەكەتكە قابىلەتتى ازامات باقىلاۋشى بولا الادى. بۇل ۇمىتكەرلەرگە كونكۋرستىق كوميسسيانىڭ حاتشىسىن الدىن الا حاباردار ەتە وتىرىپ, ءوزىنىڭ بايقاۋشىسىن اڭگىمەلەسۋگە شاقىرۋعا مۇمكىندىك بەرەدى.
تورتىنشىدەن, بۇرىن كوميسسيا شەشىمى داۋىس بەرۋ جولىمەن قابىلداناتىن. ماسەلەن, كوميسسيانىڭ كەيبىر مۇشەلەرى كونكۋرستىق كوميسسيا مۇشەلەرىنىڭ باعالاۋى بويىنشا باسقا كانديداتتاردان از بالل جيناعان كانديداتقا داۋىس بەرە الاتىن. سوڭعى تۇزەتۋلەرگە سايكەس, كوميسسيا مۇشەلەرى داۋىس بەرۋ ارقىلى لاۋازىمعا كانديداتتى تاڭدامايدى. كونكۋرستىق كوميسسيانىڭ شەشىمى بويىنشا بوس لاۋازىمعا ەڭ كوپ بالل جيناعان كانديدات يە بولا الادى. بۇل رەتتە, ۇپايلار ۇمىتكەردىڭ جاۋاپتارىنىڭ دۇرىستىعى مەن تولىقتىعىن, ونىڭ ەسسەسىنىڭ باعاسىن, ونىڭ تاجىريبەسىن, ءبىلىمى مەن كوممۋنيكاتيۆتىك داعدىلارىن, لاۋازىمنىڭ ەرەكشەلىگىنە بايلانىستى قويىلاتىن كريتەريلەردى ەسكەرە وتىرىپ قويىلادى.
بەسىنشىدەن, اڭگىمەلەسۋ كونكۋرس جەڭىمپازىن تاڭداۋ كەزىندە جالعىز ولشەم بولىپ تابىلمايدى. سونىمەن كونكۋرسقا دەيىن ۇمىتكەرلەر مەملەكەتتىك ءتىلدى جانە زاڭنامانى بىلۋگە تەستىلەۋدەن, سونداي-اق جەكە قاسيەتتەرىن باعالاۋدان وتەدى. ال «ب» كورپۋسىنىڭ باسشى لاۋازىمىنا كانديداتتار (باسقارما باسشىسى لاۋازىمىنان جانە ودان جوعارى) بۇدان بولەك ەسسە تاپسىرادى. سونداي-اق كونكۋرستىق كوميسسيانىڭ مۇشەلەرىنە لاۋازىمنىڭ ەرەكشەلىگىنە بايلانىستى ءتيىستى جۇمىس داعدىلارى مەن قۇزىرەتتىلىگى بار ەڭ ۇزدىك كانديداتتى تاڭداۋ ءۇشىن قوسىمشا ىرىكتەۋ قۇرالدارىن قولدانۋ قۇقىعى بەرىلگەن. مىسالى, كونكۋرستىق كوميسسيا ۇمىتكەرلەردەن ءتيىستى سالاداعى پروبلەمالار مەن ولاردى شەشۋ مۇمكىندىكتەرى بويىنشا پرەزەنتاتسيا جاساۋدى, كەيستىك نەمەسە پراكتيكالىق تاپسىرمالاردى شەشۋدى جانە تاعى باسقا سۇراق قويا الادى.
انار جايىلعانوۆا,
قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ توراعاسى