«كەڭ دالا» باعدارلاماسى بويىنشا كوكتەمگى ەگىس جۇمىستارىنا بەرىلەتىن جەڭىلدەتىلگەن نەسيە اياقتالىسىمەن, اگرارلىق نەسيە كورپوراتسياسى (انك) «قاراپايىم زاتتار ەكونوميكاسى» باعدارلاماسى بويىنشا ەگىس ناۋقانىن قارجىلاندىرۋعا كىرىستى, دەپ حابارلادى اشم ءباسپاسوز قىزمەتى.
«بۇعان دەيىن حابارلاعانىمىزداي, داعدارىسقا قارسى شارالار اياسىندا مەملەكەت باسشىسى قازاقستاندىق فەرمەرلەرگە كوكتەمگى دالا جۇمىستارىنا «قاراپايىم زاتتار ەكونوميكاسى» باعدارلاماسىنا قوسىمشا قارجىلىق كومەك كورسەتۋدى تاپسىردى. قاراجات قايتارىمسىز ەمەس, بىراق جەڭىلدەتىلگەن شارتتارمەن بەرىلەدى.
فەرمەرلەرگە 6%-بەن 100 ميلليارد تەڭگە بەرۋ قاراستىرىلعان. قارجى 12 ايعا دەيىنگى مەرزىمگە الدىن-الا بەرىلەدى. نەگىزگى قارىزدى نەسيە مەرزىمى اياقتالعاننان كەيىن وتەۋگە بولادى.
قارجىلاندىرۋ «اگرارلىق نەسيە كورپوراتسياسى» اق («قازاگرو» ۇبح اق ەنشىلەس ۇيىمى) جانە ەكىنشى دەڭگەيلى بانكتەر ارقىلى جۇزەگە اسىرىلادى. ەگىن ەگۋ ناۋقانى باستالعاننان باستاپ, انك قاراجات بەرۋدى تەزدەتۋ جانە جەڭىلدەتۋ ماقساتىندا بيزنەس-پروتسەستەردى وڭتايلاندىردى. اتاپ ايتقاندا, 30 كۇنتىزبەلىك كۇندە قارالاتىن وتىنىشتەر 10 كۇن ىشىندە تەكسەرىلىپ, شەشىم شىعارۋ قاراستىرىلدى. وتكىزەتىن قۇجاتتار ءتىزىمى دە قىسقارادى. بۇگىنگى تاڭدا انك فەرمەرلەرگە شامامەن 6 ملرد. قارجى ءبولدى.
جاقىندا اگرارلىق نەسيە كورپوراتسياسى «كەڭ دالا» باعدارلاماسى بويىنشا كوكتەمگى دالا جۇمىستارىن قارجىلاندىرۋدى اياقتادى. ناتيجەسىندە 70 ملرد تەڭگەنى 5%-بەن 2 405 شاعىن جانە ورتا بيزنەس وكىلدەرى الدى.
وسىلايشا, «كەڭ دالا» جانە «قاراپايىم زاتتار ەكونوميكاسى» باعدارلاماسى بويىنشا, 2020 جىلعى كوكتەمگى دالا جۇمىستارىنا 170 ملرد. تەڭگە ءبولىندى. مەملەكەتتىڭ وسىنداي اۋقىمدى قولداۋى شارۋالارعا ۋاقتىلى جانە ەش كەدەرگىسىز جۇمىس جاساۋىنا مۇمكىندىك بەرەدى» دەلىنگەن حابارلامادا.