وتباسى دەگەن شاعىن مەملەكەتتە اكەنىڭ قايراتى مەن ايباتى, انانىڭ مەيىرىمى مەن ماحابباتى قاتار توگىلىپ, ەكى سەزىم ەگىز بۇرىمداي ورىلگەندە عانا ىرگەسىنەن ىزگىلىك شۋاعى شاشىراماق. بۇندايدا قازاق «ەركەك – ءۇيدىڭ ەگەسى, ايەل – ءۇيدىڭ شەگەسى» دەپ جاتادى.
وتاعاسى سەرىك تولەۋباەۆ پاۆلودار وبلىسى, ەكىباستۇز قالاسىنداعى «بوگاتىر» كومىر كەنىشىندە جول جوندەۋشى بولىپ جۇمىس ىستەيدى. ال وتاناسى نۇرسۇلۋ ەركەبايقىزى مادەنيەت سالاسىنىڭ قىزمەتكەرى. وتباسىندا ءبىر قىز, ەكى ۇل ومىرگە كەلىپ, ولاردان 7 نەمەرە ءسۇيىپ وتىر. سەرىك ايتقۇل ۇلى ۇجىمدا بەدەلدى. كوپ جىلدان بەرى ەڭبەگىن ادال اتقارعانى ءۇشىن ءىىى دارەجەلى «ەڭبەك داڭقى» وردەنىمەن ماراپاتتالعان. بوس ۋاقىتىندا نەمەرەلەرىن اۋىلعا اپارىپ, ءتورت ت ۇلىك مالمەن, اۋىل ومىرىمەن تانىستىرادى. وتاعاسى ءۇشىن وتباسىنىڭ ءاربىر مۇشەسىنىڭ جەتى اتاسىن بىلگەنى وتە ماڭىزدى. «جەتى اتاسىن بىلگەن ۇل جەتى جۇرتتىڭ قامىن جەر» دەگەن اتالى ءسوزدى ارقاۋ ەتىپ, نەمەرەلەرىنە اتا تاريحى تۋرالى ايتىپ, ولاردىڭ قانداي جان بولعانىن, ەلى-جۇرتى ءۇشىن ەتكەن ەرلىگى, ونەگەلى ىستەرى جايىندا اڭگىمەلەپ وتىرادى. وسىلايشا, بالا اتا ءداستۇرىن جالعاستىرسا ەكەن دەيدى. ال جارى نۇرسۇلۋ ەركەبايقىزى جوعارى ءبىلىمدى, ەكىباستۇز قالاسى اكىمدىگى مادەنيەت جانە تىلدەردى دامىتۋ ءبولىمىنىڭ «اتامۇرا» مادەنيەت ورتالىعىندا 20 جىلدان بەرى قىزمەت ىستەپ كەلەدى. ەكىباستۇز قالاسى اكىمىنىڭ جانىنداعى مەملەكەتتىك ءتىل ساياساتىن ودان ءارى جەتىلدىرۋ جونىندەگى جۇمىس توبىنىڭ بەلسەندى مۇشەسى. 2018 جىلدان قالا اكىمى جانىنداعى قوعامدىق كەڭەستىڭ مۇشەسى, ەكىباستۇزداعى ىسكەر ايەلدەر اسسوتسياتسياسىنىڭ مۇشەسى.
«شۇكىر, بالالارىمىزدىڭ بارلىعى ومىردەن ءوز ورىندارىن تاۋىپ ۇلگەردى, ۇلىمىزدى ۇياعا, قىزىمىزدى قياعا قوندىردىق. بۇگىندە ولاردان نەمەرە ءسۇيىپ وتىرمىز. ۇلكەن ۇلىم اكە جولىن قۋىپ كەنشى بولدى. ال كەنجە ۇلىمىز بولسا, مادەنيەت سالاسىنا مويىن بۇردى. بۇگىندە قورعانىس مينيسترلىگى ورتالىق اسكەري وركەسترىنىڭ ءسوليسى. كەلىندەرىم دە شىعارماشىلىققا جاقىن جاندار. قاي اتا-انا بولماسىن بالاسىنا ءتۇزۋ تاربيە بەرۋگە تىرىسادى عوي. ءبىز دە سولاي, بالالارىمىزعا ۇلكەنگە ىزەت, كىشىگە قۇرمەت كورسەتۋدى, ادال بولۋدى, ادام بولۋدى ۇيرەتتىك. اتا-انا جاقسى ىسىمەن دە ۇلگى بولۋى كەرەك. كەلىندەرىمىز ءبىزدىڭ وتاعاسى ەكەۋمىزدىڭ ارامىزداعى قارىم-قاتىناسقا تاڭعالىپ, قىزىعىپ جاتادى. ءبىزدىڭ شاڭىراق كوتەرگەنىمىزگە 34 جىل بولسا دا, ءبىر-بىرىمىزگە ۇنەمى قامقورلىق تانىتىپ, بالالارىمىزعا ۇلگى بولۋعا تىرىسامىز. بالالارىما ۇنەمى ايتىپ وتىرامىن: «مەنى وتباسىنىڭ كيەسىنە اينالدىرعان اكەلەرىڭ», دەپ. وتباسىندا اكەنىڭ ءرولىن كوتەرۋ ارقىلى بالانى دۇرىس تاربيەلەي الاسىڭ», دەيدى ن.ەركەبايقىزى.
ايتپاقشى, تولەۋباەۆتار وتباسى وتكەن جىلى «مەرەيلى وتباسى» ۇلتتىق بايقاۋىنىڭ رەسپۋبليكالىق كەزەڭىنە جولداما الىپ, قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ ارنايى سىيلىعىنىڭ يەگەرى اتانعان.
«وتاناسى نۇرسۇلۋ ەركەبايقىزى وتباسىنىڭ عانا ەمەس, قالامىزدىڭ مادەني, قوعامدىق شارالارىنا بەلسەنە قاتىسادى. ال قازاقستان رەسپۋبليكاسى قارۋلى كۇشتەرى ۇلتتىق اسكەري-پاتريوتتىق ورتالىعى ورتالىق ءانسامبلىنىڭ كونتسەرتمەيستەر ۇلدارى داۋرەن جاقىندا قازاقستان رەسپۋبليكاسى پرەزيدەنتىنىڭ 2020 جىلعى 30 ساۋىردەگى جارلىعىمەن «ەرەن ەڭبەگى ءۇشىن» مەدالىمەن ماراپاتتالدى. بۇل دا زور قۋانىش بولدى», دەيدى پاۆلودار وبلىسى, ەكىباستۇز قالاسى مادەنيەت جانە تىلدەردى دامىتۋ ءبولىمىنىڭ باسشىسى ايجان حامزاقىزى.