تاياۋدا يندۋستريا جانە ينفراقۇرىلىمدىق دامۋ مينيسترلىگى اۆتوكولىك قۇراستىرۋشى «ازيا اۆتو», «ازيا اۆتو قازاقستان» كومپانيالارىمەن اراداعى كەلىسىمدى ۇزگەنى تۋرالى اقپارات تاراعان بولاتىن. «ازيا اۆتو قازاقستاننىڭ» باسشىسى ە.مانديەۆ بۇل شەشىم حولدينگتى تىعىرىققا تىرەگەنىن, ونسىز دا پاندەمياعا بايلانىستى قيىن كەزەڭدە مىڭداعان ادام جۇمىسسىز قالاتىنىن ايتىپ قىنجىلىس بىلدىرگەن. كەشە سالالىق مينيسترلىكتىڭ ءباسپاسوز قىزمەتى جاعدايدىڭ نەلىكتەن بۇلاي وربىگەنى جان-جاقتى باياندالعان حابار تاراتتى. وندا ايتىلعانداي, كەلىسىمدى بۇزۋعا كاسىپورىنداردىڭ ءتيىستى مىندەتتەمەلەردى ورىنداماعانى سەبەپ بولعان.
ەلىمىزدە موتورلى كولىك قۇرالدارىن قۇراستىرۋ تۋرالى كەلىسىم پرەمەر-ءمينيستردىڭ ورىنباسارى, يندۋستريا جانە جاڭا تەحنولوگيالار ءمينيسترىنىڭ 2010 جىلدىڭ 11 ماۋسىمىنداعى ءتيىستى بۇيرىعى بويىنشا جاسالادى. جوعارى ەۋرازيالىق ەكونوميكالىق كەڭەستىڭ «كەدەن وداعىنا مۇشە مەملەكەتتەر مەن بىرىڭعاي ەكونوميكالىق كەڭىستىك اۋماعىندا «موتورلى كولىك قۇرالدارىن ونەركاسىپتىك قۇراستىرۋ» ۇعىمىن قولدانۋ شارتتارى تۋرالى» 2014 جىلعى 29 مامىرداعى №72 شەشىمىنە سايكەس مينيسترلىك 10 كاسىپورىنمەن موتورلى كولىك قۇرالدارىن ونەركاسىپتىك قۇراستىرۋ جونىندە 19 كەلىسىم جاساعان.
– كاسىپورىندار كەلىسىم اياسىندا كولىك قۇرالدارىن بالقىتىپ بىرىكتىرۋ, بوياۋ جانە قۇراستىرۋ بويىنشا تەحنولوگيالاردى يگەرۋ جانە وقشاۋلاندىرۋدى ۇلعايتۋ تۋرالى وزدەرىنە مىندەتتەمەلەر الدى. «ازيا اۆتو» اق جانە «ازيا اۆتو قازاقستان» اق كاسىپورىندارى كەلىسىم بويىنشا ونەركاسىپتىك قۇراستىرۋ تۋرالى مىندەتتەمەلەرىن ورىندامادى. ال وزگە كاسىپورىندار شاناقتى بالقىتىپ بىرىكتىرۋ جانە بوياۋ بويىنشا تەحنولوگيالىق جابدىقتاردى ىسكە قوسۋ جونىندەگى مىندەتتەمەلەرىن كەستەگە ساي ورىندادى,– دەلىنگەن مينيسترلىك حابارلاماسىندا.
«ازيا اۆتو» اق 2002 جىلعى 20 جەلتوقساندا قۇرىلعان. سودان بەرگى ارالىقتا ول ەلىمىزدىڭ زاڭناماسىنا سايكەس قوسىمشا قۇن سالىعىنان جانە كەدەندىك تولەمدەردەن بوساتىلدى. باسقا دا مەملەكەتتىك جەڭىلدىكتەردى الىپ كەلدى. كەلىسىمدەر بويىنشا ونەركاسىپتىك قۇراستىرۋ تۋرالى مىندەتتەمەلەر العان وتاندىق كاسىپورىنداردىڭ بارلىعىنا مەملەكەتتىك قولداۋ كورسەتىلدى.
مىندەتتەمەلەردى جۇزەگە اسىرۋعا دايىن بولماي شىققاندىقتان, ونىڭ مەرزىمىن ۇزارتۋ ماقساتىندا 2017 جىلدىڭ باسىندا «ازيا اۆتو» اق مەن «ازيا اۆتو قازاقستان» اق موتورلى كولىك قۇرالدارىن ونەركاسىپتىك قۇراستىرۋ تۋرالى كوپجاقتى كەلىسىمگە قول قويۋ تۋرالى مينيسترلىككە ءوتىنىش ءبىلدىرىپتى. ءسويتىپ مينيسترلىكپەن ارادا قۇجات مەرزىمىن 2019 جىلعى 1 جەلتوقسانعا دەيىن ۇزارتۋعا مۇمكىندىك بەرەتىن كوپجاقتى كەلىسىمگە قول قويىلدى. وعان سايكەس, ءار كۇنتىزبەلىك جىلدىڭ 1 ساۋىرىنە دەيىن ءوندىرۋشى جوسپاردىڭ ورىندالعانى تۋرالى ۋاكىلەتتى ورگانعا كەستە ۇسىنۋعا مىندەتتى بولعان. الايدا «ازيا اۆتو» 10 جىلداي ۋاقىت بۇرىن العان مىندەتتەمەلەرىن كەزەكتى رەت ورىنداماعانى راستالدى.
– دەي تۇرعانمەن, ونەركاسىپتىك قۇراستىرۋ تۋرالى كەلىسىمدى بۇزۋ كەيبىر باق پەن الەۋمەتتىك جەلىلەردە جازىلىپ جاتقانداي, كاسىپورىننىڭ جۇمىسىن توقتاتۋ دەگەندى بىلدىرمەيدى. «ازيا اۆتو» اق كومپانياسى كولىك قۇرالدارى ءوندىرىسىن جالعاستىرۋعا, «ازيا اۆتو قازاقستان» اق زاۋىت قۇرىلىسىن جالعاستىرۋعا تولىقتاي قۇقىلى. مينيسترلىك ءوز كەزەگىندە كورسەتىلگەن مىندەتتەمەلەر ورىندالعاننان كەيىن كەلىسىم جاساپ, جەڭىلدىكتەر ۇسىنۋ مۇمكىندىگىن قاراستىرۋعا دايىن, – دەلىنگەن مينيسترلىك حابارلاماسىندا.
مينيسترلىكتىڭ ماشينا جاساۋ باسقارماسىنىڭ باستىعى ەرجان يمانسليام دا باق-تارعا وسى ماسەلەنىڭ ءمان-جايىن تۇسىندىرۋگە تىرىستى. ونىڭ ايتۋىنشا, كەلىسىمدى ءۇزۋدىڭ جالعىز سەبەبى – كاسىپورىنداردىڭ ءتيىستى تالاپتاردى, ياعني كولىك شاناعىن دانەكەرلەۋ جانە بوياۋ تسەحىن اشۋ تۋرالى تالاپتى ورىنداماعانى. باسقا استارى جوق.
جوعارىدا ءبىز «ازيا اۆتو قازاقستاننىڭ» باسشىسى ە.مانديەۆتىڭ زاۋىتتا جۇمىس ىستەيتىن مىڭداعان ادامنىڭ جۇمىسسىز قالاتىنى تۋرالى قىنجىلىسىن ايتقان ەدىك. ەرجان ءيمانسليامنىڭ سوزىنە قاراعاندا, مينيسترلىكتىڭ كەلىسىمدى ءۇزۋى مەن زاۋىتتىڭ جابىلۋىنىڭ اراسىندا بايلانىس جوق.
– ونەركاسىپتىك قۇراستىرۋ تۋرالى كەلىسىمى جوق باسقا دا كاسىپورىندار بار, بىراق ولار سوعان قاراماستان وندىرىسپەن اينالىسىپ جاتىر. ءبىز كەلىسىمدى ۇزگەننەن كەيىن دە زاۋىت جابىلمايدى, باعاسى كوتەرىلۋى مۇمكىن. مونوپوليا بولمايدى, سەبەبى قوستانايداعى «سارىارقااۆتوپروم» مەن الماتىداعى «Hyundai» دا جەڭىل اۆتوكولىك شىعارادى, – دەيدى ول.