مەملەكەت باسشىسى قاسىم-جومارت توقاەۆ توتەنشە جاعداي رەجىمىن قامتاماسىز ەتۋ جونىندەگى مەملەكەتتىك كوميسسيانىڭ قورىتىندى وتىرىسىندا ەلىمىزدە توتەنشە جاعدايدىڭ اياقتالعانى تۋرالى حابارلادى. بۇل جاڭالىقتى حالىقتىڭ كۇتكەنى انىق.
الايدا جاعانى كەڭگە سالاتىن ۋاقىت ءالى كەلگەن جوق. ىندەتتىڭ قايتا تارالۋ قاۋىپتىلىگى ءالى دە جوعارى. سوندىقتان ازىرگە كارانتيندىك شارالاردى ساقتاي تۇرۋىمىز كەرەك. كەيبىر ەلدەر كارانتيندى جۇمسارتامىز دەپ اۋرۋ سانىن ارتتىرىپ جاتىر. سوندىقتان ولاردىڭ جاعدايىنان ساباق الۋىمىز ورىندى دەپ بىلەمىن.
جالپى كارانتين ەلىمىزدىڭ مەديتسينا سالاسىنا اۋىر جۇك تۇسىرمەۋ ءۇشىن قاجەت بولدى. ال قازىر توتەنشە جاعداي رەجىمىن توقتاتۋعا نە تۇرتكى بولىپ وتىر؟ ەلدە شاعىن جانە ورتا بيزنەس ءبىراز داعدارىسقا ۇشىراعاندىقتان, ولارعا كومەكتەسۋ ءۇشىن توتەنشە جاعدايدى الىپ تاستاۋ قاجەتتىلىگى دە تۋىندادى. قاتاڭ كارانتين كەزىندە ستراتەگيالىق ءىرى ونەركاسىپتەر اناۋ ايتقانداي زيان شەگە قويمادى. تابىسىنان قاعىلعان نەگىزىنەن قىزمەت كورسەتۋ سالاسىنداعى شاعىن كاسىپكەرلەر بولدى.
بۇگىنگى كۇنى قازاقستاندا حالىقتىڭ باسىم بولىگى – ءوزىن ءوزى جۇمىسپەن قامتىعاندار نەمەسە قىزمەت كورسەتۋ سالاسىندا تابىس تاۋىپ جۇرگەندەر. ەندى ولارعا قولداۋ ارتادى. ولارعا قاتىستى مەملەكەت باسشىسى:
– ەكونوميكانى نەسيەلەۋگە بانكتەردىڭ مۇمكىندىكتەرىن كەڭەيتەتىن قوسىمشا ۋاقىتشا پرۋدەنتسيالدى شارالار كەشەنىن ازىرلەۋ كەرەك. ميكرو ءارى شاعىن كاسىپكەرلىككە جەكەلەي نازار اۋدارۋ كەرەك. ولاردىڭ تولىققاندى ستاندارتتى بانكتىك ونىمدەردى پايدالانۋ مۇمىندىكتەرى تىم شەكتەلگەن. «بيزنەستىڭ جول كارتاسى» باعدارلاماسى اياسىندا شاعىن بيزنەس ءۇشىن ارنايى شارالاردى قاراستىرۋدى تاپسىرامىن, – دەدى.
الداعى ۋاقىتتا ەلىمىزدە ورتا جانە شاعىن كاسىپتىڭ جاعدايى قايتا وڭالۋعا ۇكىمەت پەن «اتامەكەن» اتالعان باعىتقا قولداۋ جاسايتىنىنا سەنىمدىمىز. جانە بۇل باعىتتى جانداندىرۋدا ناقتى تاپسىرما بەرىلىپ جاتىر.
وسىنىڭ ءبارىن قورىتا كەلگەندە, ەلدەگى توتەنشە جاعدايدى توقتاتۋ تۋرالى شەشىم ورىندى. دەگەنمەن قازاقستاندىقتار الەۋمەتتىك ساقتىق شارالارىن ۇمىتپاۋى ءتيىس.
ساپاربەك جوباەۆ,
ەكونوميست