سەناتتا «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسى قارالدى. بۇل قۇجات مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا كورسەتىلگەن ميتينگىلەر تۋرالى زاڭنامانى جەتىلدىرۋ تاپسىرماسىنا سايكەس ازىرىلەنىپ جاتىر.
وتكەن عاسىردىڭ توقسانىنشى جىلدارىنان بەرى تۇزەتۋ ەنگىزىلمەگەن زاڭدى جاڭعىرتۋ جۇمىستارى ءالى دە جالعاسۋى قاجەت. وسى ماقساتتا اقش, ەۋروپا ەلدەرى سىندى بىرقاتار دەموكراتيالىق مەملەكەتتەردىڭ تاجىريبەلەرى دە ەسكەرىلدى. باستىسى – بۇل زاڭ جوباسى پروگرەسيۆتى زاڭ بولۋى ءتيىس. سوندىقتان ەلىمىزدە بۇرىننان قولدانىلىپ كەلە جاتقان زاڭعا كۇردەلى وزگەرىستەر ەنگىزىلۋدە.
كۇردەلى وزگەرىس دەپ وتىرعانىم, وسىعان دەيىن ەلىمىزدە بەيبىت جينالىستاردى ۇيىمداستىرۋ مەن وتكىزۋ ءۇشىن مەملەكەتتىڭ رۇقساتى كەرەك ەدى. ەندىگى كۇندە ازاماتتاردىڭ الاڭعا شىعىپ, قاندايدا ءبىر ساياسي كوزقاراستارىن, كەلىسپەۋشىلىكتەرىن ءبىلدىرۋ ءۇشىن مەملەكەتتەن رۇقسات كۇتپەي, ەسكەرتۋ, حابارلاندىرۋ ءتارتىبى ارقىلى جينالۋىنا جول بەرۋدى كوزدەيتىن ناعىز دەموكراتيالىق باستاما جاسالىپ جاتىر. بۇل جيىنداردى وتكىزۋ ءۇشىن ارنايى ورىندار, الاڭدار بەلگىلەنبەك. الايدا وپپوزيتسيا وكىلدەرى مۇنىمەن كەلىسپەي وتىر. ولار مۇنداي بەيبىت جيىندار كەز كەلگەن ورىنداردا ءوتۋى ءتيىس دەگەن پىكىردە.
بۇل ۇستانىمدى قوستامايمىن. مەنىڭ ويىمشا, ادام بوستاندىعىنىڭ شەگى باسقا ادامنىڭ بوستاندىعىنىڭ شەگى باستالاتىن جەردە اياقتالادى. ياعني اتالعان جيىندارعا قاتىسۋدى كوزدەمەيتىن ازاماتتاردىڭ كۇندەلىكتى ءومىر-سالتىنا كەدەرگى كەلمەۋى ءتيىس. قاراستىرىلىپ جاتقان زاڭ جوباسىندا بەيبىت جيىنداردى ونسىز دا نۇر-سۇلتان, الماتى سىندى ەلىمىزدەگى ءىرى قالالاردىڭ ورتالىقتارىندا وتكىزۋ ماسەلەسى كوتەرىلىپ وتىر. بۇل باستامالاردىڭ ەلىمىزدىڭ وزگە قالالارىنا قاتىسى بار.
شەكتەۋ دەپ وتىرعانىم – جوعارىدا ايتقانىمداي بەيبىت جيىندارعا قاتىسپايتىن تۇرعىنداردىڭ قۇقىعىن قورعاۋ. ماسەلەن, جيىنداردىڭ مەكتەپ, بالاباقشا سىندى ءبىلىم وشاقتارىنىڭ, ەمحانا, اۋرۋحانا سىندى الەۋمەتتىك نىسانداردىڭ اۋماعىندا وتكىزىلگەنى – سونداعى ازاماتتاردىڭ قۇقىعىن اياق استى ەتۋ بولار ەدى. سوندىقتان بۇل شەكتەۋلەر زاڭ تۇرعىسىنان دۇرىس نەگىزدەمە بولىپ وتىر.
ارينە تالقىلاۋ ءالى دە جۇرگىزىلەدى. ول دا دۇرىس. سەبەبى «كەلىسىپ پىشىلگەن توننىڭ كەلتە بولمايتىنى» بەلگىلى. زاڭدى جەتىلدىرە تۇسەتىن تىڭ باستامالار, يگى نەگىزدەمەلەر بولادى دەپ سەنەمىن.
سەرىك بەركامالوۆ,
كونسالتينگتىك جانە زەرتتەۋ ۇيىمدارى قاۋىمداستىعىنىڭ پرەزيدەنتى, قازاقستان زاڭگەرلەر وداعى نۇر-سۇلتان قالالىق فيليالىنىڭ ديرەكتورى