«بولاشاق» ستيپەندياسىنا ۇمىتكەرلەردى ىرىكتەۋدىڭ جاڭا ەرەجەسى بەكىتىلدى

«بولاشاق» حالىقارالىق ستيپەندياسىنا ۇمىتكەرلەردى ىرىكتەۋدىڭ جاڭا ەرەجەلەرى بارلىعىنا بىردەي مۇمكىندىكتەر ۇسىنادى. بارلىق كۆوتالىق ساناتتار الىنىپ تاستالدى.

وسى جىلدان باستاپ «بولاشاق» ستيپەندياسىنىڭ كونكۋرسىنا اۋىلدىق ەلدى مەكەندەردەن كەلگەن ۇمىتكەرلەردى قوسپاعاندا, جەتەكشى شەتەلدىك جوعارى وقۋ ورىندارىنان شارتسىز شاقىرتۋعا يە تالاپكەرلەر عانا قاتىسا الادى.

وزگەرىستەر ەڭ الدىمەن «بولاشاق» ستيپەندياسىنا ۇمىتكەرلەردى كونكۋرستىق ىرىكتەۋ پروتسەسىنە, سونداي-اق كونكۋرسقا قاتىسۋدىڭ باستاپقى تالاپتارىنا قاتىستى.

كونكۋرستىق كەزەڭدەر سانى 6-دان 3-كە دەيىن قىسقارتىلدى, اتاپ ايتقاندا ۋاجدەمەلىك پەن ۇسىنىس حاتتاردى باعالاۋدىڭ ىرىكتەۋ كەزەڭدەرى, سونىمەن قاتار مەملەكەتتىك جانە شەت تىلدەرىن بىلۋگە ​​ارنالعان كەزەڭدەر الىنىپ تاستالدى. ۇمىتكەرلەر وزدىگىنەن تەست تاپسىرىپ, قۇجات وتكىزگەن كەزدە مەملەكەتتىك ءتىلدى ءبىلۋ تۋرالى سەرتيفيكاتتارىن ۇسىنۋى كەرەك. اۋىلدىق جەرلەردەن كەلگەن ۇمىتكەرلەر قوسىمشا شەت ءتىلىن ءبىلۋ تۋرالى سەرتيفيكاتتاردى ۇسىنادى.

مەملەكەتتىك ءتىلدى ءبىلۋ دەڭگەيىن انىقتاۋعا ارنالعان سىناق ۇلتتىق تەستىلەۋ ورتالىعىنىڭ ايماقتىق فيليالدارىندا وتكىزىلەدى.

ىرىكتەۋ كەزەڭدەرى مىنالاردى قامتيدى:

1-كەزەڭ: ينتەللەكتۋالدى قابىلەت دەڭگەيىن, جەكە جانە ىسكەرلىك قابىلەتتەرىن, شەتەلدە وقۋعا پسيحولوگيالىق دايىندىعىن انىقتايتىن كەشەندى تەست;

2-كەزەڭ: تاۋەلسىز ساراپشىلار كوميسسياسىنىڭ مۇشەلەرىمەن جەكە سۇحبات;

3-كەزەڭ: شەتەلدە كادرلاردى دايارلاۋ جونىندەگى رەسپۋبليكالىق كوميسسيانىڭ وتىرىسى.

ايتا كەتەرلىگى, جاڭا ەرەجەدە الدىن-الا تىلدىك وقىتۋ الىنىپ تاستالدى. ول تەك اۋىلدىق جەرلەردەن كەلگەن تالاپكەرلەر ءۇشىن ساقتالادى جانە 6 اي مەرزىمى ىشىندە اعىلشىن ءتىلىن ۇيرەنۋ قازاقستان رەسپۋبليكاسىنىڭ اۋماعىندا وتكىزىلەدى.

«بولاشاق» ستيپەندياسىنا ۇمىتكەرلەردى ىرىكتەۋدىڭ جاڭا ەرەجەلەرىنە سايكەس, اۋىلدىق ەلدى مەكەندەردەن قاتىساتىن ۇمىتكەرلەر تەك سوڭعى 3 جىل ىشىندە اۋىلدىق جەرلەردە تۇرىپ جانە ونىڭ 2 جىلىن جۇمىس ىستەۋگە ارناعان جاعدايدا عانا كونكۋرسقا قاتىسا الادى.

باسىمدىق بەرىلگەن ماماندىقتار تىزبەسى ەڭبەك نارىعى قاجەتتىلىكتەرىنىڭ ورتا مەرزىمدى بولجامىن ەسكەرە وتىرىپ, قر ءبىلىم جانە عىلىم مينيسترلىگى ارقىلى جاسالادى.

2020 جىلعا ارنالعان «بولاشاق» ستيپەندياسىن تاعايىنداۋ كونكۋرسىنىڭ جەڭىمپازدارىنا ۇسىنىنىلاتىن جەتەكشى شەتەلدىك جوعارى وقۋ ورىندارىنىڭ, شەتەلدىك ۇيىمداردىڭ جانە تىلدىك كۋرستار ءتىزىمىنىڭ جوباسى قازىر كەلىسىلۋ ۇستىندە. 

الەمنىڭ جەتەكشى ۋنيۆەرسيتەتتەرى ءتىزىمىنىڭ جوباسى مىناداي حالىقارالىق اكادەميالىق رەيتينگتەر بويىنشا انىقتالادى: QS World University Rankings, Academic Ranking of World Universities, Times Higher Education World University Rankings, The U. S. News & World Report Best Global University Ranking.

سونىمەن قاتار, تاۋەلسىز ساراپشىلار كوميسسياسىنىڭ (تسك) قۇرامىمەن جۇمىس رەگلامەنتىنە وزگەرىستەر ەنگىزىلۋدە. كوميسسيا جۇمىسىن قاتاڭ رەتتەي وتىرىپ, ونىڭ اشىقتىعىن بارىنشا كۇشەيتۋ جوسپارلانۋدا.

«بولاشاق» ستيپەندياسىنا قۇجاتتاردى قابىلداۋ جانە ستيپەنديا تاعايىنداۋ كونكۋرسىن وتكىزۋ مەرزىمى قۇجاتتاردى قابىلداۋ ۋاقىتىنان 10 (ون) كۇنتىزبەلىك كۇن بۇرىن قازاقستان رەسپۋبليكاسىنىڭ بۇقارالىق اقپارات قۇرالدارىندا جاريالانادى.

قاۋلى قازاقستان رەسپۋبليكاسى ۇكىمەتىنىڭ ينتەرنەت-رەسۋرسىندا العاش رەسمي جاريالانعان كۇنىنەن باستاپ قولدانىسقا ەنگىزىلەدى.