پرەزيدەنت ماقتاارالدا كۇزگە دەيىن قيراعان ۇيلەردىڭ ورنىنا جاڭاسى سالىناتىنىن مالىمدەدى

«1 مامىر كۇنى وزبەكستان رەسپۋبليكاسىنداعى ساردوبا سۋ قويماسى بوگەتىنىڭ بۇزىلۋى سالدارىنان تۇركىستان وبلىسىندا سۋ تاسقىنى بولدى. بۇل – تەحنوگەندى سيپاتتاعى توتەنشە جاعداي. ماقتاارال اۋدانىنا قاراستى 5 اۋىلدىڭ 1 مىڭنان استام تۇرعىن ءۇيىن سۋ باسىپ قالدى. سونداي-اق 9 ەلدى مەكەندى سۋ باسۋ قاۋپى تۋىندادى. شۇعىل قابىلدانعان شارالاردىڭ ارقاسىندا سۋ تاسقىنىنىڭ ءارى قاراي تارالۋىنا جول بەرمەدىك. قازىر سۋ تاسقىنىنىڭ زارداپتارىن جويۋ, تازالاۋ جۇمىستارى جۇرگىزىلۋدە. قوعامدىق ءتارتىپ پەن تۇرعىنداردىڭ دۇنيە-مۇلكىنىڭ ساقتالۋىن قامتاماسىز ەتۋ باستى نازاردا»,- دەدى مەملەكەت باسشىسى.

پرەزيدەنت اۋداننىڭ كۇندەلىكتى تىرشىلىگىن قايتا قالپىنا كەلتىرۋ ءۇشىن قاجەتتى شارالار قابىلداناتىنىن جەتكىزدى.

«جالپى كۇزگە دەيىن قيراعان ۇيلەردىڭ ورنىنا جاڭا تۇرعىن ۇيلەر سالىنادى. زارداپ شەككەن ءاربىر ادامعا  100 مىڭ تەڭگە كولەمىندە وتەماقى تولەنەدى.  مال شىعىنى, تاسقىننىڭ اۋىل شارۋاشىلىعى القاپتارىنا تيگىزگەن زيانى وتەلەدى. جالپى, زارداپ شەككەن اۋىلداردىڭ ءاربىر ازاماتى قامقورلىقسىز قالمايدى. ولارعا جاردەم بەرەمىز»,- دەدى قاسىم-جومارت توقاەۆ.