وتكەن جىلدىڭ اياعىندا باستالىپ, جاڭا جىلدان سوڭ الەمگە كەڭىنەن تارالا باستاعان كوروناۆيرۋس اتتى ىندەتتىڭ ەلىمىزدە تارالماۋى ءۇشىن پرەزيدەنت ق.ك.توقاەۆ تىشقان جىلى قارساڭىندا توتەنشە جاعداي جاريالاپ, شەكارانى عانا ەمەس, قالالاردى كارانتينگە جاپقانى بەلگىلى. وسى جاعدايعا بايلانىستى ءبىزدىڭ ۋنيۆەرسيتەت ستۋدەنتتەرى دە الدىن الا ۇيلەرىنە, قازاقستاننىڭ تۇكپىر-تۇكپىرىنە جىبەرىلدى.
وسىنداي جاعدايدا وقۋ پروتسەسى قاشىقتان وقىتۋعا كوشىرىلدى. لەكتسيالار, تاجىريبەلىك ساباقتار ونلاين جۇيەسىندە zoom جانە ت.ب. پلاتفورمالاردا وتكىزىلە باستادى. ارينە جاپپاي مۇنداي وقۋ تۇرىنە كوشۋ بارىسىندا قيىنشىلىقتار دا كەزدەسكەنى اقيقات. دەگەنمەن بىرتىندەپ كەمشىلىكتەر جويىلىپ, وقۋ ادىستەمەسى تولىقتىرىلىپ, قالىپقا كەلە باستادى.
مۇنداي كۇيدى باستان وتكەرگەن وقىتۋشىلار الدىندا تاعى ءبىر ماسەلە پايدا بولدى. ءساۋىر ايىندا ءبىتىرۋشى تۇلەكتەر وندىرىستىك جانە ديپلوم الدى تاجىريبەدەن وتۋگە ءتيىس ەدى. كارانتين جاعدايىندا ءوز ۇيلەرى جاعىندا تاجىريبەدەن وتەتىندەرگە ونشا قيىندىق جوق بولاتىن. ال الىس جەرلەر, وبلىستارداعى شارۋاشىلىققا باراتىندارعا قيىندىق تۋعىزدى. ونىڭ ىشىندە ون شاقتى ستۋدەنتىمىز الماتى وبلىسى تالعار اۋدانىنداعى «بايسەركە-اگرو» جشس-نە بارۋى كەرەك ەدى. ال الماتى قالاسى كارانتينگە جابىلىپ, كولىك قاتىناستارى دا توقتاعانى بەلگىلى. وسى جاعدايدى ەسكەرە كەلە كافەدرا مەڭگەرۋشىسى س.بوستانوۆا عىلىمي جەتەكشىلەرمەن شۇعىل جينالىس وتكىزدى. ءارتۇرلى پىكىرلەردى تىڭداي كەلە ساۋلە قۋانىشبەكقىزى بيىلعى باراتىن ستۋدەنتتەردىڭ وتكەن جىلى اتالعان ايماقتا وندىرىستىك تاجىريبەدەن وتكەنىن, ەسەپتەرىن تاپسىرعانىن ايتا كەلە شارۋاشىلىقپەن بايلانىسقا شىعىپ, قالعان قاجەتتى دەرەكتەرگە قولۇشىن بەرۋدى سۇراڭدار دەدى. بۇل جەردە ايتىپ كەتەرىمىز, «بايسەركە-اگرو» جشس ۋنيۆەرسيتەتىمىزبەن كوپتەن تىعىز قارىم-قاتىناستا بولاتىن. تەك «مال شارۋاشىلىعى» ماماندىعى عانا ەمەس, اگرونومدار مەن مال دارىگەرلەرى دە جىلدا تاجىريبەدەن وتەدى. ويتكەنى «بايسەركە-اگرو» رەسپۋبليكاداعى الدىڭعى قاتارلى ەت جانە ءسۇت باعىتىنداعى اسىل تۇقىمدى ءىرى قارا مال وسىرۋمەن, قوي, جىلقى, تۇيە جانە وسىمدىك شارۋاشىلىعى جانە ت.ب. اينالىساتىن كوپسالالى اگروحولدينگ. وسى جاعدايدى ەسكەرە كەلە شارۋاشىلىقتىڭ ديرەكتورى م.اليەۆپەن بايلانىسقا شىعىپ, جاعدايدى ايتتىق. ءبىزدىڭ وتىنىشىمىزگە شارۋاشىلىق باسشىلىعى تۇسىنىستىكپەن قاراپ, ءتيىستى ماماندارعا تاپسىرما بەرىلەتىنىن جەتكىزدى. بىزگە بەكىتىلگەن ءۇش ستۋدەنتتىڭ تاقىرىبى سپورتتىق باعىتتاعى جىلقى شارۋاشىلىعى بولاتىن. شارۋاشىلىقتىڭ وسى سالاعا جاۋاپتى ماماندارى ءمادي قايىرحان, ەلەنا تۇرسىنوۆا بىزبەن بايلانىسقا شىعىپ, قاجەت مالىمەتتەر, دەرەكتەرمەن قامتاماسىز ەتۋگە نيەت ءبىلدىردى. قازىر الىنعان دەرەكتەردى ش.باقىت, س.ايتمۇرات, ءا.نۇرماحانبەتوۆا سەكىلدى ستۋدەنتتەر تالداپ زەردەلەۋ ۇستىندە.
ءسويتىپ تىعىرىقتان شىعاتىن جول تابىلىپ, ماسەلە وڭتايلى شەشىمىن تاپتى.
ومىرزاق سۇلتانوۆ,
س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ دوتسەنتى