COVID-19 ءساۋىر ايىنىڭ 23-ءى كۇنى پاۆلودار قالاسىنىڭ 57 جاستاعى تۇرعىنىنان تابىلدى. ەر ادام ينفەكتسيالىق ستاتسيونارعا جاتقىزىلدى.
ونىڭ ءجىتى برونحيت دياگنوزى بولدى. ناۋقاستىڭ جاعدايى اۋىرلىقتىڭ ورتاشا دارەجەسى رەتىندە باعالاندى.
پاتسيەنت 2-ءتيپتى قانت ديابەتىمەن ەسەپتە تۇردى.
26 ساۋىردە جاعدايىنىڭ ناشارلاۋىنا بايلانىستى ەر ادام جۇقپالى گوسپيتالدىڭ رەانيماتسيالىق بولىمىنە اۋىستىرىلدى.
كۇن سايىن رەسپۋبليكالىق ماماندارمەن كەڭەس وتكىزىلدى.
29 ساۋىردە ەر ادامدا تىنىس الۋ جەتىسپەۋشىلىگىنىڭ ءوسۋى تىركەلدى. وسىعان بايلانىستى ول ءوجج اپپاراتىنا قوسىلدى.
2 مامىردا ناۋقاستىڭ جاعدايى كۇرت ناشارلادى. كەڭەس الۋ ءۇشىن نۇر-سۇلتان قالاسىنىڭ كارديوحيرۋرگى شاقىرىلدى.
رەانيماتسيادان كەيىنگى كەزەڭدە ەمدەلۋشىدە جۇرەك-تىنىس الۋ جانە بۇيرەك جەتكىلىكسىزدىگى ءورشiدi. جۇرگىزىلگەن قارقىندى تەراپياعا قاراماستان, پاتسيەنتتىڭ جاعدايى ناشارلادى.
ەمدەۋ قر دسم دياگنوستيكالاۋ جانە ەمدەۋ حاتتاماسىنا سايكەس جۇرگىزىلدى.
6 مامىر كۇنى ساعات 20:40-تا ەر ادامنىڭ بيولوگيالىق ءولىمى انىقتالدى.