وزگە ەلدەردە نان دايارلاۋدىڭ وزىندىك ءتۇرلى ۇلتتىق ءداستۇرى, رەتسەپتى, اتاۋلارى بولاتىنى بەلگىلى. سول سياقتى ءوز ەلىمىزدەگى نان تۇرلەرىنە دە قازاقشا اتاۋلار كەرەك-اق.
قازاقتار دا نان پىسىرگەن. اتاۋلارى دا ءارتۇرلى. بولكە, كۇلشە, توقاش, قالاش, باتەر, تابا نان, كومەش نان, قولامتا نان بولىپ كەتە بەرەدى.
قازىر ءبىزدىڭ وڭىردەگى دۇكەندەرگە, سۋپەرماركەتتەرگە بارساڭىز دا ناننىڭ نەشە ءتۇرى تولىپ تۇر. تاڭداۋ سىزدە. بىراق قازاقشا اتالاتىن نان جوق.
ال ەندى اتاۋلارىنا قاراساڭىز: بورودينسكي چەرنىي حلەب, رۋسكي حلەب, سەميرەچينسكي, پاحوموۆسكي, يرتىشانكا, گرۋزينسكي, ياروسلاۆسكايا, نوۆوۋكراينسكايا, باگەتا, فيگۋرنايا, ساياچنىي, جەلەزنودوروجنىي, يۋجنىي, نا سىۆوروتكە, ستوليچنىي, پرەزيدەنتسكي, باتون, حالا, لەپەشكا, ازەربايجاندىق لاۆاش, روماشكا, رۋلەتكا, دوماشني, بەلىي حلەب, ترويكا, پەكارسكي, سايكا, مرامورنىي جانە باسقا تىلدەگى اتاۋى بار.
ءدال ءبىر رەسەيدە جۇرگەندەيسىڭ. ەندى تاتارسكي نان دەگەن پايدا بولىپتى.
– بۇل ناننىڭ ەكىنشى اتى – كازانسكي, تاتارلاردىڭ رەتسەپتىمەن جاسالعان وتە ءدامدى. ال كازاحشا نازۆانيەمەن ازىرگە نان جوق, – دەيدى ساتۋشى ك ۇلىپ.
اپپاق ۇندى قاپپەن ارقالاپ قازاننان, بورودينو, ياروسلاۆل, گرۋزيادان تاسىپ اكەلەتىندەي سويلەيدى.
مىسالى, ارحيۆ بەتتەرىندە سەميرەچينسكي نان اتاۋى كازاكتاردىڭ كەزىنەن قالعانى جازىلادى. پاحوموۆسكي نانى 1918 جىلى پاۆلودار ۋەزدىك سوۆدەپىنىڭ باسشىسى بولعان ن.پاحوموۆتىڭ اتىمەن اتالعانى ما سوندا؟ ناۋبايحانا دا وسى كوشە بويىندا ورنالاسقان.
وزگە تىلدەگى كوشە, اۋىل, قالا اتاۋلارىن ەلدىك ماقسات-مۇددەگە ساي جاڭعىرتۋدامىز. نان اتاۋلارى دا سونداي قۇرمەتكە لايىق. ءوسىپ كەلە جاتقان ورەندەرىمىز قازاق تىلىندەگى نان اتاۋلارىن ءبىلىپ ءوسسىن.
جەرگىلىكتى اكىمدىك, ءتىل باسقارماسى ناۋبايحانالاردان شىعاتىن ءتۇرلى ناندارعا ىرىس, بەرەكە, دارحان, داستارقان, اق بيداي, التىن ءدان, كەرەمەت, كادىمگىدەي قارا نان, اق نان, ءدامدى نان دەگەن سەكىلدى اتاۋلارعا ساي ۇسىنىس ەنگىزگەندەرى ءجون بولار ەدى.
پاۆلودار وبلىسى