بەلگىلى ديريجەر, قازاقستاننىڭ ەڭبەك سىڭىرگەن قايراتكەرى ابزال ءمۇحيتديننىڭ جەتەكشىلىگىمەن «استانا وپەرا» وركەسترى ارتىستەرىنىڭ ونلاين ورىنداۋىنداعى «مەرەكە بي» كومپوزيتسياسى سيمفونيالىق مۋزىكانى ءسۇيىپ تىڭداۋشىلار ءۇشىن ەرەكشە تارتۋ بولدى.
- ءبىز ءتۇرلى تۋىندىلاردى العاش رەت ونلاين ورىنداپ تۇرعان جوقپىز. كارانتين كەزىندە وسىنداي كۇردەلى قاشىقتان جۇمىس جاساۋ بارىسىندا بەلگىلى ءبىر تاجىريبە جيناقتادىق. الدا كەلە جاتقان مەرەكەلەر قارساڭىندا بارلىعىنىڭ كوڭىل-كۇيىن كوتەرىپ, كورەرمەندەر اۋديتورياسىن جيناپ, بىرىكتىرگىم كەلدى, سوندىقتان قىمباتتى تىڭدارماندارىمىز ءۇشىن م.تولەباەۆتىڭ ء«بىرجان – سارا» وپەراسىنان «مەرەكە ءبيدى» تاڭدادىق. وپەراداعى بۇل بي حوردىڭ قاتىسۋىمەن ورىندالادى, مۇندا حور ماڭىزدى ءرول اتقارادى, ونى تۇتاس بي سپەكتاكلى دەپ اتاۋعا بولادى, سوندىقتان ۇلتتىق كلاسسيكا جاۋھارىمەن تانىس ەمەس جاندارعا وسى وپەراداعى جانرلاردىڭ كەرەمەت ۇيلەسىمىن تىڭداپ, تاماشالاۋعا ءارى باعالاۋعا كەڭەس بەرەمىن. وركەستردىڭ بارلىق مۋزىكانتتارى وسى ءۇزىندىنى ورىنداۋ تۋرالى ۇسىنىستى قۋانا قابىل الدى, سەبەبى ول شىن مانىندە شابىتتاندىرىپ, مەرەكەلىك كوڭىل-كۇي سىيلايدى, - دەپ اتاپ ءوتتى ديريجەر, قازاقستاننىڭ ەڭبەك سىڭىرگەن قايراتكەرى ابزال مۇحيتدين.
ورىنداۋ ءۇشىن اتى اڭىزعا اينالعان وپەرانىڭ اتالمىش كومپوزيتسياسىن تاڭداۋدىڭ وزىندىك ءمانى بار. سەبەبى م.تولەباەۆتىڭ ء«بىرجان – سارا» وپەراسىمەن 2013 جىلى «استانا وپەرا» تەاترىنىڭ شىمىلدىعى ءتۇرىلىپ, ءدال وسى سپەكتاكلمەن تالاي رەت تەاتر ماۋسىمى باستالعان ەدى.
ەسكە سالار بولساق, «استانا وپەرا» سيمفونيالىق وركەسترى كارانتين كەزەڭىندە العاشقىلاردىڭ ءبىرى بولىپ الەمنىڭ كوپتەگەن مۋزىكانتتارىنا جاڭا فورماتتا قالايشا جۇمىس جاساۋدىڭ ۇلگىسىن كورسەتىپ, ج.بيزەنىڭ «كارمەن» وپەراسىنان ونلاين سيۋيتا جازدى. جاقىندا عانا اۋقىمدى جوبادا «استانا وپەرا» سيمفونيالىق وركەسترىنىڭ ارتىستەرىنە يتاليا, مەكسيكا, جاپونيا, قىتاي, رۋمىنيا, گرۋزيا ەلدەرىنەن الەمدىك دەڭگەيدەگى وپەرا جۇلدىزدارى قوسىلىپ, ميلليونداعان تىڭدارماننىڭ سۇيىكتى «O sole mio» نەوپوليتاندىق ءانىن ورىندادى.