تامىز ايىنىڭ سوڭعى ونكۇندىگىنەن باستاپ ماڭعىستاۋ وبلىسىنىڭ – 40, اقتاۋ قالاسىنىڭ 50 جىلدىق مەرەيتويىن ءارتۇرلى توي-دۋمان, سالتاناتتى شارالارمەن ادىپتەگەن اقتاۋدا تاعى ءبىر جۇلدىزدى شارا ءوتتى. «بۇل ءان بۇرىنعى اننەن وزگەرەك» دەپ شاكارىم اقىن كەستەلەگەندەي, اتالعان شارا بۇرىن-سوڭدى شارالارمەن سالىستىرعاندا, راسىندا وزگەرەك بولدى.
تامىز ايىنىڭ سوڭعى ونكۇندىگىنەن باستاپ ماڭعىستاۋ وبلىسىنىڭ – 40, اقتاۋ قالاسىنىڭ 50 جىلدىق مەرەيتويىن ءارتۇرلى توي-دۋمان, سالتاناتتى شارالارمەن ادىپتەگەن اقتاۋدا تاعى ءبىر جۇلدىزدى شارا ءوتتى. «بۇل ءان بۇرىنعى اننەن وزگەرەك» دەپ شاكارىم اقىن كەستەلەگەندەي, اتالعان شارا بۇرىن-سوڭدى شارالارمەن سالىستىرعاندا, راسىندا وزگەرەك بولدى.
سپورت – ادامزاتتىڭ دەنساۋلىعى مەن ءومىرى ءۇشىن ماڭىزعا يە, بىراق ونى تەك سپورت زالداردا وينالاتىن بەلگىلى ءبىر تۇرلەر اياسىندا عانا تانىپ كەلدىك. ارنايى قۇرال-جابدىقتارمەن جاسانعان كەڭ زالدا جاتتىقتىرۋشىلاردىڭ توككەن تەر, بەرگەن كەڭەستەرى ارقىلى عانا ىلۋدە ءبىر جانعا جالىن ۇستاتاتىن اساۋ ونەر رەتىندە قابىلدادىق. ال اقشا تولەپ ارنايى سەكتسيالارعا قاتىسۋدى, سپورت زالدارىنا بارۋدى كەز كەلگەن جاننىڭ قالتاسى كوتەرە بەرمەيتىنى بار. بىراق, سوڭعى كەزدەرى تاس توبەسىنەن شانشىلا شىر اينالىپ, ءبىر قولىمەن جەر تىرەپ, بۇكىل دەنەسىن كوتەرە لاقتىرىپ, اسقان جىلدامدىقپەن ءتۇسىنىپ ۇلگەرمەي قالاتىن قيمىلدار جاسايتىن جاسوسپىرىمدەر كوبەيدى. سويتسەك, بۇل حالىق اراسىندا جاي عانا «كوشە سپورتى» دەپ اتالادى ەكەن. جالعىز بۇل ەمەس, بارشا تۇرعىنداردىڭ قاتىسۋىنا, اينالىسۋىنا قولجەتىمدى سپورت تۇرلەرى مول ەكەن. اقتاۋدىڭ مەرەيتويىنا ارناپ قالانىڭ قاق ورتاسىنداعى استانا الاڭىندا وتكەن «Aktau Open Fest» مۋزىكا جانە سپورت فەستيۆالىنىڭ باستى ەرەكشەلىگى – وسى, ياعني بارشانىڭ اينالىسۋىنا قولايلى سپورت تۇرلەرىن ورتاعا سالدى. ماڭعىستاۋ وبلىسى جانە اقتاۋ قالاسى اكىمدىكتەرىنىڭ, ماڭعىستاۋ وبلىستىق باسكەتبول فەدەراتسياسىنىڭ ۇيىمداستىرۋىمەن ەكى كۇنگە سوزىلعان فەستيۆالدى قالانىڭ كوپتەگەن تۇرعىندارى مەن قوناقتارى قىزىعا تاماشالادى. استانا الاڭىن بىرنەشە الاڭقايعا ءبولىپ الىپ, ءبىر مەزەتتە بىرنەشە سپورت تۇرلەرىنەن ءوزارا سايىسقا تۇسكەن اتان جىلىك, ءاپايتوس جىگىتتەر كورەرمەندەردى تاڭ-تاماشا قالدىردى. ەكى كۇن بويى الاڭنان تابىلعان تۇرعىندار سەنبى-جەكسەنبىلىك دەمالىستارىن كوڭىلدى وتكىزگەندىگى انىق. اسىرەسە, جاستاردىڭ قىزىعۋشىلىعى باسىم ءتۇسىپ جاتتى.
العاشقى كۇنى قۇرامىندا BigSom, Stels Travoltah, Skif, BroMetis, Aidar BMM, Morisson بار قازاقستاندىق جانە رەسەيلىك رەپ-ورىنداۋشىلاردىڭ كونتسەرتى ءوتىپ, شارانىڭ حەدلاينەرى رەتىندە رەسەيلىك حيپ-حوپ ءانشىسى L´one ونەر كورسەتتى. قازاقستاندا ۆوركاۋتتان اۋەسقويلار قوزعالىسىنىڭ نەگىزىن سالۋشى رەتىندە بەلگىلى استانالىق «Bar Bars» توبى ءوز قويىلىمىن ۇسىندى.
قازاقستاننىڭ استانا, الماتى, قوستاناي, شىمكەنت, اتىراۋ, رۋدنىي, اقتاۋ جانە جاڭاوزەن قالالارىنان 10-نان استام كوماندا قاتىسقان فەستيۆالدە «3ح3», ياعني «كوشە باسكەتبولىنان», برەيك-دانس, پاركۋر, ستريتبول, ۆوركاۋت سەكىلدى سپورتتىق ويىن تۇرلەرىنەن سايىستار ءوتتى. اسىرەسە, فەستيۆال اياسىندا «كوشە باسكەتبولى» بويىنشا وتكەن سايىس – تۇڭعىش رەسپۋبليكالىق چەمپيونات بولۋىمەن ماڭىزدى.
ۇيىمداستىرۋشىلاردىڭ ءبىرى – ماڭعىستاۋ وبلىستىق باسكەتبول فەدەراتسياسىنىڭ ديرەكتورى سامسون اراكەلياننىڭ ايتۋىنشا, كەلەشەكتە وليمپيادالىق ويىندار باعدارلاماسىنا ەنگىزۋ جوسپارلانعان اتالمىش ويىننىڭ العاشقى چەمپيوناتى اقتاۋ قالاسىندا ءوتۋى – قالانى بۇل تۇرعىداعى تۇڭعىش باستاما كوتەرۋشى رەتىندە تانىتادى ەكەن.
بىلەۋلەنگەن بۇلشىق ەتتەرى بۇلتىلداي ويناپ, سىمداي تارتىلعان ءتىپ-تىك دەنەسىمەن بەلتەمىردى سىعىمداي ۇستاپ, ۇرشىقشا ءۇيىرىلگەن جىگىتپەن قاباتتاسا, بىراق بەلتەمىردەن ۇستاماي, تەك الگى سەرىكتەسىنىڭ قولى مەن شىنتاعىنان عانا ۇستاپ, تىرەي تارتىلعان جىگىتتىڭ شەبەرلىگى مەن شيراقتىعى جاستاردىڭ «ەسىن الدى». بۇل «ۆوركاۋت» دەگەن ويىن ءتۇرى ەكەن. سونداي-اق, سالماعى اۋىر نارسەلەردى قوس-قوستان تاسىپ, مەجەلەنگەن جەرگە جەتكىزۋ دە جىگىتتىڭ جىگىتى شىدار سىن. الاڭداعى قىزعىلىقتى سپورت تۇرلەرىنەن سايىستارمەن بىرگە گرافيتي مەن برەيك-دانستان, باسكەتبولدان اقش, رەسەي ەلدەرىنەن كەلگەن شەتەلدىك شەبەرلەردىڭ قاتىسۋىمەن شەبەرلىك-سىنىپتارى وتكىزىلدى.
ەكىنشى كۇنى دە جالعاسىن تاپقان الامان ويىنداردا جەڭىمپازدى انىقتاۋ وڭاي بولماعان سەكىلدى. بىراق, جارىس بولعان سوڭ جەڭىمپاز بولاتىنى بەلگىلى, قيىن دا بولسا ءبىراز تالقىلاۋ, سالىستىرۋلار ناتيجەسىندە «جۇزدەن وزعان جۇيرىكتەر» انىقتالىپ, ماراپاتتالدى. پاركۋر بويىنشا وسى ويىننىڭ اقتاۋ قالاسىنداعى بىردەن-ءبىر نەگىزىن سالۋشى بولىپ تابىلاتىن سەرگەي چيكچيرنىي جەڭىمپاز اتانىپ, تاع ايىندالعان جۇلدە – پلانشەتكە يە بولدى. ال بەلتەمىرمەن الۋان قيمىل-شىنىعۋ تۇرلەرىن كورسەتەتىن ۆوركاۋت سايىسى «قيىن ەلەمەنتتەر», «الدىڭعى سالماق», «جالاۋشا», «ەكى قولمەن شىعۋ» نوميناتسيالارى بويىنشا ءوتىپ, يلدار ياگياەۆ, سەرگەي گاۆريش, ماگامەد پليەۆ, ازامات كۋماروۆ سىندى مىقتىلاردى انىقتاپ بەردى. بۇلاردىڭ اراسىندا سايىس تۇرلەرىنەن قوس-قوستان جەڭىس تۇعىرىنا كوتەرىلگەن جىگىتتەر دە بار.
فەستيۆالدە قازاقستان رەسپۋبليكاسىنىڭ تۇڭعىش چەمپيوناتى وتكىزىلگەندىكتەن, ايرىقشا ءمان بەرىلگەن 3ح3 – «كوشە باسكەتبولى» سايىسى بولدى. ويتكەنى, ودان قارا ءۇزىپ شىققان جۇلدەگەرگە حالىقارالىق جارىستاردا ەل نامىسىن قورعاۋ مىندەتى جۇكتەلمەك. سالماقتى ساراپ, قىراعى قاداعالاۋ ناتيجەسىندە 2-3-ءشى ورىنداردى الماتىلىق قوس كوماندا «ۋراگان» مەن «ريتم» يەمدەنسە, جەڭىس ەلوردالىق «استانا» كومانداسىنا بۇيىردى. چەمپيوناتتا ۇزدىك ويىن كورسەتكەن بۇل كوماندا كەلەسى جىلى ازيا چەمپيوناتىندا قازاقستاننىڭ ابىرويىن ارقالاپ شىعاتىن بولادى.
كورىكتى وتشاشۋلارى كوككە شاشىلىپ, اراسىندا يتاليالىق Son Pascal بار بەلگىلى حيپ-حوپ انشىلەر, وزگە دە تانىمال ونەر جۇلدىزدارى كونتسەرت بەرگەن فەستيۆال كوتەرىڭكى كوڭىل-كۇيمەن قورىتىلدى.
ماڭعىستاۋ وبلىسىنىڭ اكىمى ا.ايدارباەۆ مەرەيلى مەرەكە قۇشاعىنداعى ماڭعىستاۋ جاستارىن كوشە ويىندارىنىڭ اسەرىنە بولەپ, جاقسى كوڭىلمەن باۋراعانى ءۇشىن جانە جاستاردىڭ سالاماتتى ءومىر سالتىنىڭ ءمانىن ودان ءارى تەرەڭدەي ۇعىنۋى, ولاردىڭ قىزىعۋشىلىعىن تۋدىرۋ جولىنداعى بەلسەندى باستامالارى ءۇشىن ۇيىمداستىرۋشىلار – قازاقستان رەسپۋبليكاسى باسكەتبول فەدەراتسياسىنىڭ پرەزيدەنتى اباي الپامىسوۆ پەن ماڭعىستاۋ وبلىستىق باسكەتبول فەدەراتسياسىنىڭ ديرەكتورى, مۋزىكانت, رەپەر سامسون اراكەلياندى قابىلداپ, فەستيۆالدىڭ جاستاردى ماڭىنا توپتاستىرىپ, ۇلكەن قىزىعۋشىلىقپەن وتۋىمەن قۇتتىقتادى.
بارشانىڭ كوزى ۇيرەنگەن, ساناعا سىڭگەن سپورت ويىندارىنان مۇلدەم باسقا, اتالۋى دا وعاش ەستىلەتىن وسى ءبىر ويىن تۇرلەرىن اركىمنىڭ, اسىرەسە ەرەسەكتەردىڭ قابىلداۋى ارقالاي. بىراق, بولمىسى بۇرىنعى مۇز ايدىنىندا سىرعانايتىن كونكي ىسپەتتى, تابانىندا دوڭگەلەكتەرى بار «باتەڭكە-كونكيدى» كيىپ الىپ, كوك اسفالت ۇستىندە جۇيتكىپ جۇرگەن نەمەرەلەرىن كورىپ-اق ءجۇر. ەكى شەتىندە دوڭگەلەگى بار تاقتايمەن كوز الدىنان زۋىلداي وتەتىندەر دە تاڭسىق ەمەس. بۇل سوڭعى ويىنداردىڭ جەكەلەگەن تۇرلەرى عانا. بۇل جاي عانا ويىن نەمەسە اۋەستىك ەمەس, سپورت. جاستاردىڭ شىنىعۋ, دەنساۋلىعى مەن مادەنيەتتىلىگى وسى ءوز بەتىنشە شۇعىلدانۋدا جاتسا كەرەك. اقتاۋدا وتكەن «Aktau Open Fest» فەستيۆالى – وسى ويىنداردى توپتاستىرىپ, ەڭ مىقتىلاردى انىقتاۋعا جانە وعان تۇرعىنداردىڭ ىنتاسىن وياتۋعا كۇش سالدى.
گۇلايىم شىنتەمىرقىزى,
«ەگەمەن قازاقستان».
اقتاۋ.