سارىاعاش – وڭتۇستىك قازاقستان وبلىسىنىڭ ەڭ ءىرى وندىرىستىك-اگرارلىق ايماعى. بۇگىندە مۇندا نارىقتىق ينفراقۇرىلىمنىڭ نەگىزى قالانعان. سارىاعاش ەمدىك مينەرالدى سۋلارعا باي. جەرى دە وتە قۇنارلى, استىق, ماقتا, باۋ-باقشا وسىرۋگە وتە قولايلى. ايماق كوكونىس جانە ءجۇزىم وندىرۋدە الدا كەلەدى. باسقا ايماقتارعا قاراعاندا سارىاعاشتا شاراپ, ماقتا-ماتا ونىمدەرىن وندىرۋگە جانە تۋريستىك كلاستەرلەردى وركەندەتۋگە مۇمكىندىكتەر مول.
سارىاعاش – وڭتۇستىك قازاقستان وبلىسىنىڭ ەڭ ءىرى وندىرىستىك-اگرارلىق ايماعى. بۇگىندە مۇندا نارىقتىق ينفراقۇرىلىمنىڭ نەگىزى قالانعان. سارىاعاش ەمدىك مينەرالدى سۋلارعا باي. جەرى دە وتە قۇنارلى, استىق, ماقتا, باۋ-باقشا وسىرۋگە وتە قولايلى. ايماق كوكونىس جانە ءجۇزىم وندىرۋدە الدا كەلەدى. باسقا ايماقتارعا قاراعاندا سارىاعاشتا شاراپ, ماقتا-ماتا ونىمدەرىن وندىرۋگە جانە تۋريستىك كلاستەرلەردى وركەندەتۋگە مۇمكىندىكتەر مول.رەسپۋبليكادا شاراپ كلاستەرىن دامىتۋعا وڭتۇستىكتىڭ كليماتتىق جاعدايى وتە قولايلى.
كەشە ەلباسى نۇرسۇلتان نازارباەۆ سارىاعاشتاعى ءجۇزىم القابىندا بولىپ, وسىنداعى «Caspian Food» جشس جاڭا كاسىپورنىنىڭ جۇمىسىمەن تانىستى. بۇل زاۋىت سوڭعى ءۇش جىلدا 222 گەكتار جەرگە ءجۇزىمنىڭ جاڭا سورتتارىن وتىرعىزىپ, بيىل سونىڭ 123 گەكتارىنان ءونىم جيناپ جاتىر. قازىرگە دەيىن 570 توننا ءونىم جينالدى. «فرانتسياعا جاساعان ساپارلاردىڭ بىرىندە ءىرى شاراپ وندىرۋشىلەرمەن كەزدەسىپ, ەلىمىزدە ساپالى شاراپ ءوندىرۋ جايىن تالقىلاعانىم بار. ونداعى ماماندار ەلىمىزگە كەلىپ, جوعارى ساپالى شاراپ دايىنداۋ ءۇشىن جاڭا ءجۇزىم سورتتارىن وتىرعىزىپ, زاماناۋي تەحنولوگيامەن جۇمىس جاسايتىن قۇرالدار كەرەك دەگەن ەدى. وسىنى ىسكە اسىرۋ ءۇشىن جەرگىلىكتى بيلىك 600 گەكتار جەر ءبولدى. مۇندا جوعارى سۇرىپتى ءجۇزىم ەگىلىپ, زاماناۋي زاۋىت بوي كوتەرەدى. بۇل شاراپ بولاشاقتا قازاقستاننىڭ اتىن شىعاراتىن برەندكە اينالادى», دەدى شاراپ زاۋىتىنىڭ باسشىلارىمەن كەزدەسكەن مەملەكەت باسشىسى ن.نازارباەۆ.
بۇگىندە زاۋىتقا قاراستى جەر تەلىمدەرىنە ءجۇزىمنىڭ جوعارى ساپالى «ركاتسيتەلي», «ساپەراۆي» جانە فرانتسۋزدىق «كابەرنە فران», «كابەرنە سوۆينون», «سوۆينون بلانش» جانە تاعى باسقا سورتتارى ەگىلگەن. جالپى, سارىاعاش اۋدانىندا ءدال قازىر 2205 گەكتار ءجۇزىم القابى بار, ونىڭ 1388-ءى ءونىم بەرۋدە. ال قالعانى ءالى جاس, ەندى جايقالىپ ءوسىپ كەلەدى. بيىل اۋدان سونىڭ ءار گەكتارىنان 72,4 تسەنتنەردەن ءجۇزىم جيناپ, بارلىعى 10 054 توننا ءونىم الۋدى جوسپارلاپ وتىر. سونداي-اق, سارىاعاشتا 4 شاراپ زاۋىتى جۇمىس ىستەيدى. ولار جىلىنا 33,0 مىڭ توننا شاراپ ونىمدەرىن شىعارادى.
بۇگىنگى كۇننىڭ تالابى – بۇرىنعىداي جيناپ العان ءونىمدى بىردەن بازارعا اپارىپ ساتۋدان بۇرىن ونى ساپالى وڭدەۋ بولىپ وتىر. سەبەبى, الا جازداي توككەن تەردىڭ اقىسىن نارىقتاعى ارزان باعاعا تەلىگەنشە, اتالعان ءونىمدى وڭدەۋ ارقىلى مول پايداعا كەنەلۋدى ويلاستىرۋ كەرەك. سوڭعى جىلدارى وبلىستا جۇزىمدىك ەگىس القاپتارىنىڭ كولەمىن ارتتىرۋدا, ءونىمدى وڭدەۋدە تياناقتى جۇمىستار اتقارىلىپ كەلەدى. بيىل جەمىس-جيدەك پەن ءجۇزىم ەكپەلەرىنىڭ كولەمى ۇلعايىپ, 27,0 مىڭ گەكتاردى قۇرادى. كەڭەس ءداۋىرى كەزىندە جەمىس-جيدەك داقىلدارى مەن ءجۇزىمنىڭ كوپجىلدىق ەكپەلەرىنەن ەڭ جوعارى ونىمدىلىك 1990 جىلى الىنىپ, 137,0 مىڭ توننانى قۇراعان ەكەن. بيىل 26,0 مىڭ تونناعا ارتىپ, 163,0 مىڭ توننا ءونىم جينالادى دەپ كۇتىلۋدە. ەندى وسى ءونىمدى ۇتىمدى وڭدەۋ جاعىن ويلاستىرۋ قاجەت.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.