رەجيسسەر ىڭكار ءابدىراشتىڭ «ۇماي» («تەرەزە الدىنداعى بالا») قىسقامەتراجدى ءفيلمى قورجىنىن تاعى ءبىر جۇلدەمەن تولىقتىردى. فيلم ح Dadasaheb Phalke Film Festival (DPIFF) حالىقارالىق كينوفەستيۆالىندە ۇزدىك قىسقامەتراجدى فيلم جۇلدەسىن جەڭىپ الدى.
ۇندىستانداعى ەڭ بەدەلدى DPIFF كينوفەستيۆالى جىل سايىن 30-شى ساۋىردە ءۇندى كينوسىنىڭ نەگىزىن قالاۋشى داداساحەب فالكەنىڭ تۋعان كۇنىندە وتەدى. ونىڭ 1913 جىلى تۇسىرىلگەن «رادجا حاريشچاندرا» ءفيلمى ەڭ العاشقى تولىقمەتراجدى ءۇندى ءفيلمى بولىپ ەسەپتەلەدى. فەستيۆال تاۋەلسىز كينوعا ارنالعان جانە جاس رەجيسسەرلەردىڭ شىعارماشىلىعىن دامىتۋعا باعىتتالعان. فەستيۆال العاش رەت ونلاين رەجيمىندە ءوتتى.
بۇدان بۇرىن «ۇماي» ءفيلمى British International Amateur Film Festival (BIAFF) حالىقارالىق اۋەسقويلار كينوفەستيۆالىندە «ەڭ ۇزدىك فيلم», «ەڭ ۇزدىك ستسەناري» نوميناتسياسى بويىنشا توپ جارعان بولاتىن.
ىڭكار ءابدىراشتىڭ دەبيۋتتىك ءفيلمىنىڭ جەلىسى ءوزىمشىل اكتريسانىڭ ءومىرىن تۇبەگەيلى وزگەرتەتىن بالالار ءۇيىنىڭ تاربيەلەنۋشىسىنىڭ ءومىرىن باياندايدى. كارتينانىڭ پروديۋسەرلەرى فارحات ءابدرايىموۆ پەن گۇلشات سماعۇلوۆا بولدى. ءفيلمدى مادەنيەت جانە سپورت مينيسترلىگىنىڭ تاپسىرىسىمەن ش.ايمانوۆ اتىنداعى «قازاقفيلم» كينوستۋدياسىنىڭ «دەبيۋت» شىعارماشىلىق بىرلەستىگى ءتۇسىردى.