بۇگىن, 19 قىركۇيەك كۇنى الماتىنىڭ «قايرات» كومانداسى نەگىزگى قۇرامىنىڭ ويىنشىلارى ءوز جانكۇيەرلەرىمەن جانە بۇقارالىق اقپارات قۇرالدارىنىڭ وكىلدەرىمەن كەزدەستى. بۇل تۋرالى «قايرات» فۋتبول كلۋبىنىڭ سايتى حابارلادى.
كەزدەسۋ كلۋبتىڭ الماتىداعى رەسمي دۇكەنىندە ءوتتى. «بۇگىن ءبىزدىڭ فان-شوپتا ناعىز انشلاگ بولدى. كۇندەلىكتى جۇمىس كۇنى ەكەنىنە قاراماستان, «قايراتتىڭ» كوپتەگەن جانكۇيەرلەرى سۇيىكتى ويىنشىلارىمەن ديدارلاسۋ ءۇشىن وسىندا ارنايى كەلدى. ولارمەن جۇزدەسكەن داۆيد لوريا, ليۋبومير ميحاليك, ستيۋارت دافف, ارتۋر ەديگاريان, مومودۋ سيسەي جانە باس جاتتىقتىرۋشى ۆلاديمير ۆايسس قولتاڭبالارىن تاراتتى», - دەپ جازىلعان وندا.
كەزدەسۋدە ويىنشىلار مەن باس جاتتىقتىرۋشى فاناتتاردى تولعاندىرىپ جۇرگەن كوپتەگەن سۇراقتارعا جاۋاپ بەردى. قايراتتىقتار بۇكىل ماۋسىم بويىنا وزدەرىنە قولداۋ كورسەتكەندەرى ءۇشىن جاناشىرلارىنا العىس سەزىمىن ءبىلدىردى. ءوز كەزەگىندە جانكۇيەرلەر دە كوماندانىڭ سوڭعى تۋردا شىمكەنتتە جەرگىلىكتى «ورداباسى» كومانداسىن جەڭىپ كەلگەنى ءۇشىن راحمەت ايتتى.
سوڭىنان «قايراتتىڭ» فاناتتارى, ويىنشىلارى مەن باس جاتتىقتىرۋشىسى ەسكەرتكىش سۋرەتكە ءتۇستى. كوماندامەن كەلەسى كەزدەسۋ بيىلعى ماۋسىمنىڭ سوڭىندا وتەتىن بولىپ كەلىسىلدى.
رۋسلان يگىلىك.