بۇگىن, 19 قىركۇيەتەى جۇمىس ساپارىمەن فرانتسيادا جۇرگەن قازاقستان پرەمەر-ءمينيسترى سەرىك احمەتوۆ حالىقارالىق كورمەلەر بيۋروسىنىڭ (حكب) باس حاتشىسى ۆيسەنتە لوسسەرتالەسپەن كەزدەستى. بۇل تۋرالى پرەمەر-ءمينيستردىڭ سايتىنان حابارلاندى.
كەزدەسۋدىڭ باستى تاقىرىبى قازاقستان مەن حكب-نىڭ ءوزارا ءىس-قيمىلى, سونداي-اق استانادا ەكسپو-2017 وتكىزۋگە دايىندىق بارىسى بولدى.حالىقارالىق كورمەلەر بيۋروسىمەن ىنتىماقتاستىقتىڭ ستراتەگيالىق سيپاتىنا توقتالعان, ۇكىمەت باسشىسى قازاقستان ءۇشىن ەكسپو-2017 وتكىزۋدىڭ ماڭىزدىلىعىن اتاپ كورسەتتى.
«قازاقستان تاراپىنان كورمەنى ساپالى وتكىزۋگە دايىندىق بويىنشا قاجەتتى شارالاردىڭ ءبارى جاسالۋدا», - دەدى س.احمەتوۆ.
پرەمەر-مينيستر ۆ.لوسسەرتالەسكە ۇستىمىزدەگى جىلدىڭ جەلتوقسانىندا حكب-عا ۇسىنىلاتىن, كورمەنىڭ ساۋلەتتىك ەسكيزىنە كونكۋرس وتكىزۋ بويىنشا تىركەۋ دوسەسىنىڭ اياقتالۋ كەزەڭى تۋرالى حابارلادى.
«حالىقارالىق كونكۋرسقا الەمنىڭ ءار ءتۇرلى ەلدەرىنەن 50 دەن استام مامان قاتىستى. كونكۋرستىڭ قورتىندىسى بويىنشا ەكسپو كورمەسى كەشەنىنىڭ نەگىزى بولماقشى ەسكيز-يدەيا انىقتالادى», دەدى س.احمەتوۆ.
ۆ.لوسسەرتالەس استانادا ەكسپونى وتكىزۋگە دايىندىقتىڭ جوعارعى دەڭگەيدە جۇرگىزىلىپ جاتقانىن ايتىپ, وسى ورايدا مەملەكەت باسشىسىنىڭ ءرولىنىڭ ايرىقشا ەكەنىن اتاپ كورسەتتى.
«مەن استانادا قازاقستان پرەزيدەنتىمەن كەزدەستىم. سوندا نۇرسۇلتان نازارباەۆ كورمەگە دايىندىق بارىسىنىڭ ونىڭ تىكەلەي باقىلاۋىندا بولاتىنىن ايتقان ەدى», - دەدى باس حاتشى.
حكب باس حاتشىسى «جيىرما جىلدان ارتىق مەن وسى باعىتتا ەڭبەك ەتىپ كەلەمىن, كورمەلەر وتكىزەم, مەنىڭ تاريحىمدا مۇنداي تەز, جەدەل جانە ءتيىمدى تۇردە ىسكە كىرىسىپ كەتكەن ەل بولعان جوق»-دەپ ءسوزىن جالعاستىردى.
كەزدەسۋ سوڭىندا, ۆ.لوسسەرتالەس قازاقستان جاعىنا مامانداندىرىلعان كورمەنى وتكىزۋ بارىسىندا تابىس تىلەدى.
انىقتاما ءۇشىن
حالىقارالىق كورمەلەر بيۋروسى (حكب) كورمەلەردى ۇيىمداستىرۋشىلار مەن قاتىسۋشىلاردىڭ مىندەتتەرى مەن قۇقىقتارىن بەكىتكەن 1928 جىلى پاريج قالاسىندا قول قويىلعان حالىقارالىق ديپلوماتيالىق كونۆەنتسيامەن قۇرىلدى. حكب قىزمەتى حالىقارالىق كورمەلەرگە قاتىستى كونۆەنتسيا وتىنىمدەرىن قامتۋ مەن باقىلاۋدى جۇزەگە اسىرۋعا باعىتتالعان.
ءبىرىنشى دۇنيەجۇزىلىك امبەباپ كورمە 1851 جىلى لوندوندا ءوتتى. بۇگىنگى تاڭدا حكب-عا 163 ەل كىرەدى. قازاقستان وعان 1997 جىلى مۇشە بولدى.
2012 جىلعى 22 قاراشادا حكب-نىڭ 152-ءشى باس اسسامبلەياسىندا جاسىرىن داۋىس بەرۋ ناتيجەسىندە 103 قولداۋشى داۋىس (44 قارسى) الىپ, استانا بەلگيانىڭ لەج قالاسىنان وزىپ, «ەكسپو-2017» وتكىزۋ ورنى رەتىندە جاريالاندى