باتىس قازاقستان وبلىسى ءبورلى اۋدانىنىڭ اكىمى ميرجان ساتقانوۆ اۋدان تۇرعىندارىن 11 مامىرعا دەيىن توتەنشە جاعداي رەجيمىنىڭ تالاپتارىن قاتاڭ ساقتاۋعا شاقىردى. سونداي-اق مۇقتاج جاندارعا كورسەتىلىپ جاتقان ءىس-شارالاردى باياندادى.
«قۇرمەتتى بورلىلىكتەر!مەملەكەت باسشىسى قاسىم-جومارت كەمەل ۇلى توقاەۆ قازاقستان حالقىنا ارنالعان ءوز مالىمدەمەسىندە توتەنشە جاعداي رەجيمى 11 مامىرعا دەيىن ۇزارتىلعاندىعىن جانە اتالعان جاعدايعا بايلانىستى مەملەكەت تاراپىنان قولداۋلار, كومەكتەر ءالى دە جالعاساتىنىن اتاپ ءوتتى. سوندىقتان, جەرلەستەرىمدى 11 مامىرعا دەيىن توتەنشە جاعداي رەجيمىنىڭ تالاپتارىن قاتاڭ ساقتاۋعا شاقىرامىن. ويتكەنى, بۇل ادام دەنساۋلىعىنا وتە قاۋىپتى ىندەت, مۇنى بۇكىل الەم مويىنداپ وتىر.
قازىرگى كۇردەلى كەزەڭدە مەملەكەت تاراپىنان كورسەتىلىپ جاتقان كومەكتەر مەن قولداۋلارعا بورلىلىكتەر دە يە بولۋدا. تابىسىنان ايىرىلعان ازاماتتاردىڭ وتىنىشتەرى بويىنشا 11 مىڭنان اسا جەرلەستەرىمىزگە 42500 تەڭگە كولەمىندە كومەك كورسەتىلدى. كوممۋنالدىق قىزمەت ءۇشىن تولەنەتىن 15000 تەڭگە كولەمىندەگى تولەم الۋعا ارنايى قۇرىلعان call-ورتالىققا 1000-عا جۋىق ءوتىنىش ءتۇسىپ وتىر. ۇلى وتان سوعىسىنداعى جەڭىستىڭ 75 جىلدىعىنا وراي, بارلىق سوعىس جانە تىل ارداگەرلەرىنە تولەمدەر ۋاقىتىلى تولەندى.
قينالعاندارعا قول ۇشىن سوزعان ۆولونتەرلەردىڭ جانە جەكە كاسىپكەرلەردىڭ كومەگىمەن 400-گە جۋىق مۇقتاج وتباسىلارعا ازىق-ت ۇلىكپەن, باسقا دا قاجەتتى زاتتارمەن (وتىن, تۇرمىستىق, شارۋاشىلىق زاتتار) كومەكتەر كورسەتىلدى.
مەملەكەت باسشىسى توتەنشە جاعدايلار كەزىندە كوكتەمگى ەگىس ناۋقانىنا ەشقانداي كەدەرگى بولماۋىن مىندەتتەگەن بولاتىن. بۇل ماسەلە دە ءوز شەشىمىن تاۋىپ, 41 شارۋا قوجالىقتارى ەگىس دالاسىندا جۇمىستارىنا كىرىستى.
جۇمىسشىلاردى قىسقارتپاۋ جانە ەڭبەكاقى كولەمىن ازايتپاۋ ماقساتىندا ءارى ەل ەكونوميكاسى ءۇشىن ماڭىزدى قاراشىعاناق كەن ورنىنداعى كومپانيالار بارلىق سانيتارلىق تالاپتاردى ساقتاي وتىرىپ, جۇمىستارىن جالعاستىرۋدا.
الداعى ۋاقىتتاعى ءبىزدىڭ مىندەتىمىز – قاۋىپسىزدىك شارالارىن ساقتاپ, ىندەتتىڭ جاڭا وشاقتارىنىڭ پايدا بولۋىنا جول بەرمەۋ. ول ءۇشىن مەملەكەتتىك ورگاندار, مەديتسينا, قۇقىق قورعاۋ, شەكارا بەكىتىنىڭ قىزمەتكەرلەرى بارىنشا قىزمەت ەتىپ, شەكارادان وتكەن, وزگە وڭىرلەردەن كەلگەن نەمەسە قانداي دا ءبىر اۋرۋ بەلگىسى بايقالعان ازاماتتاردى قاتاڭ باقىلاۋعا الىپ, ءتيىستى شارالار قابىلداۋدا. ءبىزدىڭ تۇرعىندارىمىز دا, سونىڭ ىشىندە اتىراۋ وڭىرىندەگى كەن ورىندارىنان جۇمىستان كەلگەن جەرلەستەرىمىز ۆيرۋسقا جەڭىل-جەلپى قاراماي, كارانتين تالاپتارىن قاتاڭ ساقتاپ, جاۋاپكەرشىلىكتى سەزىنسە ەكەن دەيمىن.
«مەن ءۇشىن ءار ازاماتتىڭ ومىرىنەن قىمبات ەشتەڭە جوق», - دەگەن مەملەكەت باسشىسىنىڭ ءسوزىن تاعى دا قايتالاعىم كەلەدى. بۇل قيىندىقتى دا جەڭەمىز, ەڭ باستىسى – بىرلىگىمىز بەكەم بولسىن!
ەل باسىنا كۇن تۋعاندا قاۋىپ-قاتەرگە قاراماي, الدىڭعى قاتاردا قىزمەت كورسەتىپ جۇرگەن دارىگەرلەرىمىزگە, پوليتسيا قىزمەتكەرلەرىنە, شەكاراشىلارىمىزعا, قالانىڭ تازالىعى مەن زالالسىزداندىرۋ جۇمىستارىن جۇرگىزگەن ماماندارىمىزعا, ءوز قاۋىپسىزدىگىن ويلاماي, مۇقتاج جاندارعا قول ۇشىن سوزعان ۆولونتەرلەرىمىز بەن جومارت جاندارعا, بارلىق اقپاراتتى تۇرعىندارعا دەر كەزىندە ءارى شىنايى جەتكىزىپ وتىرعان جەرگىلىكتى بۇقارالىق اقپارات قۇرالدارى وكىلدەرىنە جانە توتەنشە جاعداي رەجيمىندە قابىلدانعان ناقتى شارالاردى مەرزىمىندە ءارى اسا جاۋاپكەرشىلىكپەن جۇزەگە اسىرعان ارىپتەستەرىمە, تۇسىنىستىك تانىتىپ, تالاپتاردى ورىنداپ, قولداۋ بىلدىرگەن بارشا تۇرعىندارىمىزعا العىسىمدى بىلدىرەمىن. اسپانىمىز اشىق, ەلىمىز, جۇرتىمىز امان بولسىن»,- دەپ جازدى ول Facebook پاراقشاسىندا.