ج. ايماۋىتوۆ اتىنداعى قازاق مۋزىكالى دراما تەاترىنا بۇل ماقساتقا 402 ملن تەڭگە بولىنگەن, دەپ حابارلادى pavlodarnews.kz ءتىلشىسى.
بۇل تۋرالى ونلاين ءباسپاسوز كونفەرەنتسياسىندا وبلىستىق مادەنيەت, تىلدەردى دامىتۋ جانە ارحيۆ ىستەرى باسقارماسىنىڭ باسشىسى ەرنۇر داۋەنوۆ ايتتى.
-اتالعان قاراجاتقا تەتاتردىڭ توبەسى, عيماراتتىڭ قاسبەتى, گريم جاساۋ جانە باسقا دا بولىمدەرى جوندەلەدى, - دەيدى ەرنۇر داۋەنوۆ. – سونداي-اق ۇلكەن ءماجىلىس زالى جاڭعىرتۋدان وتەدى. جوندەۋ جۇمىستارى كەزىندە سپەكتاكلدەردى توقتاتۋعا تۋرا كەلەدى. سونداي-اق تەاتردىڭ 29-شى تۋعان كۇنىنە وراي Toraighyrov University ونەر ۇجىمىنا ماگيستراتۋرادا ءبىلىمىن جەتىلدىرۋگە 10 گرانت ۇسىنعان بولاتىن. ول ءۇشىن شەكتى بال جيناۋ قاجەت. جوعارى وقۋ ورنىمەن كەلىسىمشارت جاسالعان. ارتىستەر ءبىلىم الا الاتىن ءتورت ماماندىق بار.
باسقارما باسشىسىنىڭ ايتۋىنشا, ا. چەحوۆ اتىنداعى تەاتر عيماراتىنىڭ ەكىنشى بولىگىن جوندەۋ جۇمىستارىنا «بيزنەستىڭ جول كارتاسى 2025» باعدارلاماسى شەڭبەرىندە 188 ملن تەڭگە بولىنگەن.
-بۇل جولى عيماراتتىڭ ەكىنشى بولىگى عانا جوندەلەدى, - دەيدى ەرنۇر داۋەنوۆ. – سەبەبى, 2011 جىلى ءبىرىنشى بولىگى: فويە, ۇلكەن زال مەن اكىمشىلىك بلوك جوندەۋدەن وتكىزىلگەن. بيىل شاعىن ءماجىلىس زالى, حورەوگرافيالىق بلوك, نەگىزگى عيماراتتىڭ ءبىر بولىگى, كوستيۋم جانە تىگىن تسەحى, ۆيدەوكونتەنت مونتاجدالاتىن بولمە رەتكە كەلتىرىلەدى. بۇل بولىگى تەاتردىڭ ىرگەتاسى قالانعالى 100 جىلدان بەرى جوندەۋ كورمەگەن. قازىرگى تاڭدا كونكۋرستىق شارالار وتۋدە. جوندەۋ جۇمىستارى مەرەكەدەن كەيىن باستالادى جانە قويىلىمدارعا كەدەرگى بولمايدى.