كەشە, ياعني 27 ءساۋىر كۇنى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ كوروناۆيرۋس ىندەتىنە بايلانىستى ۇندەۋ جاريالاعان بولاتىن. مەملەكەت باسشىسىنىڭ ۇندەۋىندە ايتىلعان مىندەتتەردى جۇزەگە اسىرۋ ماقساتىندا جامبىل وبلىسىنىڭ اكىمى بەردىبەك ساپارباەۆتىڭ توراعالىعىمەن وڭىرلىك جەدەل شتابتىڭ كەزەكتى وتىرىسى ءوتتى.
بۇگىنگى تاڭدا وبلىستا كوروناۆيرۋستىڭ 100-دەن استام جاعدايى تىركەلگەن بولسا, ونىڭ 43-ءى ەمدەلىپ شىققان. مۇنداعى نەگىزگى مىندەت – ناۋقاستاردىڭ سانىن كوبەيتىپ الماس ءۇشىن قاتاڭ باقىلاۋدى بوساڭسىتپاۋ ەكەنى دە ايتىلدى.
باسقوسۋدا وبلىستىق جەدەل شتابتىڭ توراعاسى, وبلىس اكىمى بەردىبەك ساپارباەۆ اۋەلى مەديتسينا جانە پوليتسيا قىزمەتكەرلەرى ءوتۋى ءتيىس COVID-19 بويىنشا تەستتەردىڭ سانىن ارتتىرۋ كەرەكتىگىن اتاپ ءوتتى. وسى ۋاقىتقا دەيىن 261 مىڭنان استام جامبىلدىق جالپى سوماسى 11,5 ميلليارد تەڭگە بولاتىن 42 500 تەڭگە كولەمىندەگى الەۋمەتتىك تولەمگە قول جەتكىزگەن. ال, 77 مىڭ ادام 440 ميلليون تەڭگەگە ازىق-ت ۇلىك جيىنتىعىن العان. سونىمەن قاتار, ء«بىز بىرگەمىز!» اكتسياسى اياسىندا 834 ميلليون تەڭگە جينالىپ, وعان 17مىڭنان استام ادام قامتىلعان بولسا, 2 مىڭ دارىگەرلەر مەن پوليتسيا قىزمەتكەرلەرىنە 210 ميلليون تەڭگەگە ۇستەماقى مەن سىياقىلار تولەنگەن. «جۇمىسىن باستايتىن شاعىن جانە ورتا كاسىپورىنداردىڭ ءتىزىمىن جاساۋ كەرەك. ولارعا جۇمىسىن قايتا باستاۋ ءۇشىن رۇقسات تەك قاۋىپسىزدىك تەحنيكاسى مەن سانيتارلىق تالاپتاردى ساقتاي الاتىندىعىن دالەلدەي العاندا عانا بەرىلەدى. ولاردىڭ ساقتالۋىن باقىلاۋ اۋدان اكىمدەرىنە جۇكتەلەدى», دەدى بەردىبەك ساپارباەۆ. سونداي-اق, كۇنىنە كەمىندە ەكى رەت دەزينفەكتسيالاۋ جانە قورعانىس كوستيۋمدەرى مەن بەتپەردەلەرىنىڭ بولۋى باستى نازارعا الىنادى. ۇسىنىلعان شاعىن جانە ورتا كاسىپورىندار تىزىمىنەن شاشتارازدار مەن سۇلۋلىق سالوندارىن الىپ تاستاۋ تۋرالى شەشىم قابىلداندى. سەبەبى, وندا ادامداردىڭ ءجيى بايلانىستا بولۋى مۇمكىن جانە سانيتارلىق تالاپتاردىڭ ورىندالۋى قيىن. الايدا, قىزمەت كورسەتۋ ستانتسيالارى, اۆتوجۋ, ازىق-ت ۇلىك ەمەس دۇكەندەر جانە باسقا دا نىساندار ءوز جۇمىسىن باستايدى. ال, مەيرامحانالار مەن كافەلەر ءالى دە جەتكىزىپ بەرۋ رەجيمىندە قىزمەت ەتە بەرەدى.
جيىندا جاعدايى تومەن, كوپبالالى وتباسىلاردىڭ بىرەۋى قامقورلىقسىز قالماس ءۇشىن بەلسەندى دەمەۋشىلەردى تارتۋدى جالعاستىرا بەرۋ قاجەتتىگى دە ايتىلدى. بۇل رەتتە بەردىبەك ساپارباەۆ «ۇيلەستىرۋ كەڭسەسىندەگى جانە الەۋمەتتىك باعدارلامالارداعى بارلىق تىزىمدەردى تەكسەرىڭىزدەر. كومەككە مۇقتاج كەز كەلگەن ادام كومەك الۋى ءتيىس», دەپ اتاپ ءوتتى. مەملەكەت باسشىسىنىڭ تاپسىرماسىنا سايكەس, 42 500 تەڭگە مولشەرىندەگى الەۋمەتتىك تولەمدەردى ەكىنشى قايتارا تولەۋ شارالارىن, كوممۋنالدىق شىعىنداردى وتەۋ ءۇشىن 15 مىڭ تەڭگەنى راسىمدەۋدى ۇتىمدى ۇيىمداستىرا ءبىلۋ قاجەتتىگى دە ايتىلدى. سونىمەن قاتار, ۇلى جەڭىس كۇنى قارساڭىندا ارداگەرلەر مەن ولارعا تەڭەستىرىلگەندەر ءتيىستى تولەمدەردى قول جەتكىزەدى. وبلىستاعى سوعىسقا قاتىسقان 57 ارداگەرگە 1 ميلليون تەڭگەدەن بەرىلىپ, ولاردى قالا جانە اۋدان اكىمدەرى ارنايى بارىپ قۇتتىقتايتىن بولادى. سونىمەن قاتار, جيىندا ءتيىستى ورىندار الەۋمەتتىك جەلىلەردە جالعان اقپاراتتار تاراتىپ, قوعامدا دۇرلىگۋ تۋعىزاتىن تۇلعالاردى انىقتاۋ جونىندەگى جۇمىستى جانداندىرا ءتۇسۋدىڭ ماڭىزدىلىعى دا قارالدى. «مەملەكەت باسشىسى ايتقانداي, 11 مامىرعا دەيىن ەل ەكونوميكاسىن قالپىنا كەلتىرۋدىڭ كەشەندى جوسپارى تۇزىلەدى. وسى ورايدا جامبىل وبلىسى دا 7 مامىرعا دەيىن ءوز نۇسقاسىن ازىرلەپ, ۇكىمەتكە ۇسىنۋى كەرەك. شەكتەۋ شارالارىن ەنگىزۋ ايماقتىق ەكونوميكاعا قاي دەڭگەيدە اسەر ەتەتىنى, قانداي شارالار كوپ زارداپ شەگەدى, قاي جەرلەردە تابىستىڭ تومەندەۋى, جۇمىسسىزدىق دەڭگەيى ارتاتىنى تۋرالى بولجام جاساۋ قاجەت. باستاپقى بولجامدارعا سايكەس, بۇل ساۋدا, كاسىپكەرلىك, مادەنيەت, ونەر جانە سپورت سالالارى. وسىعان وراي, 30 ساۋىرگە دەيىن اۋماقتىق جۇمىسپەن قامتۋدىڭ جول كارتاسىن ازىرلەۋ قاجەت. نەگىزگى ماقسات – كەمىندە 26 مىڭ, ونىڭ ىشىندە 11 مىڭ تۇراقتى جۇمىس ورنىن قۇرۋ, جۇمىس ورىندارىنىڭ جاپپاي بوساۋىنا جول بەرمەۋ. ەڭ باستىسى – ءتارتىپتى ساقتاۋ, ءار ادام ءوز تاعدىرى ءۇشىن عانا ەمەس, سونىمەن بىرگە جاقىن جانە اينالاسىنداعى ادامداردىڭ تاعدىرى ءۇشىن دە جاۋاپكەرشىلىكتى سەزىنۋى ءتيىس», دەدى بەردىبەك ساپارباەۆ.
جامبىل وبلىسى