قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى باسقارماسىنىڭ مالىمەتتەرى بويىنشا, وتكەن جىلى تۇركىستان وبلىسى اۋماعىندا سىبايلاس جەمقورلىق قىلمىسى بويىنشا 82 ادام كۇدىكتى دەپ تانىلعان. ونىڭ 48-ءى اۋماقتىق مەملەكەتتىك, قۇقىق قورعاۋ جانە وزگە دە ورگانداردىڭ قىزمەتكەرلەرىنە قاتىستى, 34-ءى جەرگىلىكتى اتقارۋشى ورگانداردىڭ قىزمەتكەرى.
مۇنداي كەلەڭسىزدىككە بيىل جول بەرىلمەۋى ءتيىس. قول استىنداعى قىزمەتكەر جەمقورلىق جاساسا ءبىرىنشى باسشى جۇمىستان كەتۋ جونىندە ءوتىنىش جازۋعا مىندەتتى ەكەنى دە ءوز ىقپالىن تيگىزەرى انىق. ەلىمىزدىڭ مەملەكەتتىك قىزمەت جانە سىبايلاس جەمقورلىققا قارسى ءىس-قيمىل تۋرالى زاڭدارىنا ەنگىزىلگەن وزگەرىستەر مەن تولىقتىرۋلار تۋرالى وبلىس اكىمى ومىرزاق شوكەەۆتىڭ توراعالىعىمەن وتكەن تۇركىستان وبلىسى اكىمدىگى جانىنداعى سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ ونلاين رەجيمدەگى وتىرىسىندا ايتىلدى. كوميسسيا مۇشەلەرىنەن بولەك بارلىق اۋدان, قالا اكىمدەرى مەن باسقارما باسشىلارى جيىنعا بەينە-بايلانىس ارقىلى قاتىستى. وتىرىستا وتكەن جىلى اتقارىلعان جۇمىس قورىتىندىلانىپ, 2020 جىلعا جۇمىس جوسپارى قۇرىلدى.
«تۇركىستان-ادالدىق الاڭى» جوباسى اياسىندا وڭىردە اۋقىمدى شارالار ىسكە اسىرىلۋدا. سىبايلاس جەمقورلىققا قارسى ءىس-قيمىل اگەنتتىگى تۇركىستان وبلىسى بويىنشا دەپارتامەنتىنىڭ باسشىسى حاكيم كوشقاليەۆ جانە وسى سالاعا جاۋاپتى باسشىلار اتقارىلعان ىستەر, زاڭعا ەنگىزىلگەن وزگەرتۋلەر مەن تولىقتىرۋلار بويىنشا بايانداما جاسادى. پرەزيدەنت قاسىم-جومارت توقاەۆتىڭ جەمقورلىققا توزبەيتىن قوعام قالىپتاستىرۋ ءۇشىن ۇسىنعان مىندەتتەرى ءتۇسىندىرىلدى. وتىرىستى قورىتىندىلاعان وبلىس اكىمى كوميسسيا مۇشەلەرىنىڭ نازارىن سىبايلاس جەمقورلىققا قارسى كۇرەس جۇمىسىندا جىبەرىلگەن كەمشىلىكتەردىڭ بىرسارىندىلىعىنا جانە ازاماتتىق قوعام ينستيتۋتتارىمەن تىعىز قارىم-قاتىناستى قامتاماسىز ەتۋگە اۋداردى.