تۇركىستان وڭىرىندە مەملەكەت باسشىسى قاسىم-جومارت توقاەۆتىڭ اسكەري مىندەتتىلەردى ارناۋلى جيىندارعا شاقىرۋ تۋرالى جارلىعىنان كەيىن ەرىكتى اسكەري جاساقتا قىزمەت ەتكىسى كەلەتىندەر قاتارى كوپ بولدى. ول زاڭدى دا. ەلىمىزدىڭ قاۋىپسىزدىگى, بولاشاعى ءۇشىن مۇنداي كەزەڭدە اركىمنىڭ ازاماتتىق بەلسەندىلىگى ماڭىزدى, پەرزەنتتىك پارىزى مىندەتتى.
وبلىس اكىمى ومىرزاق شوكەەۆتىڭ قاۋلىسىنا سايكەس, وڭىردە ەلىمىزدىڭ قارۋلى كۇشتەرىنىڭ اۋماقتىق اسكەرىن جاساقتاۋعا 230 ازامات شاقىرىلعان. ونىڭ ىشىندە وبلىس ورتالىعى تۇركىستان قالاسىنداعى 50 ساربازدان تۇراتىن اسكەريلەر جاساعىن قالا اكىمى راشيد ايۋپوۆ باسقارادى. وبلىستا بارلىق اسكەري قۇرىلىم توتەنشە جاعدايمەن كۇرەسۋگە جۇمىلدىرىلعان. دەسەك تە قاۋىپتى كەزەڭدە ءالى دە قوسىمشا كۇش كەرەك. نەگىزگى ماقساتى حالىقتىڭ قاۋىپسىزدىگى مەن دەنساۋلىعىن قورعاۋ جانە قامتاماسىز ەتۋ بولىپ تابىلاتىن اسكەري جاساق قاتارىنا ەڭ ۇزدىكتەر تاڭدالعان. وبلىس اكىمى ومىرزاق شوكەەۆ سىن ساعاتتا ارنايى جيىنعا شاقىرىلعان ازاماتتارعا ساتتىلىك تىلەدى. وسىلايشا كوشەلەردە جاياۋ باقىلاۋ جۇرگىزۋگە جانە وبلىس اۋماعىندا قويىلعان بلوك-بەكەتتەردە قىزمەت اتقارىپ, زارارسىزداندىرۋ جۇمىستارىنا قاتىساتىن ارنايى جاساقتالعان ساربازدار ىسكە كىرىستى. جيىنعا شاقىرىلعانداردىڭ جۇمىس ورىندارى ساقتالادى. جالاقىلارى بويىنشا دا ولار ۇتىلمايدى. باسقا وڭىرگە ەمەس, اركىم وزدەرىنىڭ تۇرعىلىقتى اۋماقتارىندا جۇمىس ىستەپ, جالاقى الادى. كۇندەلىكتى جۇمىسقا بارىپ, كەشكىسىن وتباسىنا ورالادى. ياعني, اسكەري جيىنعا شاقىرىلاتىندارعا جاعداي جاسالعان.
تۇركىستان وبلىسى