پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا «جول ينفراقۇرىلىمىنىڭ ساپاسىن ارتتىرۋ» ماسەلەسىنە ارنالعان ءباسپاسوز ماسليحاتى ءوتتى.
بىلتىر ينفراقۇرىلىمدى دامىتۋدىڭ 2015-2019 جىلدارعا ارنالعان «نۇرلى جول» مەملەكەتتىك باعدارلاماسى اياسىنداعى جۇمىستار تولىعىمەن اياقتالعان بولاتىن. ناتيجەسىندە اۆتوموبيل جولدارىنىڭ 3 مىڭ شاقىرىمى قايتا جاڭارتىلىپ, 10 مىڭ شاقىرىمى جوندەلگەن ەدى. ال بيىل 4 مىڭ شاقىرىم جول قۇرىلىسى ىسكە اسپاق.
– جولداردىڭ 682 شاقىرىمىنا تولەم الۋ جۇيەسى ەنگىزىلدى. اۆتوموبيل جولدارى سالاسىنداعى جۇمىستارعا 100 مىڭعا جۋىق ادام جۇمىلدىرىلدى. سونىمەن قاتار, جەرگىلىكتى ماڭىزى بار جولداردىڭ 15 مىڭ شاقىرىمى جوندەلدى. اتالعان شارالار جاقسى جانە قاناعاتتاندىرارلىق جاعدايداعى رەسپۋبليكالىق ماڭىزى بار اۆتوموبيل جولدارىنىڭ ۇلەسىن 88%-عا دەيىن جەتكىزۋگە مۇمكىندىك بەردى. سونىڭ ناتيجەسىندە, جەرگىلىكتى تاس جولداردىڭ ۇلەسى 71%-عا دەيىن ارتتى. ءى-ءىى تەحنيكالىق ساناتتاعى كولىك جولدارىنىڭ ۇزىندىعى 8,2 مىڭ شاقىرىمعا ۇلعايدى, – دەدى يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ توراعاسى سايرانبەك بارماقوۆ.
ايتالىق, بىلتىر ۇكىمەت قاۋلىسىمەن ينفراقۇرىلىمدى دامىتۋدىڭ 2020-2025 جىلدارعا ارنالعان «نۇرلى جول» مەملەكەتتىك باعدارلاماسى بەكىتىلگەن بولاتىن. باعدارلاما اياسىندا الداعى 6 جىلدا 10 مىڭ شاقىرىم جولدى سالۋ جانە رەكونسترۋكتسيالاۋ, رەسپۋبليكالىق جەلىدەگى 11 مىڭ شاقىرىم اۆتوموبيل جولىن كۇردەلى جانە ورتاشا جوندەۋدەن وتكىزۋ جوسپارلانعان. بۇعان مەملەكەت جالپى كولەمى 3,5 ترلن تەڭگە بولگەن ەدى.
س. بارماقوۆتىڭ ايتۋىنشا, ەلىمىزدەگى ساپالى جولداردىڭ ۇزىندىعى 60%-عا وسەدى. سونىمەن قاتار, ەلباسىنىڭ ەل وڭىرلەرىن كولىكتىك ينفراقۇرىلىممەن قامتاماسىز ەتۋ قاجەتتىگى جونىندەگى تاپسىرماسىنا سايكەس جەرگىلىكتى جولداردىڭ 27 مىڭنان استام شاقىرىمى جوندەلەدى. بۇل وبلىستىق جانە اۋداندىق ماڭىزى بار جولداردىڭ 95% پايىزىن جاقسى جاعدايعا جەتكىزۋگە مۇمكىندىك بەرمەك.
ءباسپاسوز ماسليحاتى بارىسىندا «QazAvtoJol» ۇك» اق باسقارما توراعاسى ۇلان ءالىپوۆ تاعى دا بىرنەشە قالاارالىق جولدارعا تولەم الۋ جۇيەسى ەنگىزىلەتىنىن ايتتى.
– «Computer Vision Technologies» جشس باسقاراتىن كونسورتسيۋممەن 11 مىڭ شاقىرىم جولدا تولەم الۋ جۇيەسىن ورناتۋ جانە ونى كۇتىپ ۇستاۋ جونىندەگى كەلىسىمگە قول قويىلدى. جوبا قۇنى 138,8 ملرد تەڭگەنى قۇرايدى. كەلىسىم اياسىندا رەكونسترۋكتسيادان وتكەن 5,7 مىڭ شاقىرىم جول اقىلى بولادى دەپ جوسپارلانۋدا – دەدى ول.
ايتا كەتەيىك, ناۋرىز ايىندا وڭتۇستىك وڭىرلەردە قۇرىلىس-مونتاج جۇمىستارى باستالدى. اۋا-رايىنىڭ قولايلى جاعدايى ورناعاندا جۇمىستار سولتۇستىك وڭىرلەرگە قاراي اۋىپ, ءساۋىر ايىنىڭ سوڭىنا دەيىن جولشىلار بارلىق جوبالار اياسىنداعى قۇرىلىس جۇمىستارىنا كىرىسەتىن بولادى. قۇرىلىس الاڭىندا مامانداردى كورونوۆيرۋستان قورعاۋعا قاجەتتى شارالار قابىلدانعان.