تۇركىستان وبلىسىندا ىندەتتىڭ تارالۋىنا توسقاۋىل قويۋ ماقساتىندا دەزينفەكتسيالىق جۇمىستار كۇشەيتىلگەن رەجيمدە جۇرگىزىلۋدە. تەك وبلىس ورتالىعىنىڭ وزىندە بۇگىنگە دەيىن 1 ملن شارشى مەترگە جۋىق جەر, ياعني 557 نىسان تولىق تازالانىپ, زالالسىزداندىرىلعان.
جولدار, اياقجولدار, ايالدامالار, ساۋدا دۇكەندەرىنىڭ سىرتقى ايماقتارىندا دەزينفەكتسيالىق وڭدەۋ جۇمىستارى جۇيەلى جۇرگىزىلۋدە. قالا اۋماعى 17 سەكتورعا ءبولىنىپ, زالالسىزداندىرۋ جۇمىستارىنىڭ كولەمى مەن نىساندارى ناقتىلانعان. ارنايى رۇقساتى بار 4 دەزينفەكتسيالاۋ ءبولىمى بارلىق نىسانداردا جاپپاي تازارتۋ جۇمىستارىن اتقارۋدا. اۆتوبۋس ايالدامالارىن ارنايى نۇسقاۋلىقتان وتكەن بريگادالار زالالسىزداندىرۋدا. تۇرعىن ۇيلەردىڭ كىرەبەرىستەرى مەن اۋلالارى كەستەگە سايكەس تازالانۋدا.
سونداي-اق وڭىردەگى اۋرۋحانالاردا زالالسىزداندىرۋ وتكەلدەرى ورناتىلدى. دەزينفەكتسيالىق ءدالىز قابىلداۋ جانە بوسانۋ بولىمدەرىنىڭ كىرەبەرىستەرىنە قويىلعان. قىزمەتكەرلەر جانە ناۋقاستار عيماراتقا كىرۋ ءۇشىن سول جەردەن وتەدى. جالپى, وبلىستاعى مەديتسينالىق ۇيىمداردا COVID-19 ينفەكتسياسىمەن كۇرەس جۇمىستارى بارىنشا قولعا الىنعان.
تۇركىستان وبلىسى