قازاقستاندا توتەنشە جاعدايعا بايلانىستى حقو جۇمىسى ۋاقىتشا توقتاتىلعالى بەرى 10 مىڭنان استام ايەل جۇكتىلىك پەن بوسانۋىنا بايلانىستى تابىسىنان ايىرىلۋ تولەمىن, 20 مىڭ وتباسى بالانىڭ تۋىلۋىنا جانە ونىڭ ءبىر جاسقا دەيىنگى كۇتىمىنە بەرىلەتىن جاردەماقىنى ونلاين راسىمدەگەن.
«ازاماتتارعا ارنالعان ۇكىمەت» مەملەكەتتىك كورپوراتسياسى بۇرىن تەك حقو ارقىلى كورسەتىلگەن قىزمەتتەر, ونىڭ ىشىندە جۇكتىلىككە بايلانىستى جاردەماقى بويىنشا وتىنىشتەردى پورتالداعى «ەلەكتروندى وتىنىشتەر» سەرۆيسى ارقىلى قابىلداۋ مۇمكىندىگىن جاسادى.
دەكرەت دەمالىسىنا شىققان جۇكتى ايەلدەر egov.kz پورتالىندا اۆتوريزاتسيادان ءوتىپ, «ەلەكتروندى وتىنىشتەر» سەرۆيسىن تاڭداپ, جەكە قۇجاتى مەن جۇمىس ىستەۋ قابىلەتىنەن ايىرىلۋ پاراعىنىڭ سكان كوشىرمەسىن جانە تولەم اۋدارىلۋى ءتيىس بانك شوتىن قوسا جولداۋى ءتيىس.
ەندى عانا بالالى بولعان وتباسىلار ءۇشىن egov.kz پورتالىنىڭ «وتباسى» – «بالا» بولىمىندە بالانىڭ تۋىلۋىنا جانە ونىڭ كۇتىمىنە بايلانىستى جاردەماقىلاردى راسىمدەۋ مۇمكىندىگى بار.
ايتا كەتەيىك, پورتالدى پايدالانۋ ءۇشىن ەتسق بولۋى شارت. ەلەكتروندى تسيفرلىق قولتاڭبانى بۇگىندە پورتالدا قاشىقتان راسىمدەۋگە بولادى.
سونداي-اق ءموبيلدى ازاماتتار بازاسىندا تىركەۋى بار جاس انالار پرواكتيۆ قىزمەتىن پايدالانا الادى. ول ارقىلى بالانىڭ تۋىن تىركەپ, ءتيىستى جاردەماقىنى راسىمدەپ, ءسابيدى بالاباقشا كەزەگىنە قويۋعا بولادى