كارانتين جاعدايىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ بيوتەحنولوگيا كافەدراسىنىڭ وقىتۋشىلارى قاشىقتىقتان ءبىلىم بەرۋ تەحنولوگيالارى مەن ستريمينگتىك وقىتۋدى بەلسەندى قولدانۋدا. ولار ءوز تاجىريبەسىمەن قازاقستاننىڭ باسقا جوعارى وقۋ ورىندارىنداعى ارىپتەستەرىمەن ءبولىسىپ وتىر.
كافەدرا مەڭگەرۋشىسى ايدا قىستاۋباەۆانىڭ پىكىرىنشە, ۋنيۆەرسيتەتتەگى IT ينفراقۇرىلىمى, «Univer» جۇيەسى, سونداي-اق «Moodle», «edX» مووس پلاتفورمالارى قاشىقتىقتان وقىتۋعا كەدەرگىسىز ءارى جەدەل وتۋگە مۇمكىندىك بەرگەن. وقىتۋشىلار قىسقا ۋاقىت ىشىندە دارىستەر كونتەنتىن, سەمينارلىق جانە زەرتحانالىق ساباقتاردى قاشىقتىقتان وتەتىن فورماتقا بەيىمدەپ, وزدەرىنىڭ جوعارى IT قۇزىرەتتىلىگىن كورسەتە ءبىلدى. ساباق قازاق, اعىلشىن جانە ورىس تىلدەرىندە وتەدى. كەستە وزگەرىسسىز قالدى.
وقۋ ۇدەرىسى «Zoom», «Microsoftteams», «Googlemeet» سياقتى باسقا دا ءارتۇرلى پلاتفورمالاردىڭ كومەگىمەن جۇزەگە اسىرىلۋدا. سونىمەن قاتار, بيوتەحنولوگيا كافەدراسىنىڭ وقىتۋشىلارى تەك ستريمينگ جۇيەسىندە عانا ەمەس, سونىمەن قاتار چات ساباقتارى, ءبىلىم بەرۋ ويىندارى, «Kahoot» قوسىمشاسىنداعى ديالوگتىق ترەناجەرلەر, انيماتسيالىق ينفوگرافيكانى قولداناتىن ينتەراكتيۆتى ساباقتار وتكىزەدى.
بۇگىنگى كۇنى بۇقارالىق اشىق ونلاين كۋرستارعا دەگەن سۇرانىس ارتتى. «بيوتەحنولوگيا نەگىزدەرى» ونلاين كۋرستارىنان 239 تىڭداۋشى وقۋدان ءوتتى. ا. قىستاۋباەۆا حابارلاعانىنداي, جاقىن ارادا «edX» پلاتفورماسىنا ميكروبيولوگيا, بيوحيميا جانەەكولوگيالىق بيوتەحنولوگيا بويىنشا الداعى وقۋ جىلىنا ارنالعان بىرقاتار بەينەساباقتاردى جازۋ جوسپارلانۋدا. وسى بەينە-ساباقتارعا ارنالعان كونتەنتتى وقىتۋشىلار ازىرلەپ جاتىر. قازىرگى تاڭدا بيولوگيا جانە بيوتەحنولوگيا فاكۋلتەتىندە مولەكۋلالىق بيولوگيا, بيوفيزيكا جانە زوولوگيا بويىنشا «Coursera» جانە «edX» پلاتفورمالارىنا ارنالعان دارىستەر جازىلۋدا.
الماتى