بۇگىن, 15 ءساۋىر – قوزى كورپەش – بايان سۇلۋ كۇنىدەسەدى. «ازاماتتارعا ارنالعان ۇكىمەت» مەملەكەتتىك كورپوراتسياسى تالاي جاستىڭ ماحابباتىنىڭ كۋاسى بولىپ, جاس شاڭىراقتاردىڭ قاتارىن كوبەيتۋگە ءوز ۇلەسىن قوسىپ كەلە جاتقان تاماشا ءبىر مەكەمە.
ولاي دەيتىنىمىز, الماتى قالاسى فيليالىنىڭ وزىندە, ونىڭ بارلىق اۋداندارىنداعى فرونت-وفيستەرى مەن بەك-وفيستەرىندە, مامانداندىرىلعان حقو-لارىندا 2 مىڭعا جۋىق مامان ىستەيدى. ونىڭ 70 پايىزى جاستار. جوعارى وقۋ ورنىندارى مەن كوللەدجدەردەن ماماندىق العان جاستار, ەڭبەك جولىن حقو-لاردا باستاپ جاتادى. ارينە, وتباسىلىق ومىرلەرى دە وسى جەردەن باستالاتىندار از ەمەس.
وعان دالەل, جىل سايىن الماتى فيليالىنىڭ وزىندە 25-30 وتباسى قۇرىلىپ جاتادى. وسى جىلى دا ماحابباتتىڭ قۇدىرەت كۇشىمەن, كارانتينگە دەيىن باس قۇراپ, وتاۋ تىگىپ ۇلگەرگەندەر بار.
ۇيدە دە, جۇمىستا دا بىرگە جۇبىن جازباي, بىرگە ءومىر ءسۇرىپ كەلە جاتقان جۇپتارعا ماحاببات مەرەكەسىندە حابارلاسىپ, كارانتين كەزىندەگى حال-جايىن سۇراعان ەدىك.
ءبىرىنشى جۇپ – ءامىرحان اقىلبەك بەك قاسىم التىناي
ءامىرحان اقىلبەك پەن قاسىم التىناي تۇركسىب اۋداندىق فرونت-ءوفيسىنىڭ ماماندارى. ەكەۋى جاقىندا عانا شاڭىراق كوتەرگەن جاس وتباسى. بۇگىندە ەكەۋى دە قاشىقتان قىزمەت كورسەتىپ, 1414 ءنومىرى ارقىلى كەڭەس بەرىپ وتىر.
فرونت-وفيس باسشىسى ارايلىم ايجانوۆا دا ەكى جاس تۋرالى «ەكەۋى دە العىر, ءبىلىمدى, ەلگەزەك, تاربيەلى جاندار» دەپ جىلى پىكىرىن ءبىلدىردى. ال, جاستار بولسا, ۇيدە وتىرىپ جۇمىس ىستەپ جاتقانىنا ەش وكىنبەيتىندەرىن, جۇمىستارى بىردەي بولعاندىقتان, ءبىرىن-ءبىرى تولىقتىرىپ, حالىققا قىزمەتىن قاشىقتىقتان دا ەش كەدەرگىسىز كورسەتىپ جاتقانىن ايتادى.
ەكىنشى جۇپ – كازانگاپوۆ رۋسلان مەن كينادينوۆا كوركەم
ەكىنشى ءبىر جۇپ تا جاقىندا شاڭىراق قۇرعان. كازانگاپوۆ رۋسلان مامانداندىرىلعان حقو-دا IT-مامانى, ال جولداسى كينادينوۆا كوركەم جيناقتاۋ سەكتورىنىڭ مامانى. تانىسقاندارىنا 10 جىلدىڭ ءجۇزى بولىپتى... كوركەم ءوزىنىڭ مەكتەپتەن باستالعان ماحاببات حيكاياسىن بىلاي ەسكە الدى.
– ونىنشى سىنىپتا وقىپ جۇرگەن كەزىم. جازدىڭ ءبىر شۋاقتى كۇنى سىنىپتاستارىممەن قىدىرىپ, كولگە بارعانبىز. رۋسلان دا دوستارىمەن سول جەردە ءجۇر ەكەن. كولدىڭ تەرەڭ ەمەس ءبىر جەرىندە شومىلىپ جۇرگەن ماعان بەيتانىس جىگىت كەلىپ, «بۇل جەرگە شوشقالاردى شومىلدىرادى. ءجۇر, مەن سەنى ورتاسىنا قاراي اپارايىن» دەپ ازىلدەدى. مەن وعان اشۋلانىپ, ءمان بەرمەي كەتىپ قالدىم. كەشكىسىن ماعان اگەنتتەن جازىپ تۇر «مەن عوي كولدەگى كەزدەسكەن جىگىت. ۇستىڭنەن شوشقانىڭ ءيسى شىعىپ تۇرعان جوق پا؟» دەپ تاعى دا اشۋىما ءتيىپ. سويتسەم, ول مەنىڭ كلاستاسىمنىڭ دوسىنىڭ دوسى بولىپ شىقتى. سول تانىستىعىمىز جىلدارعا سوزىلىپ, دوستىعىمىز ماحابباتقا ۇلاسىپ, ەندى وتاۋ قۇردىق», – دەيدى كوركەم.
وتباسىن قۇرۋعا كوپ جىلدىق دايىندىقپەن كەلگەن ەكى جاس, قازاقتىڭ بارلىق جول-جوسىعىمەن, سالت-داستۇرىمەن شاڭىراق كوتەرىپتى. الماتىلىق ارۋعا ماڭعىستاۋلىق رۋسلاننىڭ وتباسى سىرعا سالىپ, قۇدا ءتۇسىپ, كوركەم قولدان ۇزاتىلىپ, قۇدا ءتۇسۋدىڭ بۇكىل ءسان-سالتاناتى جاسالعان. جوعارى ءبىلىم الىپ, ماماندىق العان ەكەۋى بىرگە ءبىر مەكەمەگە جۇمىسقا كەلگەن.
بۇگىندە كوركەم ۇيدە وتىرىپ ونلاين قىزمەت كورسەتسە, رۋسلان كەڭسەگە بارىپ ءجۇر. ويتكەنى IT-مامانى ۇيدە وتىرىپ قىزمەت كورسەتەتىن ەمەس. ونىڭ كومەگى كەڭسەدەگى كولل-ورتالىققا كوبىرەك كەرەك.
ەندى جاس وتباسى تۇڭعىشتارىن كۇتىپ جۇرگەنىن ايتادى.
ءۇشىنشى جۇپ – باۋىرجان بەكپاەۆ پەن شىنار مولداحانوۆا
باۋىرجان بەكپاەۆ, الاتاۋ فرونت-ءوفيسىنىڭ مامانى, كولل-ورتالىققا جاڭادان بەيىمدەلگەن وپەراتورلاردىڭ ءبىرى. ول حقكو-دا 10 جىلدان بەرى جۇمىس ىستەيدى. جارى – شىنار مولداحانوۆا دا سەگىزىنشى جىل المالى اۋداندىق حقكو-دا جۇمىس ىستەيدى.
ولاردىڭ تاعدىرىن مەدەۋ اۋداندىق حقكو بايلانىستىردى دەۋگە بولادى.سول جەردە جۇمىس ىستەي ءجۇرىپ تانىستى. تانىستىق, دوستىق سوڭى ماحابباتقا ۇلاستى. وسىدان 6 جىل شاڭىراق كوتەرىپ, سودان بەرى قۋانىشتا دا, قيىندىقتا دا بىرگە. دۇنيەگە ەكى قىزدارى كەلدى. قازىرگى ۋاقىتتا ولار بارلىعى ۇيدە بىرگە. باۋىرجان پەن شىنار ازاماتتارعا ونلاين-كەڭەس بەرەدى. شىناردىڭ جۇمىسى 9-دان 16-عا دەيىن باستالادى, ال باۋىرجاننىڭ جۇمىسى 13-تەن 20-عا دەيىن باستالادى. بوس ۋاقىتىندا بالالارعا كەزەكپەن كوڭىل بولەدى.
«وتە مازاسىز جۇمىس. ءوز سوزدەرىمىزگە مۇقيات بولىپ جاۋاپ بەرۋىمىز كەرەك. نەشە ءتۇرلى سۇراقتار قويىپ جاتادى. ماسەلەن, بىرەۋ «كوشەدە قالاي سەرۋەندەۋگە بولادى؟ بۇل ءۇشىن ۋچاسكەلىك ينسپەكتوردان رۇقسات سۇراۋ كەرەك پە؟» دەپ سۇراسا, تاعى ءبىرى «كارانتين كەزىندە ۇيدە جوندەۋ جۇمىستارىن جۇرگىزۋگە بولادى ما؟...» دەيدى. وسى سياقتى بىزگە قاتىسى جوق سقراقتارمەن دە ۋاقىتىمىزدى الاتىندار كوپ. قالاي بولعاندا دا, باستى مىندەت – جەلىنىڭ ارعى جاعىنداعى ادامعا كومەكتەسۋ», – دەيدى ول.
ازاماتتارعا ارنالعان ۇكىمەتتىڭ الماتى فيليالىنداعى ماحاببات تابىستىرعان جۇپتاردىڭ بۇگىنگى تىرشىلىگى وسىلاي وتۋدە. ماحابباتتىڭ سيمۆولى بولعان قوزى كورپەش – بايان سۇلۋ كۇنىندە جاس جۇبايلاردىڭ شاڭىراقتارىنا شاتتىق, وتباستارىنا امانشىلىق تىلەيمىز!