كەشە «مۇگەدەك جاستار قوعامى» بىرلەستىگىنىڭ ۇيىمداستىرۋىمەن «Pingwin Friends» عيماراتىندا بوۋلينگتەن «ناۋرىز-2026» ءتۋرنيرى ءوتتى. وعان مۇگەدەكتىگى بار ادامداردىڭ 3 قوعامدىق ۇيىمى قاتىستى. (قالادا جالپى 7 كوماندا بار). ناۋرىز مەرەكەسى اياسىندا وتكەن اتالعان جارىس سپورتتىڭ جاڭا ءتۇرىن دامىتۋدى كوزدەيدى, دەپ جازادى Egemen.kz.
استانا قالالىق «مۇگەدەك جاستار قوعامى» بىرلەستىگى 21 جىلدان استام جۇمىس ىستەپ كەلەدى. اتالعان قوعامدىق بىرلەستىك وسىنداي ءىس-شارالاردى استانا قالاسى اكىمدىگىنىڭ, اتاپ ايتقاندا, دەنە شىنىقتىرۋ جانە سپورت باسقارماسى مەن سپورتتىق-بۇقارالىق ءىس-شارالاردى وتكىزۋ ديرەكتسياسىنىڭ قولداۋىنىڭ جانە كاسىپكەرلەر مەن بيزنەس وكىلدەرىنىڭ قولداۋىمەن جوعارى دەڭگەيدە وتكىزىپ ءجۇر.
جارىس قورىتىندىسى بويىنشا ءبىرىنشى ورىندى «چۋۆستۆۋيا جيزن» بالالار ورتالىعى جەڭىپ السا, ەكىنشى ورىندى TIFLOSMART يەلەندى, ال ءۇشىنشى ورىندى «مۇگەدەك جاستار قوعامى» بىرلەستىگى ەنشىلەدى. ء(تۋرنيردىڭ باس دەمەۋشىسى «كارتچەك وپت» جشس). كوماندالار ديپلومدارمەن جانە مەدالدارمەن ماراپاتتالدى.
ال كوماندا قۇرامىنداعى ءاربىر قاتىسۋشىعا شاعىن سىيلىقتار تابىستالدى.
«چۋۆستۆۋيا جيزن» بالالار ورتالىعى اتىنان تۋرنيرگە قاتىسۋشى 30 جاستاعى داليدا ءحاسان وز اسەرىن ءبولىستى.
«مەن ءبىرىنشى توپتاعى مۇگەدەكپىن. بۇعان دەيىن اتلەتيكامەن اينالىسىپ جۇرگەنمىن. قازىر بوۋلينگتى قاتار الىپ ءجۇرمىن. بوۋلينگكە 2 جىلدان بەرى قىزىعىپ, اي سايىن وتەتىن بوۋلينگ جارىستارىنان قالماۋعا تىرىسامىن. باستاپقى ۋاقىتتا دۇرىس ويناي المايتىن ەدىم, قازىر الدەقايدا جاقسى وينايمىن. بۇل سپورت ءتۇرى ادامنىڭ بۇلشىق ەتىن دامىتۋعا كومەكتەسەدى ءارى ۋاقىتىم وتە قىزىقتى وتەدى», دەدى ول.
داليدا دىلمۇراتقىزىنىڭ پىكىرىنشە, مۇمكىندىگى شەكتەۋلى جاندار ۇيدە وتىرىپ قالماۋى كەرەك.
«مۇگەدەك بولىپ قالعان باستاپقى كەزدە ۇيدەن مۇلدە شىقپايتىنمىن. وسىنداي قوعامدارعا كەلىپ, ويىندارعا قاتىسىپ, ءوزىمدى اشىپ, باسقا ادامداردى تاني باستادىم. جارىس بارىسىندا ادامدار ءبىر-بىرىمەن تانىسادى, جەتىستىكتەرىنە قۋانادى, ءبىر-بىرىنە دەمەۋ بولادى. سوندىقتان مۇمكىندىگى شەكتەۋلى جاندارعا قوعامنان قالماي, وسىنداي ويىندارعا قاتىسىپ جۇرۋگە كەڭەس بەرەمىن. مەنىڭ ومىرلىك ۇستانىمىم − ەشقاشان ەڭسەنى تۇسىرمەي, ءاردايىم جاقسىلىققا ۇمتىلۋ. وسى رەتتە بوۋلينگپەن اينالىسۋ ماعان وتە جاقسى اسەر ەتكەنىن ايتا كەتكىم كەلەدى», دەيدى د. حاسان.
اقمولا وبلىسىندا مۇمكىندىگى شەكتەۋلى جانداردىڭ جالاقىسىنان زاڭسىز سالىق ۇستالعان
استانا قالالىق «مۇگەدەك جاستار قوعامى» بىرلەستىگىنىڭ توراعاسى مۇرات ءابدىمومىنوۆ اتاپ وتكەندەي, مۇگەدەكتەر ورتاسىندا بوۋلينگتىك تۋرنيرلەر وتكىزۋدەگى ماقسات – جاستار مەن بالالاردى وسى سپورت تۇرىنە كوبىرەك تارتۋ.
«بوۋلينگ تۋرنيرلەرىمىز بۇرىن اي سايىن «دۋمان» ورتالىعىندا وتەتىن. ال, بۇل جەردە بۇگىن العاش رەت وتكىزىپ وتىرمىز. بوۋلينگ سپورتى بىزگە وتە قىزىق. بۇل ءتۋرنيردى وتكىزۋ يدەياسى 10 جىل بۇرىن پايدا بولدى. سەبەبى, باسقا سپورت تۇرلەرىنەن فەدەراتسيالار بار, ال بوۋلينگتەن مۇنداي فەدەراتسيا جوقتىڭ قاسى. سوندىقتان بوۋلينگتەن تۋرنيرلەر وتكىزۋ جاڭا سپورت ءتۇرىن دامىتۋ ماقساتىندا باستالدى. فەدەراتسيا اشىلسا, ءبىز استانادا عانا ەمەس, كوكشەتاۋدا, پاۆلوداردا, شىمكەنتتە, تارازدا, ءبىر سوزبەن ايتقاندا, بوۋلينگ تۋرنيرلەرىن بۇكىل قازاقستاندا وتكىزگىمىز كەلەدى», دەيدى مۇرات وسەرباي ۇلى.
ورالدا مۇمكىندىگى شەكتەۋلى جاندارعا ارنالعان زاماناۋي سپورت كەشەنى اشىلدى
م. ءابدىمومىنوۆتىڭ ايتۋىنشا, بيىل «مۇگەدەك جاستار قوعامى» بىرلەستىگى بوۋلينگتەن ءتۇرلى فورماتتا تۋرنيرلەر وتكىزۋدى جوسپارلاپ وتىر. العاشقى كەزەڭدەر استانا قالاسىنىڭ مۇمكىندىگى شەكتەۋلى ازاماتتارى اراسىندا وتسە, كەيىنگى جارىستار ينكليۋزيۆتى فورماتتا ۇيىمداستىرىلادى.
«ينكليۋزيۆتى تۋرنيرلەردە ءارتۇرلى ادامدار بىرگە وينايدى. كەيدە كوزدى جاۋىپ ويناۋعا بولادى. بۇل ەرەكشە تاجىريبە ادامنىڭ سەزىمىن دامىتادى (كوزى كورەتىن ادامدار زاعيپ جانداردى سەزىنەدى). نەگىزگى ماقسات − ادامدارعا مۇمكىندىكتەرىن اشۋعا كومەكتەسۋ, سپورت ارقىلى دەنساۋلىق پەن رۋحتى كوتەرۋ, قوعامدا تەڭ مۇمكىندىك جاساۋ.
ەنتۋزيازمدى دامىتۋ ارقىلى ادامدار مۇگەدەكتىگى بار جاندارعا نەمقۇرايدى قاراماي, بارىنشا تۇسىنۋگە ۇمتىلادى. بوۋلينگ – سپورت ءتۇرى عانا ەمەس, بۇل – ادامداردى بىرىكتىرەتىن, قوعامدى دامىتاتىن قۇرال», دەپ تۇيىندەدى «مۇگەدەك جاستار قوعامى» بىرلەستىگىنىڭ توراعاسى مۇرات ءابدىمومىنوۆ.
مۇمكىندىگى شەكتەۋلى بالالارعا – ەرەكشە نازار