كوروناۆيرۋس دەرتى ءورشىپ تۇرعان قيىن كەزەڭدە مۇقتاج ادامدارعا قول ۇشىن بەرۋ ماقساتىندا الەمگە ايگىلى سپورتشىلار وزدەرىنىڭ قۇندى زاتتارىن اۋكتسيونعا قويىپ, سودان تۇسكەن قاراجاتتى تولىقتاي قايىرىمدىلىق شارالارىنا جۇمساپ جاتقانى جايىندا ءبىز بۇعان دەيىن دە بايانداعانبىز.
سولاردىڭ قاتارى تاعى ءبىر سپورتشىمەن تولىقتى. گرەكيانىڭ اتاقتى تەننيسشىسى ستەفانوس تسيتسيپاس ءوزىنىڭ راكەتكاسىن اۋكتسيونعا قويدى. ءدال وسى راكەتكامەن ول بىلتىر اتر-ءدىڭ قورىتىندى تۋرنيرىندە توپ جارعان ەدى. فينالدا ستەفانوس دومينيك تيمگە تىزە بۇكتىردى. ازىرگە ايتۋلى راكەتكا 200 ەۋروعا باعالانىپ وتىر. دەسەك تە افينىدا ءوتىپ جاتقان اۋكتسيوننىڭ ءالى التى كۇنگە دەيىن سوزىلاتىنىن ەسكەرسەك, تسيتسيپاستىڭ «دۇنيەسىنىڭ» قۇنى دا وسەتىنى انىق.
ستەفانوس تسيتسيپاستىڭ وزىنە كەلەتىن بولساق, بيىلعى جىلدىڭ تامىز ايىندا ول 22 جاسقا تولادى. ەجەلگى ەللادا ەلىنىڭ وكىلى جوعارىدا اتالعان اتاقتان بولەك, اتر تۋرنيرلەرىندە بەس رەت دارا شىقتى. بىلتىر اۋستراليا اشىق بىرىنشىلىگىنىڭ جارتىلاي فينالىنا دەيىن جەتتى. بۇگىنگى تاڭدا تسيتسيپاس الەمنىڭ التىنشى راكەتكاسى اتانىپ وتىر.