قاسىم-جومارت توقاەۆ بەلگىلى سپورت قايراتكەرى, داڭقتى باپكەر بەكەت ماحمۇتوۆتىڭ دۇنيەدەن وتۋىنە بايلانىستى ونىڭ وتباسىنا جانە جاقىن تۋىستارىنا كوڭىل ايتۋ جەدەلحاتىن جولدادى. بۇل تۋرالى مەملەكەت باسشىسىنىڭ ءباسپاسوز حاتشىسى بەرىك ءۋالي Facebook پاراقشاسىندا جازدى.
«بەكەت ساپابەك ۇلى ۇزاق جىلدار بويى ەلىمىزدە سپورت سالاسىن وركەندەتۋ جولىندا ەسەلى ەڭبەك ەتىپ, قۇرمەتكە بولەنگەن ەدى. اسىرەسە, قازاق سپورتىن جوعارى دەڭگەيگە كوتەرگەن بىلىكتى باپكەر رەتىندە ەسىمى ەل تاريحىندا قالاتىنى انىق. سالماقتى دا سابىرلى مىنەزىمەن ءوز ورتاسىنا سىيلى بولدى. مارقۇمنىڭ جانى ءجانناتتا, يمانى سالامات بولسىن» دەلىنگەن جەدەلحاتتا.