تاليبتەردەن قاشقانى جايلى كىتاپ جازعان ايەلدەر قۇقىعىن قورعاۋشى – ساشميتا بانەردجي اۋعانستاننىڭ پاكتيكا پروۆينتسياسىندا سودىرلاردىڭ قولىنان قازا تاپتى. بۇل تۋرالى پروۆينتسيا گۋبەرناتورىنىڭ ءباسپاسوز حاتشىسى دجانباز حاننىڭ مالىمەتىنە سىلتەمە جاساي وتىرىپ, يتار-تاسس حابارلادى.
سامشيتا بانەردجي ءۇندىستاننىڭ تۋماسى. ول يسلام ءدىنىن قابىلداپ, اۋعان كاسىپكەرىنە تۇرمىسقا شىعادى. اۋعانستانعا كەلىپ, پاكتيكا پروۆينتسياسىنداعى اۋرۋحانالاردىڭ بىرىندە اكۋشەر بولىپ قىزمەت اتقارادى.
ءوز كىتابىندا بانەردجي اۋعانستانداعى ءومىرى جايلى جازادى. ونىڭ ومىرىندەگى جايسىزدىقتار 1993 جىلى بيلىك باسىنا تاليبتەر كەلگەن كەزدە باستالادى. تاليبتەر ونى قىسپاققا الىپ, شاعىن ءدارىحاناسىن جاپقاننان كەيىن, 1994 جىلى بانەردجي پاكىستانعا قاشىپ كەتەدى. الايدا, قىزدىڭ بۇل ارەكەتى وتباسىنا كىر كەلتىرەدى دەگەن تۋىستارى ونى اۋعانستانعا قايتارادى. تاليبتەر ايەلگە «بۇزىلعان» دەگەن ايىپ تاعىپ, ونى ۇيقاماقتا ۇستايدى. وعان قوسا قاتاڭ جازالايتىندارىن ەسكەرتىپ, قورقىتا باستايدى. سول كەزدە بانەردجي قابىرعانىڭ استىنان جول قازىپ شىعىپ, ۇيدەن قاشىپ كەتەدى. تاليبتەر ونى قابۋل ماڭىندا قولعا ءتۇسىرىپ, كۇيەۋىنەن قاشقانى ءۇشىن ولتىرمەك بولادى. الايدا, ايەل ءۇندىستان تۋماسى بولىپ كەلەتىنىن جانە تۋعان جەرگە ورالۋعا قۇقىعى بار ەكەنىن تۇسىندىرەدى. اقىرى تاليبتەر ونى ءۇندىستان ەلشىلىگىنە جەتكىزىپ, سامشيتا بانەردجي ەلىنە ورالادى.
بانەردجي بولعان وقيعانىڭ بارلىعىن قاعاز بەتىنە ءتۇسىرىپ, كىتاپ جازىپ شىعارادى. 2003 جىلى ءۇندىستاندا اتالمىش كىتاپتىڭ نەگىزىندە «تاليبانداردان باس ساۋعالاۋ» اتتى فيلم ءتۇسىرىلدى.
جاقىندا بانەردجي وتكەن وقيعالار ۇمىتىلعان بولار دەگەن سەنىممەن اۋعانستانعا قايتا ورالدى. دەگەنمەن, سودىرلار ونىڭ كىتابى «تاليبانداردى» ماسقارالادى دەپ ۇيعارىپ, ايەلدىڭ كوزىن جويادى.
ايدار ورىسباەۆ.