بۇگىن, 6 قىركۇيەك كۇنى ەۋروپانىڭ كوپتەگەن ەلدەرىندە 2014 جىلى برازيليادا وتەتىن الەم چەمپيوناتىنىڭ ىرىكتەۋ ويىندارى وينالدى. قازاقستان قۇراماسى ءوز الاڭىندا فارەر ارالدارى كومانداسىن قابىلدادى.
ءبىرشاما تارتىستى وتكەن بۇل كەزدەسۋدىڭ قورىتىندىسىندا ءبىزدىڭ فۋتبولشىلار جەڭىسكە جەتتى. ەسەپ – 2:1.
قازاقستان: اندرەي سيدەلنيكوۆ, يۋري لوگۆينەنكو, الەكساندر كيسليتسىن (سەرگەي وستاپەنكو, 84), قايرات نۇرداۋلەتوۆ, ۆيكتور دميتريەنكو, نۇربول جۇماسقاليەۆ (مارات حايرۋللين, 90), دميتري شومكو, اناتولي بوگدانوۆ, سەرگەي حيجنيچەنكو, الەكسەي ششەتكين, ۆالەري كوروبكين (اندرەي فينونچەنكو, 46).
فارەر: گۋننار نيلسەن, يوناس-تور نەس, ۆيلورميۋر داۆيدسەن, روگۆي بيلدۆانسسون, يوحان دۆايدسەن, سۋني ولسەن, فروۋدي بەنيامينسەن, حالليۋر حانسسون (پالل كلەتسكەر, 80), كريستيان حولست, يوحان ەدمۋندسون (حەيني ۆاتنسدال, 80), كريستان موۋريتسەن.
ەسكەرتۋلەر: يوناس-تور نەس (49),حالليۋر حانسسون (51).
جاسىراتىنى جوق, بىزدەگى ولشەممەن العاندا, كىشىگىرىم ءبىر اۋداننىڭ مولشەرىندەي حالقى بار (48 500) ماڭگى توڭنىڭ ۇستىندە وتىرعان ەلدىڭ جاساعى الاڭ يەلەرىنە ونشالىقتى بوي بەرە قويمادى. مىنە, سول, ماسەلەڭكي, قىزىلوردا وبلىسىنداعى جالاعاش نە سىرداريا سەكىلدى ەڭ شاعىن اۋدانداردىڭ بىرىندەگىدەي عانا جۇرت جايلاعان ارال-مەملەكەتتىڭ اۋەسقوي فۋتبولشىلارى ءبىزدىڭ كاسىپقوي مۇڭسىزداردىڭ اپتەر-تاپتەرىن شىعاردى. ەگەر كەزدەسۋدىڭ 50-مينۋتىندا نۇربول جۇماسقاليەۆ سان-مارينودان كەلگەن اربيتر دجونني كازانوۆا بەلگىلەگەن پەنالتيدەن قارىمتا گول سوعىپ, ەسەپتى تەڭەستىرمەگەندە, ءحالىمىز ءتىپتى مۇشكىل بولعانداي ەكەن. ال ەسەپتى قوناقتار 23-مينۋتتا اشتى (فروۋدي بەنيامينسەن). ويىننىڭ سوڭعى نۇكتەسىن اندرەي فينونچەنكو 64-مينۋتتا قويىپ, جەڭىستى تارتىپ اپەردى.
قازىرگە دەيىن تاعى مىنا كوماندالار اراسىنداعى ويىن ناتيجەلەرى بەلگىلى بولىپ وتىر:
رەسەي – ليۋكسەمبۋرگ 4:1
چەحيا – ارمەنيا 1:2
مۇندا سىرت الاڭدا ويناپ-اق چەحيا سىندى فۋتبولى مىقتى دامىعان ەلدىڭ تەرمە جاماعاتىن ۇتىپ شىققان ارمياندارعا ەرىكسىز ءتانتى تۇراسىڭ.
دامير قوجامقۇل.