بيىلعى جاڭا وقۋ جىلىنىڭ العاشقى كۇندەرىندە مەملەكەت باسشىسىنىڭ جارلىعىمەن اسلان باكەن ۇلى ءسارىنجىپوۆ ءبىلىم جانە عىلىم ءمينيسترى بولىپ تاعايىندالدى. ول وسىعان دەيىن ءبىلىم سالاسىندا مول تاجىريبە جيناقتاعان. بۇل تۋرالى Bnews.kz حابارلادى.
ا. ب. ءسارىنجىپوۆ 1974 جىلى 17 ساۋىردە تۋعان. ەكونوميكا عىلىمدارىنىڭ كانديداتى, جوعارعى ءبىلىمدى اكىمشىلەندىرۋ سالاسىنداعى پەنسيلۆانيا ۋنيۆەرسيتەتىنىڭ دوكتورى (اقش).
قازاق مەملەكەتتىك ەكونوميكالىق ۋنيۆەرسيتەتىن, وكلاحوما ۋنيۆەرسيتەتىن (اقش), ۆەنا ديپلوماتيالىق اكادەمياسىن بىتىرگەن. سونىمەن بىرگە, گارۆارد ۋنيۆەرسيتەتى كەننەدي اتىنداعى مەملەكەتتىك ساياسات مەكتەبىندە تاعىلىمدامان وتكەن.
1996 جىلى ەڭبەك جولىن ورتالىق ازيا مەملەكەتارالىق كەڭەسى اتقارۋشى كوميتەتىنىڭ رەفەرەنتى بولىپ باستادى.
1997 جىلى سىرتقى ىستەر مينيسترلىگىنىڭ ورتالىق اپپاراتىنا اۋىستى. 1998-2002 جىلدارى قازاقستاننىڭ اقش-تاعى ەلشىلىگىندە ەكونوميكالىق ماسەلەلەر جونىندەگى اتتاشە قىزمەتىن اتقاردى (ۆاشينگتون).
2002-2007 جىلدارى دۇنيەجۇزىلىك بانكتىڭ ورتا ازيا بويىنشا ينفراقۇرىلىمدار, قارجىلىق نارىق جانە ءبىلىم ماسەلەلەرى جونىندەگى جوبا ۇيلەستىرۋشىسى بولدى. سونداي-اق, ەلىمىزدە ءبىلىم بەرۋدى دامىتۋدىڭ مەملەكەتتىك باعدارلاماسىن ازىرلەۋگە قاتىستى.
2007-2009 جىلدارى ۇكىمەت پەن ۇلتتىق بانكتىڭ جانىنداعى «ۇلتتىق تالداۋ ورتالىعى» اق باسقارماسى توراعاسىنىڭ ورىنباسارى قىزمەتىن اتقارىپ, ەكونوميكالىق دامۋ, قارجى جانە ءبىلىم سالالارىنا جەتەكشىلىك جاسادى.
2009-2013 جىلدارى «نازارباەۆ ۋنيۆەرسيتەتى» دەربەس ءبىلىم بەرۋ ۇيىمى اتقارۋشى كەڭەسىنىڭ توراعاسى بولدى. «نازارباەۆ ۋنيۆەرسيتەتى» ءبىلىم مەكتەبىنىڭ قاۋىمداستىرىلعان پروفەسسورى.
«نازارباەۆ ۋنيۆەرسيتەتى» دببۇ-نىڭ قۇرىلعانىنان باستاپ قامقورشىلىق كەڭەسىنىڭ مۇشەسى.
2012 جىلى «قۇرمەت» وردەنىمەن ماراپاتتالدى.
جالپى, ا. ب. ءسارىنجىپوۆ «نازارباەۆ ۋنيۆەرسيتەتىن» قۇرۋشىلاردىڭ ءبىرى بولىپ سانالادى. ال جاقىندا ول بۇقارالىق اقپارات قۇرالدارى وكىلدەرىنە بەرگەن سۇحباتىندا مىنا جايدى باسا اتاپ ءوتتى: «مەن بۇل قىزمەتكە جاڭادان تاعايىندالعاندىقتان, مەكەمەنىڭ جۇمىسىنا ەندى عانا ارالاسا باستادىم. تاياۋ ارادا باعدارلاما ازىرلەپ, حالىققا تانىستىرامىن. ماعان دەيىن اتقارىلعان جۇمىستار بار, ولاردى دا باسشىلىققا الا وتىرىپ ارەكەت جاسايمىن. ۇلكەن ىستەر اتقارىلدى, دۇرىس جولعا قويىلعان كوپتەگەن ماسەلەلەر دە بارشىلىق. مەملەكەت باسشىسى تاعى بىرقاتار مىندەتتەر جۇكتەدى. بەلسەندى جۇمىس ىستەۋگە تىرىسامىز جانە تاياۋ ارادا اتقارىلعان جۇمىستارمەن الدارىڭىزعا قايتا شىعامىز».
ءامىرحان الماعانبەتوۆ.