سەناتورلار وبامانى قولدادى
اقش سەناتىنىڭ سىرتقى ىستەر جونىندەگى كوميتەتىنىڭ مۇشەلەرى سيرياداعى احۋالعا بايلانىستى كەلىسىم قالىپتاستىردى. قارار جوباسىنا سايكەس اسكەري وپەراتسيالارعا تاعى دا 30 كۇنگە ۇزارتۋ مۇمكىندىگىمەن 60 كۇن بەرىلەتىن بولدى.
سەناتورلار وبامانى قولدادى
اقش سەناتىنىڭ سىرتقى ىستەر جونىندەگى كوميتەتىنىڭ مۇشەلەرى سيرياداعى احۋالعا بايلانىستى كەلىسىم قالىپتاستىردى. قارار جوباسىنا سايكەس اسكەري وپەراتسيالارعا تاعى دا 30 كۇنگە ۇزارتۋ مۇمكىندىگىمەن 60 كۇن بەرىلەتىن بولدى.
سونىمەن بىرگە, امەريكالىق اسكەريلەردىڭ جەرۇستى وپەراتسيالارىنا قاتىسۋىنا تىيىم دا ەنگىزىلەدى. پرەزيدەنت اكىمشىلىگى سەناتورلارعا ۆاشينگتوننىڭ سيرياداعى وپپوزيتسيالىق توپتارعا ۇستامدى كومەك كورسەتكەنى جونىندە ەگجەي-تەگجەيلى ەسەپ بەرۋى ءتيىس. دەي تۇرعانمەن, سەناتورلار اق ءۇيدىڭ باعىتىنا باسىم داۋىسپەن قولداۋ كورسەتتى. ولاردىڭ پىكىرىنشە, باراك وباما باشار اساد رەجىمىنىڭ حيميالىق قارۋ قولدانۋىنا بايلانىستى كۇش قولدانۋ شاراسىن قابىلداۋى كەرەك.
سيريالىق بوسقىندار كومەككە ءزارۋ
سيريانىڭ كورشىلەرى – ليۆان, يوردانيا, تۇركيا جانە يراك سيريالىق بوسقىندار پروبلەمالارىن شەشۋدى تالقىلاۋ ءۇشىن جەنەۆادا كەزدەسپەك.
ساياساتكەرلەر اۋقاتتى مەملەكەتتەر 2 ميلليوننان استام سيريالىقتاردىڭ ەلدەن قاشۋىنا بايلانىستى تۋىنداعان داعدارىستى شەشۋگە بەلسەندى اتسالىسادى دەپ ەسەپتەيدى. وسى ۋاقىتقا دەيىن سيريانىڭ كورشىلەرى بوسقىندارعا ۇلكەن كومەك كورسەتىپ كەلدى. ماسەلەن, حالقى 4 ميلليوننان ءسال عانا اساتىن ليۆان 750 مىڭ بوسقىندى قابىلداسا, يوردانيا مەن تۇركيانىڭ ارقايسىسى جارتى ميلليوننان بوسقىندار قابىلداعان. دەگەنمەن, بۇل ەلدەردىڭ ءبىر دە بىرىندە سيريالىقتارعا جاعداي تۋعىزاتىنداي جەتكىلىكتى اقشا دا, ينفراقۇرىلىم دا جوق.
ارمەنيا كەدەن وداعىنا وتپەك
ارمەنيا رەسپۋبليكاسى كەدەن وداعىنا كىرۋ تۋرالى شەشىم قابىلدادى. ەل بيلىگى وسى باعىتتا ناقتى شارالارعا بارىپ, ودان ءارى ەۋرازيالىق ەكونوميكالىق وداقتى قالىپتاستىرۋعا اتسالىسپاق نيەتتە.
بۇل تۋرالى ماسكەۋ تۇبىندەگى نوۆو-وگارەۆو رەزيدەنتسياسىندا رەسەي پرەزيدەنتى ۆلاديمير پۋتينمەن كەزدەسۋ كەزىندە ارمەنيا پرەزيدەنتى سەرج سارگسيان مالىمدەدى. كرەملدىڭ ءباسپاسوز قىزمەتىنىڭ حابارلاۋىنشا, پۋتين مۇنداي شەشىمگە قولداۋ كورسەتىپ, ءوزىنىڭ وسى پروتسەسكە جان-جاقتى ىقپال ەتۋگە دايىن ەكەنىن بىلدىرگەن. كەدەن وداعىن كەڭەيتۋ ماسەلەسىنىڭ كرەملدىڭ كۇن تارتىبىندە ايرىقشا ماڭىزعا يە ەكەنىن ايتا كەتۋ قاجەت. بۇگىندە بۇل وداققا رەسەي, بەلارۋس جانە قازاقستان مۇشە. كەلەشەكتە قىرعىزستان مەن تاجىكستان وعان مۇشە بولۋعا نيەت ءبىلدىرىپ وتىر.
كول-كوسىر بايلىققا كەنەلدى
التىن ىزدەۋشىلەر فلوريدا شتاتىنىڭ جاعالاۋىندا يسپانداردىڭ قازىناسىن تاۋىپ العان. تابىلعان دۇنيەلەر 300 مىڭ دوللار دەپ باعالانۋدا.
65 جاستاعى ريك شميتت ءوزىنىڭ بۇكىل عۇمىرىن قازىنا ىزدەۋگە ارناپتى. اقىرى ونىڭ ويلاعان ءىسىنىڭ ءساتى وڭىنان تۋعان. كومبە ىزدەۋشىلەر تەڭىزدە ءۇيىلىپ جاتقان التىن كۇمىستەر مەن اشەكەيلەردىڭ ءدال ۇستىنەن ءتۇسىپتى. سويتسە, قىرۋار بايلىق تابىلعان فلوريدانىڭ وسى جاعالاۋىندا شامامەن بۇدان 300 جىلداي ۋاقىت بۇرىن التىن تيەلگەن 11 يسپاندىق گالەون سۋعا باتىپ كەتكەن ەكەن. شميتتەر وتباسى بۇعان دەيىن دە بىرنەشە رەت كوپشىلىك كوزىنەن جاسىرىن جاتقان بايلىقتاردى تاپقان كورىنەدى.
جاپوندار وليمپيادا وتكىزۋگە دايىن
ءبىزدىڭ ۇكىمەت اتوم ەلەكتر ستانساسىندا تۋىنداعان پروبلەمالاردى شەشۋ ءۇشىن قاجەتتى شارالاردىڭ ءبارىن جاسايتىن بولادى. مەن بۇل تۋرالى حالىقارالىق وليمپيادالىق كوميتەتكە ءوزىم تىكەلەي تۇسىندىرمەك نيەتتەمىن, دەپ اتاپ كورسەتكەن جاپونيا پرەمەر-ءمينيسترى سيندزو ابە.
تامىز ايىنىڭ ورتاسىندا «فۋكۋسيما-1» ستانساسىندا 2011 جىلدىڭ ناۋرىزىندا اەس-تە اپات بولعان كەزەڭنەن بەرگى ۋاقىتتاعى ەڭ كوپ راديواكتيۆتى سۋدىڭ اعىپ كەتۋى ورىن العان ەدى. وندا جەر ۇستىندەگى بولات ىدىستان 300 تونناداي قاتتى لاستانعان سۋ اعىپ كەتكەن. ايتا كەتۋ كەرەك, 2020 جىلعى وليمپيادا استاناسى 7 قىركۇيەكتە اتالاتىن بولادى. جاپون استاناسىمەن باسەكەگە تۇسكەندەر قاتارىندا ىستامبۇل مەن مادريد بار.
بالالار ۇيىمداستىرعان ۇيلەنۋ تويى
ەگيپەتتە ون ءبىر جاسار كۇيەۋ بالا مەن توعىز جاسار قالىندىق ۇيلەنۋ تويىن وتكىزگەن. وسى تويدان تۇسىرىلگەن بەينەكورىنىس ينتەرنەتكە سالىنعان كورىنەدى.
نەگىزگى داۋ دا سوعان بايلانىستى تۋىنداپ وتىر. ەگيپەت زاڭدارى بويىنشا 18 جاستان كەيىن عانا نەكەگە تۇرۋعا بولادى. بىراق مۇنداي شەكتەۋ ءجاسوسپى ءرىم عاشىقتاردىڭ اتا-انالارىنا توقتاۋ سالا الماسا كەرەك. نەكە قيۋ ءراسىمى بارلىق قاعيدالار بويىنشا وتكەن. كۇيەۋ بالا – سموكينگ, ال قالىندىق توي كويلەگىن كيگەن. وسى ورايدا پاكستانداعى وسىنداي ۇيلەنۋ تويى سوڭىنىڭ 5 جاسار قىز بەن 7 جاسار ۇل بالانىڭ اتا-انالارىنىڭ تۇتقىنعا الىنۋىمەن اياقتالعانىن دا ايتا كەتۋ قاجەت.
بەرەزوۆسكيدىڭ اناسى قايتىس بولدى
فرانتسيادا 88-گە قاراعان شاعىندا بيىل مارقۇم بولعان رەسەيلىك وليگارح ب.بەرەزوۆسكيدىڭ اناسى اننا گەلمان قايتىس بولدى.
اننا گەلمان تومسكىلىك قۇرىلىسشى-ينجەنەر ابرام ماركوۆيچ بەرەزوۆسكيگە تۇرمىسقا شىققان بولاتىن. كەزىندە ول كسرو مەديتسينا عىلىمدارى اكادەمياسىنىڭ پەدياتريا ينستيتۋتىندا اعا لابورانت بولىپ جۇمىس ىستەگەن. كەيىن تۇراقتى تۇرۋ ءۇشىن فرانتسياعا قونىس اۋدارادى. اننا گەلمان مامىر ايىندا 67 جاستاعى ۇلى ب.بەرەزوۆسكيدى جەرلەگەننەن كەيىن جالعىز قالعان بولاتىن. جاسى ۇلعايعان ايەلدىڭ قايتىس بولۋ سەبەپتەرى تۋرالى ەشقانداي مالىمەت جوق.
ايەل ۇرلاۋشى قىلمىسكەر اسىلىپ قالدى
ءۇش ايەلدى ۇرلاپ اكەتىپ, ون جىل بويى قاماۋدا ۇستاعانى ءۇشىن ومىرلىك باس بوستاندىعىنان ايىرىلعان جانە تاعى دا قوسىمشا 1000 جىل تۇرمەدە وتىرۋعا كەسىلگەن اريەل كاسترو ءوز كامەراسىندا ءولى كۇيىندە تابىلدى.
كاسترونىڭ وگايو شتاتىنداعى وريەنت تۇرمەسىندە اسىلىپ قالعانى تۋرالى تۇرمە وكىلدەرى مالىمدەگەن. 53 جاستاعى اريەل كاسترو ول ەرىكسىز قاماۋدا ۇستاعان ايەلدەردىڭ بىرىنە قاشىپ شىعۋدىڭ مۇمكىندىگى تۋعاننان كەيىن ۇستىمىزدەگى جىلدىڭ مامىر ايىندا تۇتقىنعا الىنعان بولاتىن. ول 2002-2004 جىلدارى ۇرلانعان ءۇش ايەلدى ءوز ۇيىندە ۇستاپ, ولارعا زورلىق كورسەتىپ كەلگەن. قاماۋدا وتىرعان ايەلدەردىڭ ءبىرى بىرنەشە رەت جۇكتى بولىپ, ونىڭ سوڭى تۇسىك تاستاۋعا اپارىپ سوقتىرعان كورىنەدى.
ينتەرنەت ماتەريالدارى نەگىزىندە ازىرلەندى.