قازىرگى ەلىمىزدەگى ەپيدەميولوگيالىق جاعداي بارىمىزگە ءمالىم. دۇنيە جۇزىنە تارالعان كوروناۆيرۋس ىندەتىنىڭ اۋىرتپاشىلىعىن قازاقستان حالقى دا سەزىنىپ وتىر. اۋرۋعا شالدىققانداردىڭ سانى كۇن سايىن ارتۋدا. ارينە وسىنداي ساتتەردە مەملەكەت باسشىسىنىڭ شۇعىل شەشىمدەرى اسا ماڭىزدى.
پرەزيدەنت قاسىم-جومارت توقاەۆ ەلىمىزدەگى توتەنشە جاعدايعا بايلانىستى دەر كەزىندە وتە شاپشاڭ شەشىمدەر قابىلداپ, مالىمدەمە جاسادى. ءبىرىنشى كەزەكتە ەلىمىزدىڭ ەكى ءىرى قالاسى نۇر-سۇلتان مەن الماتىدا ۆيرۋستىڭ ءورشىپ تارالۋىنا جول بەرمەس ءۇشىن كارانتين رەجىمىن ەنگىزدى. بۇل ىندەتتىڭ بارلىق رەسپۋبليكاعا جىلدام تارالۋىنىڭ الدىن الۋداعى اسا قاجەتتى شارا بولدى. الداعى ماقسات – اۋرۋدىڭ باسقا ەلدەردەگىدەي قاتتى ورشۋىنە جول بەرمەۋ. بۇعان بارشا مەديتسينا, قۇقىق قورعاۋ جانە قاۋىپسىزدىك ورگاندارى, جەرگىلىكتى بيلىك ورگاندارى اتسالىسۋدا. مۇنداي جاعدايدا باستى اۋىرتپالىقتىڭ مەديتسينا قىزمەتكەرلەرىنە ءتۇسىپ وتىرعانى ءسوزسىز. ولار بارلىق كۇشتەرىن وسى ىندەتپەن كۇرەسۋگە جۇمساۋدا, كوروناۆيرۋستى جۇقتىرعاندارعا كومەكتەرىن ايانباي بەرۋدە. وسىنى تۇسىنە وتىرىپ, جاقىندا مەملەكەت باسشىسى پاندەمياعا قارسى ءىس-شارالارعا تارتىلعان مەديتسينا قىزمەتكەرلەرىنە ۇستەمەاقى تاعايىنداۋدى بەكىتتى. ودان بولەك مەديتسينا قىزمەتكەرلەرىنىڭ دەنساۋلىعى مەن ءومىرىن ساقتاندىرۋدى قامتاماسىز ەتۋدى تاپسىردى. بۇل مەديتسينا قىزمەتكەرلەرىنە مەملەكەت تاراپىنان كورسەتىلگەن ۇلكەن قولداۋ, ىندەتپەن كۇرەسۋدىڭ الدىڭعى لەگىندە جۇرگەندەرگە دەگەن زور قۇرمەت.
ارينە ەلىمىزدە باسقا دا ماڭىزدى ءىس-شارالار جۇزەگە اسىرىلۋدا. ەكونوميكا ءۇشىن وسىنداي قيىن كەزدە مەملەكەت تاراپىنان ۇلكەن قاراجات ءبولىنىپ, حالىققا كوپتەگەن الەۋمەتتىك قولداۋ بەلگىلەندى, جاردەماقىلار مەن سىياقىلار, جەڭىلدىكتەر تاعايىندالدى. مۇنىڭ ءبارى وسى كەزەڭدى بىرگە ەڭسەرىپ, ىندەتتىڭ زالالىن بارىنشا تەز جويۋعا باعىتتالعان مەملەكەت تاراپىنان جاسالىپ وتىرعان ءىس-شارالار. مەديتسينا قىزمەتكەرلەرى, ءوز كەزەگىندە, حالىققا كومەك كورسەتۋ ءۇشىن بارىنشا كۇش جۇمساۋدا. ەلىمىزدىڭ ءار ازاماتىنىڭ دا جاعدايعا اسا جاۋاپكەرشىلىكپەن قاراپ, ىندەتتىڭ تارالماۋىنا ءوز تاراپىنان اتسالىسقانى ءجون.
سەرىك اقشولاقوۆ,
قازاقستاننىڭ ەڭبەك ەرى, ۇلتتىق نەيروحيرۋرگيا ورتالىعىنىڭ پرەزيدەنتى