جۇقپالى اۋرۋلار دارىگەرى اقبوتا ابىشباەۆانىڭ دامىلداماي, ارىپتەستەرى ءتارىزدى اتىشۋلى ىندەتپەن كۇرەستىڭ العى شەبىندە تاۋلىك بويى پاتسيەنتتەرىنىڭ قاسىنان تابىلىپ جۇرگەنىنە قانشاما كۇن بولدى.
اقبوتا ماجيتقىزىمەن تەلەفون ارقىلى سويلەسۋدىڭ ءوزى وڭايعا تۇسپەي, ازەر دەگەندە قىسقا عانا قايىرىپ اڭگىمەلەستىك. ويتكەنى دارىگەردىڭ ءار ۋاقىتى قىمبات. جوعارى وقۋ ورنىن بىتىرگەن 10 جىلدىڭ ىشىندە دارىگەر-ينفەكتسيونيست رەتىندە ەڭبەك ەتىپ كەلە جاتقان اقبوتا قازىر دارىگەرلەردىڭ عانا ەمەس, بۇكىل وتانداستارىنىڭ سىن ساعاتتا وتىرعانىن ايقىن سەزىنەدى. ويتپەگەندە شە, كۇن-ءتۇن قاتىپ جۇمىستا جۇرگەن جولداسى, اسكەري قىزمەتتەگى مايور نۇربولات قايماقباەۆتى ايتپاعاندا, سوناۋ قىزىلوردانىڭ قارماقشى اۋدانىنداعى ەنەسى, زەينەتكەر التىن سىزدىقوۆا بۇلاردىڭ ەڭ ۇلكەنى 10, ال ەڭ كىشىسى 2 جاستاعى 3 بالاسىن باعىپ-قاعىپ, ەلگە كومەگىن تيگىزىپ وتىر. «ەكەۋمىزدىڭ دە جۇمىسىمىزعا بايلانىستى بالالاردى اۋىلعا اپارىپ تاستادىق. وندا ينتەرنەت بىردە بار, بىردە جوق, قوسىلعان ۋاقىتىندا اپام بالالاردىڭ سۋرەتىن سالادى, داۋىسىن دا ەستي الماي, ساعىنىپ ءجۇرمىز, ايتەۋىر مىنا قيىندىقتان امان-ەسەن شىعىپ, وتباسىمەن قاۋىشۋدى ارماندايمىز», دەيدى ول. ايتۋىنشا, العاشقى كەزدە شەتەلگە شىعىپ كەلگەن وتانداستارىمىز كارانتينگە تۇسسە, قازىرگى ۋاقىتتا شەكارا اسپاي, ەلدە ءجۇرىپ-اق ۆيرۋستى جۇقتىرعاندار بار. سوسىن اۋرۋ بەلگىلەرى بىلىنىسىمەن دارىگەرگە جۇگىنبەستەن, ۋاقىت وزدىرىپ, اپتا ارالاتىپ, 10 كۇن, ءتىپتى ودان دا اسىرىپ كەلىپ جاتقاندار دا جەتەرلىك. كادىمگى تۇماۋعا ۇقسايتىن بولعاندىقتان, سىرقاتىنىڭ كوروناۆيرۋس ەكەنىن اجىراتۋ قيىن. ناقتى انىقتاۋ ءۇشىن ەكى ءتۇرلى ساراپتاما – ءبىرى, اۋىز بەن مۇرىن قۋىسىنان, ەكىنشىسى, قانعا پتر ادىسىمەن زەرتتەۋ جاسالعاندا عانا ۆيرۋستىڭ بار-جوعى بەلگىلى بولادى. سوندىقتان كادۋىلگى تۇماۋ ءتارىزدى اۋىرا باستاسا دەرەۋ دارىگەر شاقىرعان ءجون.
– ءبىز وسى اۋرۋحانانىڭ ىشىندە, پاتسيەنتتەرىمىزبەن ءبىر قاباتتا بولعانىمىزبەن, بولەك بلوكتا تۇرامىز. تاۋلىك بويى وسىندامىز, سوندىقتان پاتسيەنت جاعدايىنا قاراي ارقاشان قاسىنان تابىلامىز. اۋرۋلارعا مەديتسينالىق كومەكپەن قاتار پسيحولوگيالىق تۇرعىدا دا جاردەم كەرەك بولىپ جاتادى, سول سەبەپتى پسيحولوگ ماماندار دا جۇمىس ىستەيدى. ايتەۋىر ەل بولىپ جۇمىلاتىن ۋاقىت بولىپ تۇر, – دەپ جۇمىسىنىڭ ارا-اراسىندا ارىپتەستەرىنىڭ دە سۇراقتارىنا جاۋاپ بەرىپ ۇلگەرىپ جاتقان دارىگەرگە ء«سىزدىڭ ۋاقىتىڭىزدى المايىن, ەل ءبىلۋى ءتيىس نارسەلەردى ءوزىڭىز ايتا بەرىڭىز» – دەدىك.
– اۋرۋ جاس تالعاپ جاتقان جوق, كادىمگى قىلشىلداپ تۇرعان, قايراتتى ادامنىڭ ءوزى ىندەت تىرناعىنا ىلىنۋدە, سوزىلمالى دەرتتەرى, جۇرەك-قان, وكپە, سۋسامىر ءتارىزدى بۇرىننان ىلەسىپ جۇرگەن اۋرۋلارى بار ادامدارعا قاتتىراق تيەدى. سوسىن وكپەگە زيانى وتە اۋقىمدى. ال ۆيرۋس جۇقتىرعانىمەن پالەندەي دەنساۋلىعىنا سالماق سالماي جەڭىل تۇردە ءوتىپ جاتقاندار دا بار. بىرىنشىدەن, جەكە باستىڭ گيگيەناسىن ساقتاۋ, سابىنداپ, دۇرىس جۋىنۋ, سوسىن ارالاس-قۇرالاستىقتى مەيلىنشە شەكتەۋ قاجەت. تاماق الۋعا دا ۇيدەن اپتاسىنا ءبىر رەت شىققان دۇرىس, – دەدى دارىگەر.
اقبوتا ماجيتقىزىنان «وسى ۋاقىت ىشىندە 120 مەديتسينا قىزمەتكەرىنە ۆيرۋس جۇعىپتى, سىزبەن بىرگە ەڭبەك ەتىپ جاتقاندار اراسىنان وسى ءتارىزدى وقيعا كەزدەستى مە؟» دەپ سۇرادىق, «ارينە ءبىز پاتسيەنتكە باراردا الدىمەن وباعا قارسى ارنايى جان-جاعى تۇيىقتالعان قورعانىش كيىمىن كيەمىز. ودان كەيىن ەكىنشى قابات تاعى كيەرىمىز بار. باس-اياعىمىز تەگىس تۇمشالانىپ, شاش تەگىس ورامال استىنا جىبەرىلىپ, ونىڭ سىرتىنان تاعى جابىندىمەن ورانىپ, سىرتىنان كۇلاپارانى كيەمىز. اياعىمىزدا ارنايى وباعا قارسى رەزەڭكە ەتىك, سوعان قاراماستان جۇققىش پالە جۇعىپ قالىپ جاتىر. شەتەلدەر دە قانشاما دارىگەر كوز جۇمدى. بىزدە شۇكىر ولاي ەمەس, بولماي-اق تا قويسىن, بىراق «ساقتانساڭ – ساقتايمىن» دەگەندەي, بارىمىزگە دە ساقتانۋ كەرەك. حالىقتىڭ ىشىندە وسى ىندەتتىڭ قاۋىپتى ەكەنىنە سەنبەي جاتقاندار بار دەگەندى ەستىگەندە كۇيىپ كەتە جازدايمىز. بىراق قازىر كوپشىلىك تە ۇعىنعان ءتارىزدى, الايدا ەل ىشىندە ءالى دە كورشىلەرگە بارىپ شاي ءىشىپ, تۋىستارمەن قالاي ارالاسپاي وتىرامىز دەيتىندەر بولۋى مۇمكىن, سونداي جاندارعا: «ازىرگە, ارالاسۋدان ۋاقىتشا تىيىلا تۇرىڭىزدارشى, مىنا اۋرۋدى ەڭسەرەيىك, سوسىن-اق ءبىر-بىرىمىزبەن قۋانا قاۋىشىپ, تۋىستىعىمىزدى, كورشىلىگىمىزدى, اعايىن-باۋىرلىعىمىزدى بەكىتە تۇسەمىز دەگىم كەلەدى. اۋرۋ تارالماۋ ءۇشىن ۇيدە وتىرۋ ماڭىزدى. ىندەتپەن كۇندەلىكتى ارپالىسىپ, وتباسىن ساعىنىپ, جانىن شۇبەرەككە تۇيگەن دارىگەر رەتىندە جۇرتشىلىققا وسىنى جەتكىزگىم كەلەدى», دەيدى اقبوتا ماجيتقىزى.
دارىگەردەن سۇراپ بىلگەنىمىزدەي, اۋرۋدان ايىققان جانە 14 كۇن كارانتيندە بولعان ادامنىڭ پتر تالداۋىندا ۆيرۋس جوعى انىقتالعان سوڭ جەرگىلىكتى ەمحانا بويىنشا ۇيدەگى باقىلاۋعا جىبەرىلەدى.