قاراعاندى وبلىسىندا قۇرامىنا ۋچاسكەلىك پوليتسيا ينسپەكتورلارى, سانيتارلىق قىزمەت ماماندارى جانە ەرىكتىلەر ەنگەن ءموبيلدى توپتار كارانتين رەجيمىنىڭ ورىندالۋىن قاداعالايتىن بولادى.
پوليتسيا دەپارتامەنتىنىڭ ءباسپاسوز قىزمەتى بيىلعى جىلدىڭ 3 ساۋىرىنە دەيىن ءتارتىپ بۇزۋشىلىقتىڭ 233 اكىمشىلىك حاتتاماسى تولتىرىلعانىن حابارلادى. سوت شەشىمىمەن 151 ادام ايىپپۇل, قاماۋعا الۋ جانە ەسكەرتۋ تۇرىندە جاۋاپكەرشىلىككە تارتىلعان. ال 82 ماتەريال بويىنشا تەكسەرىس جۇرگىزىلۋدە.
ءموبيلدى توپتار وبلىس ورتالىعىندا تۇنگى الدىن الۋ رەيدتەرىن ۇيىمداستىرۋدى قولعا الدى. بۇل ءىس-شارا بارىسىندا كەشكى ۋاقىتتا سەرۋەنگە شىققان ادامدارعا كارانتين تالاپتارى تۇسىندىرىلەدى. سونداي-اق, تۇرعىندارعا مەديتسينالىق ماسكا تاراتىلدى.
كارانتين كەزىندە شەكتەۋلەردى ساقتاۋ قاجەتتىگى وتە ماڭىزدى. قاجەت بولعان جاعدايدا عانا كوشەگە شىعۋعا بولادى. ازىق-ت ۇلىك الۋ ءۇشىن ءۇيدىڭ جانىنداعى دۇكەندى نەمەسە جاقىن ماڭداعى سۋپەرماركەتتى تاڭداعان ءجون. بۇل جاعداي ءدارىحانا مەن بانك بولىمشەسىنە دە قاتىستى.
ءۇي جانۋارلارىن سەرۋەندەتۋگە بولادى. كامەلەت جاسىنا تولماعاندارعا ەرەسەكتەرسىز جۇرۋگە تىيىم سالىنادى. جاسى 65-تەن اسقان ادامداردىڭ ۇيدەن شىقپاعانى ابزال.
پوليتسيا قىزمەتكەرلەرى ءتارتىپ بۇزۋشىلاردىڭ اكىمشىلىك جاۋاپكەرشىلىككە تارتىلاتىنىن ەسكەرتەدى.