جىل باسىنان بەرى مۇناي باعاسى 65,7%-عا, مەتالدار ورتا ەسەپپەن 15,6%-عا, الەمدىك بيرجالىق يندەكستەر ورتا ەسەپپەن 20,9%-عا تومەندەدى. بيىلعى 1-ءشى ساۋىردەگى جاعداي بويىنشا مۇناي باعاسى ءبىر باررەلىنە 22 دوللارعا دەيىن تومەندەدى. بۇل تۋرالى بۇگىن ۇكىمەت ۇيىندە وتكەن جيىندا ۇلتتىق ەكونوميكا ءمينيسترى ر.دالەنوۆ ايتتى.
وسى جاعدايدى ەسكەرە وتىرىپ, الداعى ءساۋىر-جەلتوقسان ايلارىندا مۇنايدىڭ ورتاشا باعاسى ءبىر باررەلىنە 20 دوللار دەڭگەيىندە بەلگىلەنىپ وتىر. دوللاردىڭ ەسەپتىك باعامى 440 تەڭگە دەڭگەيىندە جانە جىلدىق ينفلياتسيا 9-11% ارالىعىندا ەسەپكە الىنعان.
باعانىڭ تومەندەۋى اياسىندا مۇناي ءوندىرۋ بويىنشا بولجام 4 ملن-عا 86 ملن تونناعا دەيىن ازايتىلدى. بۇل تاۋ-كەن ونەركاسىبى ءوندىرىسىنىڭ تومەندەۋىنە اكەلەدى. سونىمەن قاتار وڭدەۋ ونەركاسىبىندە, اۋىل شارۋاشىلىعىندا, قۇرىلىستا جانە كورسەتىلەتىن قىزمەتتەر سەكتورىندا, ونىڭ ىشىندە ساۋدادا بۇعان دەيىن ماقۇلدانعان ءوسۋ قارقىندارىمەن سالىستىرعاندا تومەندەۋ كۇتىلۋدە.
سونىمەن قاتار ەكسپورت 16,3 ملرد دوللارعا, يمپورت 7,5 ملرد دوللارعا تومەندەگەن. جوعارىدا اتالعان فاكتورلاردى ەسكەرە وتىرىپ, جالپى ىشكى ءونىمنىڭ 0,9%-عا تومەندەۋى كۇتىلۋدە.
سوعان ساي تۇزەتىلگەن ماكروەكونوميكالىق بولجامنىڭ نەگىزىندە 2020 جىلعا ارنالعان رەسپۋبليكالىق بيۋدجەت پارامەترلەرىنىڭ بولجامى ناقتىلاندى.
رەسپۋبليكالىق بيۋدجەتتىڭ كىرىستەرى ترانسفەرتتەردى ەسەپكە الماعاندا 2020 جىلى 6 414,1 ملرد تەڭگە كولەمىندە باعالانۋدا, بۇل بەكىتىلگەن جوسپارعا قاراعاندا 1 672,3 ملرد تەڭگەگە از.
بۇعان قوسا, ەلدەگى كارانتين جاعدايىندا قوسىلعان قۇن سالىعى, شيكى مۇنايعا ەكسپورتتىق كەدەن باجى جانە تابيعي رەسۋرستاردى پايدالانعانى ءۇشىن تۇسەتىن تۇسىمدەر كەمىگەندىكتەن ەل قازىناسىنا تۇسەتىن قاراجات ايتارلىقتاي ازايۋى مۇمكىن. ر.دالەنوۆ بيۋدجەت كىرىستەرىنىڭ كۇتىلەتىن تاپشىلىعىن جابۋ جانە داعدارىسقا قارسى شارالار كەشەنىن قارجىلاندىرۋ ءۇشىن 2020 جىلى ۇلتتىق قوردان كەپىلدەندىرىلگەن ترانسفەرتتى 2 070 ملرد تەڭگەگە, ياعني 4 770 ملرد تەڭگەگە دەيىن ۇلعايتۋدى ۇسىندى.