بۇگىن جامبىل وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ وڭىرلىك كوممۋنيكاتسيالار قىزمەتىنىڭ الاڭىندا شۇعىل بريفينگ وتكىزىپ, وڭىردە كوروناۆيرۋس ىندەتىن جۇقتىرعان تاعى 2 ادام انىقتالعانىن جەتكىزدى.
ىندەتتى جۇقتىرعان تاراز قالاسىنىڭ 41 جاستاعى تۇرعىنى «قىزىلوردا-كوكشەتاۋ» باعىتىنداعى پويىزدا تۇركىستان وبلىسىنىڭ تۇرعىنىمەن بايلانىستا بولعان. بۇگىندە ولارمەن بايلانىستا بولعان 8 ادام كارانتين بولىمشەسىنە جاتقىزىلىپ, كوروناۆيرۋس ينفەكتسياسىنا قان تالداۋى الىنعان. سونىمەن قاتار «قىزىلوردا-كوكشەتاۋ» باعىتىنداعى پويىزدا تۇركىستان وبلىسىنىڭ اتالعان تۇرعىنىمەن بايلانىستا بولعان 7 جولاۋشى كارانتينگە جاتقىزىلعان. بىراق ولاردىڭ قان تالداۋى تەرىس ناتيجە كورسەتكەن.
ال, ەكىنشى ناۋقاس 1991 جىلى تۋعان جامبىل وبلىسىنىڭ تۇرعىنى. ول 30 ناۋرىز كۇنى وبلىسقا رەسەي فەدەراتسياسىنان ىسساپارمەن كەلگەن. اتالعان تۇرعىن كەلگەن ساتىندە-اق كارانتينگە جاتقىزىلعان. ونىڭ سىناماسى وڭ ناتيجە كورسەتكەننەن كەيىن ينفەكتسيالىق ستاتسيونارعا اۋىستىرىلعان. مارات جۇمانقۇلوۆ تىركەلگەن 2 ناۋقاستىڭ دا جاعدايىنىڭ قاناعاتتارلىق ەكەنىن اتاپ ءوتتى. سونداي-اق حاتتاماعا سايكەس ول ازاماتتار قاجەتتى ەم الىپ جاتىر ەكەن. سونىمەن قاتار مارات جۇمانقۇلوۆ سانيتارلىق-ەپيدەميالىق قىزمەتتەر ناۋقاستاردىڭ تۇرعان جەرلەرى مەن بولعان ورىندارىنداعى وشاقتاردا دەزينفەكتسيا جۇمىستارى جۇرگىزىلگەنىن دە ايتتى. بۇگىندە وبلىستا 165 ادام ستاتسيونارلىق كارانتيندە بولسا, 533 تۇلعا ءۇي كارانتينىندە.
وسى ۋاقىتقا دەيىن جامبىل وبلىسىندا كوروناۆيرۋس ينفەكتسياسىن جۇقتىرۋ بويىنشا 3 جاعداي تىركەلگەن بولاتىن. ىندەت بەلگىلەرى قىرعىز رەسپۋبليكاسىنان كەلگەن شۋ جانە قورداي اۋدانىنىڭ تۇرعىندارىنان انىقتالعان ەدى.
جامبىل وبلىسى