باتىس قازاقستان وبلىسىنىڭ تەرەكتى اۋدانىندا كوروناۆيرۋس ىندەتىن جۇقتىرۋ قاۋپى جوعارى ايماقتان كەلىپ, بىراق 14 كۇندىك وقشاۋلاۋ ءتارتىبىن ساقتاماعان ازاماتتار قاماۋعا الىندى.
پودستەپنوە اۋىلىنىڭ ۋ. ەسىمدى تۇرعىنى 2020 جىلدىڭ 26 ناۋرىزى كۇنى ماسكەۋ قالاسىنان كەلگەن. مەملەكەتتىك شەكارادان ءوتىپ كەلە جاتقان كەزدە بارلىق جولاۋشى سەكىلدى ونى دا «كوروناۆيرۋسقا» قاتىستى لابوراتوريالىق اناليز تاپسىرۋعا جىبەرگەن. ازامات ءاناليزىن تاپسىرعان سوڭ ناتيجەسىن كۇتپەي, ءوز ەركىمەن مەديتسينالىق مەكەمەدەن كەتىپ قالعان. وسى ارەكەتى ءۇشىن ءىسى سوتتا قارالىپ, اكىمشىلىك ايىپپۇل جازاسىنا تارتىلعان.
بۇل ازامات سوتتان كەيىن دارىگەرگە قايتا بارماي, 14 كۇن كارانتيندە بولۋ مىندەتىن بىلمەگەن. ءتىپتى 29 ناۋرىز كۇنى تەكسەرگەندە, تۇرعىلىقتى مەكەن-جايىندا دا بولماعان. وسىلايشا توتەنشە جاعداي رەجيمىن ورەسكەل بۇزعان.
تەرەكتى اۋداندىق سوتى وقيعاعا قاتىستى بارلىق ءمان-جايدى تەكسەرە كەلىپ, ۋ-دى كىنالى دەپ تاپتى. ءسويتىپ, ونى 10 تاۋلىك مەرزىمگە قاماققا الۋ جونىندە شەشىم شىعاردى.
وسىعان ۇقساس وقيعا تەرەكتى اۋدانىنىڭ اقجايىق اۋىلىندا دا بولدى. 26 ناۋرىز كۇنى اقمولا وبلىسىنان كەلگەن ازاماتقا اۋداندىق اۋرۋحانا قىزمەتكەرلەرى ارنايى جولىعىپ, COVID-19 اۋرۋىن جۇقتىرۋ قاۋپى جوعارى ايماقتان كەلگەن تۇلعا رەتىندە وعان كارانتين ءتارتىبى مەن ەرەجەلەرىن ساقتاۋدى تۇسىندىرگەن. الايدا ول بۇل تالاپتاردى ساقتاماي, 29 ناۋرىز كۇنى ءوزىنىڭ تۇرعىن جايىن تاستاپ, باسقا اۋدانعا كەتىپ قالعان. تەرەكتى اۋدانىنىڭ №2 سوتى اكىمشىلىك قۇقىق بۇزۋشىلىق ءىستى قاراپ, توتەنشە جاعداي رەجيمىن بۇزعان تۇرعىندى 15 تاۋلىك مەرزىمگە اكىمشىلىك قاماققا الۋ تۇرىندەگى اكىمشىلىك جازا تاعايىندادى.
كوروناۆيرۋس ىندەتىن ودان ءارى تاراتپاي, اۋىزدىقتاۋ ءۇشىن الەم ەلدەرىمەن بىرگە قازاقستان دا رەسپۋبليكا بويىنشا توتەنشە جاعداي جاريالاپ, كەشەندى شارالاردى جۇزەگە اسىرىپ جاتىر. مەملەكەت قازىناسىنان ميللياردتاعان تەڭگە جۇمسالىپ, ساپ-ساۋ ادامداردىڭ ءوزى ۇيدەن شىقپاي, وقشاۋلانىپ وتىرعان ۋاقىتتا, ىندەت قاۋپى جوعارى ايماقتان كەلگەن جەرلەستەرىمىزدىڭ سالعىرتتىعى مەن جاۋاپسىزدىعىن كەشىرۋگە بولمايدى.
باتىس قازاقستان