تالدىقورعان قالاسىنداعى نازارباەۆ زياتكەرلىك مەكتەبىنىڭ 6 وقۋشىسى بىردەي ەلىمىزدىڭ ەڭ ۇزدىك جوعارعى وقۋ ورىنى – نازارباەۆ ۋنيۆەرسيتەتىنە شاقىرتۋ الدى. بۇيىرسا, 12-سىنىپتى ۇزدىك اياقتايتىن وقۋشىلار ەندى نۇر-سۇلتان قالاسىنداعى وزىق ءبىلىم ورداسىندا گرانتپەن وقيدى.
ىرگە كوتەرگەنىنە ساناۋلى جىلدار عانا بولعان نازارباەۆ ۋنيۆەرسيتەتىندە قازىر 4 مىڭنان استام ستۋدەنت ءبىلىم الادى ەكەن. ەندى ولاردىڭ قاتارىن تالدىقورعاندىق تالاپتى جاستار تولىقتىرادى. 12-سىنىپتا وقيتىن ەرنار ومىرزاقوۆ, رومان تسوي, اسەماي الماسبەكقىزى, الۋا بەيسەنبەكوۆا, قازبەك قابىلەت جانە ايىم جۇماباەۆالار فيزيكا-ماتەماتيكا باعىتىندا ءبىلىم بەرەتىن زياتكەرلىك مەكتەپتىڭ ماقتانىشتارى. حالىقارالىق, رەسپۋبليكالىق, مەكتەپارالىق وليپيا جارىستارىندا ۇنەمى توپ جارىپ جۇرگەن وقۋشىلار مەكتەپتىڭ قوعامدىق ومىرىنە دە بەلسەنە ارالاسادى.
- «ادامدى ارمان وسىرەدى» دەيدى عوي, مەن بولاشاقتا بىرىككەن ۇلتتار ۇيىمىنىڭ حاتشىلىعىندا جۇمىس ىستەگىم كەلەدى. وسى ماقساتقا قول جەتكىزۋ ءۇشىن وقۋدا ۇزدىك بولۋىم كەرەك. مەكتەپ قابىرعاسىندا ونى دالەلدەۋگە تىرىستىم. ارمانىمنىڭ العاشقى باسپالداعىنا شىقتىم دەپ ويلايمىن. نازارباەۆ ۋنيۆەرسيتەتىنە شاقىرتۋ الىپ, گرانت يلەنگەنىمدە قاتتى قۋاندىم. ەندى ءبىلىم الۋدى «ساياساتتانۋ مەن حالىقارالىق قاتىناستار» فاكۋلتەتىندە جالعاستىرسام دەگەن ويىم بار, - دەيدى تالدىقورعان قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ايىم جۇماباەۆا.