«حابار 24» تەلەارناسىنىڭ تىكەلەي ەفيرى ارقىلى ونلاين بريفينگ وتكىزگەن اقپارات جانە قوعامدىق دامۋ ءمينيسترى داۋرەن اباەۆ توتەنشە جاعداي ەنگىزىلگەن ەلىمىزدىڭ جاعدايى تۋرالى باياندادى.
كەشە ساعات 07:10-دا قاراعاندى قالالىق اۋرۋحاناسىندا اۋىر حالدە تۇسكەن 62 جاستاعى ەر ادام قايتىس بولدى. بۇل ەلىمىزدە ىندەتتەن قايتىس بولعان ءۇشىنشى ادام. داۋرەن اباەۆ ەڭ الدىمەن كوروناۆيرۋستان قايتىس بولعان مارقۇمنىڭ وتباسى مەن جاقىندارىنا كوڭىل ايتتى.
مەملەكەت باسشىسى ق.توقاەۆ حالىققا مالىمدەمە جولداپ, داعدارىسقا قارسى شارالاردىڭ ەكىنشى پاكەتىمەن تانىستىرعانى بەلگىلى. ۇكىمەت پرەزيدەنت تاپسىرمالارىن جۇزەگە اسىرۋدىڭ ءىس-شارالار جوسپارىن دايىنداپ جاتقانىن جەتكىزگەن اقپارات جانە قوعامدىق دامۋ ءمينيسترى وندا مەملەكەتتىڭ كومەگىن قالاي, قاي جەردەن جانە قانداي تارتىپپەن الۋ كەرەك ەكەنى ناقتى تۇسىندىرىلەتىنىن اتاپ ءوتتى. «تاعى دا قايتالاپ ايتامىز – كومەككە مۇقتاج بارلىق ادامعا جاردەم بەرىلەدى. مەملەكەت ەشكىمدى قامقورلىقسىز قالدىرمايدى. پرەزيدەنتتىڭ كەشەگى مالىمدەمەسى – «حالىق ۇنىنە قۇلاق اساتىن مەملەكەت» تۇجىرىمداماسىنىڭ تابىستى ىسكە اسىپ جاتقانىنا جانە ونىڭ ومىرشەڭ ەكەنىنە ايقىن دالەل. سەبەبى وزدەرىڭىز بىلەتىندەي, مالىمدەمەدە ايتىلعان شارالار قازىرگى ۋاقىتتا قيىندىققا كەزىككەن ازاماتتاردىڭ, كاسىپكەرلەردىڭ, اۋىل شارۋاشىلىعى وكىلدەرىنىڭ ءوتىنىش-تىلەكتەرىن ەسكەرەدى. قازىر ءبىز اسا كۇردەلى ۋاقىتتا تۇرمىز. سوندىقتان, مەملەكەت باسشىسىنىڭ مالىمدەمەسى تەك قانا ەكونوميكالىق ەمەس, ەڭ الدىمەن, يدەولوگيالىق استارى بار دۇنيە. وسىنداي ۋاقىتتا ءبىز كوزقاراسىمىزدىڭ, يدەيامىزدىڭ, ۇلتىمىز بەن ءدىنىمىزدىڭ ءارتۇرلى ەكەنىنە قاراماستان ءبىرتۇتاس ەكەنىمىزدى ءتۇسىنۋىمىز كەرەك. ء«بىز بىرگەمىز!» دەگەن بوس ۇران ەمەس. ول حالقىمىزدى تالاي قيىندىقتان امان الىپ شىققان ومىرلىك ۇستانىمىمىز», دەدى مينيستر.
بۇگىندە قوستاناي وبلىسىنان وزگە ەلىمىزدىڭ بارلىق وڭىرىندە كوروناۆيرۋسپەن اۋىرعاندار تىركەلدى. كوپ ايماقتا كارانتين شارالارى كۇشەيتىلدى. مۇندايدا ۇيدەن شىقپاۋ كەرەگىن تاعى دا ەسكەرتكەن د.اباەۆ ەرەجەنى دۇرىس ۇستانعاندا عانا كارانتيننەن تەز شىعۋعا بولاتىنىن اتاپ ءوتتى. «قازىر كارانتيندى ۇزارتۋ تۋرالى ايتۋعا ەرتە. ەشكىم ەكى اپتا بۇرىن ەپيدەميولوگيالىق جاعدايدىڭ قالاي بولاتىنىن ناقتى ايتا المايدى. بىراق ءبىز بارلىعىنا دايىن بولۋىمىز كەرەك. سوندىقتان كەشە ايتىلعان بارلىق شارالار – جاعداي كۇردەلەنىپ كەتسە دە تىنىشتىق پەن تۇراقتىلىقتى ساقتاۋ كەپىلى. ول ءۇشىن بىزدە قاجەتتى شارتتاردىڭ بارلىعى جاسالعان. مەملەكەت باسشىسىنىڭ تاپسىرماسى, ناقتى جۇمىس جوسپارى جانە ۇلتتىق قوردا جينالعان قاراجات بار», دەيدى ول.
قيىن كەزەڭدە اسا ماڭىزدى جۇمىس اتقارىپ جاتقان ۆولونتەرلەر قىزمەتىنە ەرەكشە توقتالعان مينيستر: «تەك نۇر-سۇلتان مەن الماتى قالالارىنىڭ وزىندە ولار مىڭعا جۋىق كومەك اكتسياسىن وتكىزىپ, 30 مىڭ ادامعا جاردەم بەردى. 8 مىڭداي وتباسىنا ازىق-ت ۇلىك اپاردى. وسى ەكى قالانىڭ وزىندە ۆولونتەرلەر مۇقتاج ادامدارعا 200 مىڭعا جۋىق ماسكا تاراتتى. ەلىمىزدىڭ بارلىق وڭىرىندە ۆولونتەرلەر ءدال وسىلاي مۇقتاج ادامدارعا ازىق-ت ۇلىك, ءدارى, ءبىرىنشى كەزەكتە قاجەت زاتتارىن اپارىپ بەرۋدە», دەدى.
سونداي-اق پرەزيدەنتتىڭ داعدارىسقا قارسى جوسپارىنىڭ ورىندالۋى تۋرالى ەسەپ بەرگەن د.اباەۆ قازىرگى ۋاقىتتا «دامۋ» كاسىپكەرلىكتى دامىتۋ قورى جوبانى قايتا قۇرىلىمداۋ تۋرالى وتىنىشتەردى قاراستىرۋدىڭ جەڭىلدەتىلگەن فورماتىنا اۋىسقانىن جەتكىزدى. «30 ساۋىرگە دەيىن جالپى سوماسى 3,5 ملرد تەڭگەگە 71 جوبا قولداۋعا يە بولادى. سىياقى مولشەرلەمەسىنىڭ ءبىر بولىگىن سۋبسيديالاۋعا وتىنىمدەردى قاراۋ ۋاقىتى 5 جۇمىس كۇنىنەن 1 جۇمىس كۇنىنە دەيىن قىسقاردى. قازىرگى ۋاقىتتا 58 ملرد تەڭگەنىڭ 250-گە جۋىق جوباسى ماقۇلداندى. كەپىلدىك قۇرالىن وزگەرتۋ تۋرالى وتىنىشتەردى قاراۋ تەك 6 جۇمىس كۇنىن قۇرايدى. بۇل باعىتتا قور 37 جوبانى ماقۇلدادى», دەدى ول.
قارجى نارىعىن رەتتەۋ جانە دامىتۋ جونىندەگى اگەنتتىكتىڭ قاۋلىسى كۇشىنە ەنىپ, جەكە تۇلعالار ءۇشىن بانك جانە ميكروكرەديت تولەمدەرىنىڭ مەرزىمى ءۇش ايعا شەگەرىلدى. ايىپپۇل مەن ءوسىم بولمايدى. وسىنى ايتقان داۋرەن اسكەربەك ۇلى بۇل شەگەرۋ حالىقتىڭ الەۋمەتتىك وسال توپتارىنا, الەۋمەتتىك كومەك الۋشىلارعا, رەسمي تىركەلگەن جۇمىسسىزدارعا بەرىلەتىنىن حابارلادى. وعان ەشقانداي تەكسەرۋ جۇرگىزىپ, دالەلدەۋدىڭ نەمەسە ءوتىنىش بەرۋدىڭ كەرەگى جوق. سونىمەن قاتار وسىنداي كومەك توتەنشە جاعداي سالدارىنان تابىسىنان ايىرىلعان كاسىپكەرلەرگە دە كورسەتىلەدى.
بۇگىندە «بىرگەمىز» قورىنا 13 ملرد تەڭگە ءتۇستى. ءمينيستردىڭ ايتۋىنشا, قارجى اشىقتىعىن قامتاماسىز ەتۋ ءۇشىن بارلىق وڭىردە قوردىڭ وكىلدىكتەرى اشىلىپ, سايتى دا ىسكە قوسىلدى. ول جەردە كەلىپ تۇسكەن قاراجات پەن شىعىندار جاريالانادى. ءتىپتى چەكتەرگە دەيىن كورسەتىلەدى. قازىر ءار وڭىردە كومەككە مۇقتاج ادامداردىڭ ءتىزىمى جاسالۋدا. ولار جاقىن ۋاقىتتا قوردان كومەك الادى.
مەملەكەتتىك رەزەرۆتەن كوروناۆيرۋسقا قارسى كۇرەسكە ءۇش رەت, ياعني 29 قاڭتاردا 1 ملرد 609 ملن تەڭگە, 21 اقپاندا 428 ملن 227 مىڭ تەڭگە, 25 ناۋرىزدا 21 ملرد 430 ملن 635 مىڭ تەڭگە ءبولىندى. داۋرەن اباەۆ بۇل قاراجات ءدارى-دارمەكتەر, مەديتسينالىق ماقساتتاعى بۇيىمدار مەن زەرتحانالىق قۇرال-جابدىقتار, ماسكالار مەن قولعاپتار, سونداي-اق قورعانىش كوستيۋمدەرى مەن سىناق جۇيەلەرىن ساتىپ الۋعا جۇمسالعانىن جەتكىزدى. ازاماتتارعا شۇعىل مەديتسينالىق كومەك كورسەتۋ ۇلتتىق ورتالىعى ارقىلى ەۆاكۋاتسيالاۋ, قىزمەتكەرلەردى جاراقتاندىرۋ مەن دەزينفەكتسيالىق قۇرالداردى ساتىپ الۋ, ت.ب. شىعىندارعا دا وسى قاراجات پايدالانىلعان.
ايتا كەتەيىك, كەشە كەشكى اقپاراتقا سۇيەنسەك ەلىمىزدە, كوروناۆيرۋس جۇقتىرعاندار سانى 372-گە جەتتى. اتاپ ايتقاندا, نۇر-سۇلتان قالاسىندا – 184, الماتى قالاسىندا 84 ناۋقاس انىقتالسا, اقمولا, اتىراۋ وبلىستارىندا 16 ادامنان تىركەلدى. قاراعاندى وبلىسىندا – 14, قىزىلوردا وبلىسىندا – 25, الماتى وبلىسىندا – 9, تۇركىستان وبلىسىندا 5 ادام ۆيرۋس جۇقتىرسا, شىمكەنت قالاسى, جامبىل جانە سولتۇستىك قازاقستان وبلىستارىندا 3 جاعدايدان تىركەلدى. ال اقتوبە وبلىسىندا – 4, شىعىس قازاقستان مەن باتىس قازاقستان وبلىسىندا 2 ناۋقاستان انىقتالسا, ماڭعىستاۋ, پاۆلودار وبلىستارىندا 1 ناۋقاستان تىركەلىپ وتىر.