سەگىز جىلدان بەرى ءال-فارابي اتىنداعى قازۇۋ-دىڭ ۇيىمداستىرۋىمەن وتەتىن رەسپۋبليكالىق اتالمىش بايقاۋ جاستاردىڭ ازاماتتىق جاۋاپكەرشىلىگىن ارتتىرىپ, ينتەللەكتۋالدى جانە شىعارماشىلىق الەۋەتىن دامىتۋعا باعىتتالعان.
بايقاۋ باعدارلاماسىن ءداستۇرلى تۇردە ۇزدىك ستۋدەنتتىك يننوۆاتسيالىق جوبالار نوميناتسيالارى, «ەلىمىزدىڭ يننوۆاتسيالىق دامۋىنا قوسقان مەنىڭ ناقتى ۇلەسىم» تاقىرىبىنداعى ستارتاپ, «كايىرىمدى قوعام» الەۋمەتتىك جوباسى, سونىمەن قاتار «مەن ءوز ەلىمنىڭ وركەندەۋى ءۇشىن نە ىستەي الامىن؟» اتتى ۇزدىك ەسسە, پاتريوتتىق تاقىرىپتاعى پوەزيالىق شىعارمالار مەن اندەر بايقاۋلارى قامتيدى.
العاشقى ىرىكتەۋ كەزەڭى وسى جىلى ءساۋىردىڭ 10 مەن 30 ارالىعىندا قاشىقتىق رەجيمدە وتەدى. ونلاين تىركەلۋدەن كەيىن قاتىسۋشىلار ۆيدەوروليكتەرى مەن ءوز جۇمىستارىن ەلەكتروندى تۇردە ۇيىمداستىرۋ كوميتەتىنە جولداۋلارى قاجەت. بايقاۋعا قاتىسۋ – ستۋدەنتتەرگە وزدەرىن كورسەتە بىلۋگە, الەۋمەتتىك-ماڭىزدى باستامالارى مەن شىعارماشىلىق جوبالارىمەن بولىسۋگە تاپتىرماس مۇمكىندىك. قاشىقتىق ىرىكتەۋ كەزەڭىنىڭ قورىتىندىسى بويىنشا فينالعا جەتكەن قاتىسۋشىلار انىقتالادى. فينالعا وتكەندەردىڭ ۆيدەوروليكتەرى مەن شىعارماشىلىق تۋىندىلارىن الەۋمەتتىك جەلىلەرگە جاريالاۋ جوسپارلانۋدا, سول جەردە اركىم وزىنە ۇناعان جۇمىسقا داۋىس بەرە الادى.
پرورەكتور شولپان جامانبالاەۆا ايتقانداي, ۇيىمداستىرۋ كوميتەتىنە جىل سايىن ەلىمىزدىڭ ءار وڭىرىندەگى ستۋدەنتتەردەن 2 مىڭنان اسا ءوتىنىم كەلىپ تۇسەدى. بايقاۋ فينالى 2020 جىلدىڭ قاراشاسىندا ءال-فارابي اتىنداعى قازۇۋ-دا VIII «مەن جاستارعا سەنەمىن!» فورۋمى اياسىندا وتەدى. قاتىسۋشىلار ءوز جوبالارىن تاقىرىپتىق سەكتسيالار وتىرىسىندا تانىستىرىپ, قورعاي الادى.
بايقاۋ قاتىسۋشىلارىنىڭ جۇمىستارىن وبەكتيۆتى باعالاۋدى تاۋەلسىز قازىلار القاسى قامتاماسىز ەتەدى. ونىڭ قۇرامىنا بەدەلدى ماماندار – قوعام, عىلىم, مادەنيەت جانە ونەر قايراتكەرلەرى, بيزنەس, مەملەكەتتىك قۇرىلىمدار جانە باق وكىلدەرى كىرەدى. قۇزىرەتتى قازىلار القاسى ۇزدىك جۇمىستاردى ءار كەزەڭدە – قاشىقتان ىرىكتەۋ كەزەڭىنەن باستاپ الماتىداعى فينالدىق بايقاۋعا دەيىن انىقتايدى.
جەڭىمپازدار قۇندى سىيلىقتار جانە ديپلومدارمەن ماراپاتتالادى. ۇزدىكتىڭ ەڭ ۇزدىگى باس جۇلدە – ءال-فارابي اتىنداعى قازۇۋ-دا ءبىر جىل تەگىن وقۋ گرانتىنا يە بولادى. ونلاين داۋىس بەرۋ قورىتىندىسى بويىنشا كورەرمەندەر كوزايىمى سىيلىعى دا بەرىلەدى.
بايقاۋعا قاتىسۋعا ءوتىنىم بەرۋ, ىرىكتەۋ كەزەڭىنىڭ بارىسىن قاداعالاۋ, سونىمەن قاتار ونلاين داۋىس بەرۋگە قاتىسۋ www.kaznu.kz سايتىندا تىركەلۋ ارقىلى جۇزەگە اسادى.
الماتى