پوليتسيا قىزمەتكەرلەرى تانىمال برەندتەردىڭ تاۋارلارىن ساتۋ جەلىسىمەن بايلانىستى بىرقاتار الاياقتىق جاساعان 33 جاستاعى ەر ادامدى انىقتاپ, ۇستادى, دەپ حابارلايدى Egemen.kz.
تەرگەۋ مالىمەتتەرىنە سايكەس, كۇدىكتى الدىن الا ويلاستىرىلعان سحەما بويىنشا ارەكەت ەتكەن. ول جالعان سەنىمحاتتار دايىنداپ, ءوزىن قازاقستان اۋماعىنداعى ءتۇرلى برەندتەردىڭ رەسمي وكىلى رەتىندە تانىستىرعان. وسى ارقىلى كاسىپكەرلەرگە حابارلاسىپ, ولاردىڭ قىزمەتىندە زاڭبۇزۋشىلىقتار انىقتالعانىن ايتىپ, قورقىتىپ, اقشا تالاپ ەتكەن.
ول «ماسەلەنى شەشىپ بەرەمىن» دەگەن جەلەۋمەن ساۋداگەرلەردەن قاراجات الىپ, ىقپال ەتۋ ارقىلى تۋىنداۋى مۇمكىن قيىندىقتاردان قۇتقاراتىنىن ايتقان. ءبىر جاعدايدا كەلتىرىلگەن ماتەريالدىق شىعىن 300 مىڭ تەڭگەدەن اسقان.
ۇرلىق, بوپسالاۋ, الاياقتىق: قاراعاندى وبلىسىندا قىلمىستىق توپ ۇستالدى
قازىرگى ۋاقىتتا وسىعان ۇقساس ءتورت دەرەك تىركەلگەن. جەدەل-ىزدەستىرۋ شارالارى بارىسىندا كۇدىكتىنىڭ جەكە باسى انىقتالىپ, ول تۇرعىلىقتى جەرىندە ۇستالىپ, پوليتسياعا جەتكىزىلدى.
اتالعان فاكتى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. قۇقىق قورعاۋ ورگاندارى كاسىپكەرلەردى ساق بولۋعا, وزدەرىن رەسمي وكىل رەتىندە تانىستىرعان ادامداردىڭ وكىلەتتىگىن مۇقيات تەكسەرۋگە جانە كۇماندى جاعدايلار تۋىنداسا, دەرەۋ پوليتسياعا جۇگىنۋگە شاقىرادى.