بۇل كۇندەرى پاندەميا سالدارىنان حالىققا قىزمەت كورسەتۋ ورتالىقتارىنىڭ جۇمىسى توقتاپ تۇرعانى بەلگىلى. ازاماتتار ەندى مەملەكەتتىك قىزمەتتەردى تەك ەلەكتروندى فورماتتا عانا الا الادى. وسىعان وراي, حالىقتىڭ ونلاين قىزمەتتەردى الۋ بويىنشا كەڭەس سۇرايتىندار سانى وسكەن. سول سەبەپتى, ازاماتتارعا ارنالعان ۇكىمەتتىڭ الماتى فيليالىندا حالىققا مەملەكەتتىك قىزمەتتەردى ۇسىناتىن ونلاين-كەڭەسشىلەردىڭ سانى ارتتىرىلدى.
ونلاين كەڭەسشىلەردىڭ بىرقاتارى ونلاين-حقو-دا قىزمەت كورسەتىپ وتىر. ەتسق كومەگىمەن بارلىق مەملەكەتتىك قىزمەتتەردىڭ 80% الۋعا بولادى. سول سەبەپتى, ازاماتتارعا ىڭعايلى بولۋ ءۇشىن, ەلەكتروندى تسيفرلىق قولتاڭبانى (ەتسق) ونلاين الۋ ماسەلەسى شەشىلدى. كوپتەگەن ازاماتتار مەملەكەتتىك قىزمەتتەردى ۇيدە وتىرىپ الۋ ءۇشىن ەسق الۋعا, نەمەسە موبيلدىك ازاماتتار بازاسىنا تىركەلۋگە ءوتىنىش بەرۋدە. ال ولاردىڭ سايكەستەندىرۋ ءراسىمىن راستاۋ ءۇشىن ونلاين حقو جۇمىس ىستەۋدە.
«ونلاين حقو 40 وپەراتور ەكى اۋىسىمدا قىزمەت كورسەتەدى. ەگەر ازاماتتىڭ تەلەفون ءنومىرى موبيلدىك ازاماتتار بازاسىندا تىركەلمەگەن جاعدايدا, جۇيە ونى حقكو وپەراتورىمەن قوسادى, ول بىرقاتار قوسىمشا سۇراقتار (قۇجاتتاردىڭ دەرەكتەرى, تىركەۋ ورنى جانە ت.ب.) قويا وتىرىپ ازاماتتى بەينەبايلانىس ارقىلى سايكەستەندىرەدى», – دەيدى «ازاماتتارعا ارنالعان ۇكىمەت» مك كەاق الماتى قالاسى فيليالىنىڭ ديرەكتورى دانيار قىرىقباەۆ.
بۇدان باسقا, الماتى قالاسى بويىنشا قىزمەت الۋشىلاردىڭ سۇراقتارىنا جەدەل جاۋاپ بەرۋ ءۇشىن ارنايى Call-ورتالىق جۇمىس ىستەيدى.
«Call-ورتالىققا 1414 ءنومىرى بويىنشا حالىقتان قوڭىراۋلار قابىلداپ, كەڭەس بەرەتىن 110 قىزمەتكەر جۇمىلدىرىلدى. Call-ورتالىق قىزمەتىنىڭ ساپاسىن قامتاماسىز ەتۋ جانە قىزمەتكەرلەرگە جۇكتەمەنى ازايتۋ ءۇشىن 60 كەڭەس بەرۋشى ەكى اۋىسىمدا جۇمىس ىستەۋدە.تاعى 50 قىزمەتكەر ۇيدە وتىرىپ, تۇرعىندارعا كەڭەس بەرىپ, ولاردىڭ ماسەلەلەرىن جەدەل شەشۋگە كومەكتەسۋدە», – دەيدى دانيار باتان ۇلى.
Call-ورتالىق اشىلعان ساتتەن باستاپ 25 مىڭنان استام كەڭەس بەرگەن. كۇنىنە 6-7 مىڭ ادام ءار ءتۇرلى سۇراقتارمەن جۇگىنەدى.
مامانداردىڭ ايتۋىنشا, نەگىزىنەن تۇرعىندار تۋ تۋرالى كۋالىك الۋ, بالا تۋىنا بايلانىستى جاردەماقىلار, ماب جازۋ, اۆتوكولىككە قاتىستى قۇجاتتاردى ۇيگە جەتكىزۋ قىزمەتى, ونلاين ەتسق الۋ, جەكە كۋالىك الۋ, ۋاقىتشا جانە تۇراقتى تىركەۋ, ەمحاناعا بەكىتۋ تۋرالى, اۆتوكولىك قۇرالدارىن ەسەپتەن شىعارۋ جانە قويۋ, اۆتوكولىككە تىيىم سالۋدى تەكسەرۋ, جۇرگىزۋشى كۋالىگىن قالاي الۋ جانە اۋىستىرۋ تۋرالى, سونداي-اق قايتىس بولۋ تۋرالى كۋالىكتى قالاي الۋ, جەرلەۋگە ارنالعان قۇجاتتاردى, تەحنيكالىق پاسپورت, جەر ۋچاسكەسىنىڭ مەملەكەتتىك اكتىسى, جك قالاي اشۋعا بولادى جانە ت. ب. سۇراقتاردى ءجيى قويىپ وتىر.
ايتا كەتۋ كەرەك, 608 مەملەكەتتىك قىزمەتتى ەلەكتروندىق ۇكىمەت پورتالى ارقىلى الۋعا بولادى, ونىڭ ىشىندە مامانداندىرىلعان بولىمدەردىڭ قىزمەتتەرى دە بار. سمارتفون ارقىلى 60 قىزمەت ءتۇرىن الۋعا مۇمكىندىك بار.
وسىلايشا, «ازاماتتارعا ارنالعان ۇكىمەت» مك كەاق حالىقتىڭ ەلەكتروندىق ۇكىمەت پورتالىن بەلسەندى پايدالانىپ, سىرتقا شىقپاي-اق, بار جۇمىسىن ۇيدە ءبىتىرىپ, مەملەكەتتىك قىزمەتتەردى ونلاين الۋىنا جاعدايلار جاساۋدا.قىزمەتتەردى ونلاين الا وتىرىپ اركىم ءوزىن جانە جاقىندارىن قورعاپ, ورتاق قاۋىپسىزدىككە ءوز ۇلەسىن قوساتىنىنبىلگەن ءجون.