كەشە پرەزيدەنت جانىنداعى ورتالىق كوممۋنيكاتسيالار قىزمەتىندە ونلاين-بريفينگ وتكىزگەن دەنساۋلىق ساقتاۋ ءمينيسترى ەلجان ءبىرتانوۆ ەلىمىزدە كوروناۆيرۋس جۇقتىرعان ناۋقاستاردىڭ جاعدايى تۋرالى ايتتى.
«قازىرگى ۋاقىتتا جالپى كوروناۆيرۋس جۇقتىرعان 302 جاعداي تىركەلدى. ناقتىراق ايتساق, نۇر-سۇلتان قالاسىندا – 169, الماتىدا – 73, اتىراۋ وبلىسىندا –12, قاراعاندى قالاسىندا – 13, الماتى وبلىسىندا – 8, اقمولا وبلىسىندا – 8, جامبىل وبلىسىندا – 3, شىمكەنت قالاسىندا – 2, شىعىس قازاقستان وبلىسىندا – 2, قىزىلوردا وبلىسىندا – 5, باتىس قازاقستان وبلىسىندا – 2, اقتاۋ وبلىسىندا – 2, سولتۇستىك قازاقستان وبلىسىندا – 1, پاۆلودار وبلىسىندا – 1, ماڭعىستاۋ وبلىسىندا 1 ناۋقاس تىركەلدى. 302 ناۋقاستىڭ ەكەۋى – 14 جاسقا دەيىنگى بالا. ناۋقاستاردىڭ اراسىندا 79-ى باسقا مەملەكەتتەردەن كەلگەن ازاماتتار, 97-ءسى باسقا ناۋقاستارمەن قارىم-قاتىناستا بولعاندار, ال 131-ءى اۋرۋدى قالاي جۇقتىرعانى بەلگىسىز», دەگەن ە.ءبىرتانوۆ وسىعان بايلانىستى مينيسترلىك تاراپىنان ۇسىنىستار بەرىلىپ, مەملەكەتتىك كوميسسيا بارلىق وڭىردە كارانتين شارالارىن كۇشەيتۋ بويىنشا تاپسىرما بەرگەنىن اتاپ ءوتتى.
ءمينيستردىڭ ايتۋىنشا, كوروناۆيرۋس جۇقتىرعان ناۋقاستاردىڭ ىشىندە سەگىزىنىڭ جاعدايى ناشار. تورتەۋى جاساندى جەلدەتكىشتە, جاعدايلارى كۇندەلىكتى ماماندارمەن تالقىلانىپ, باقىلاۋدا بولادى. 30 ناۋقاستىڭ جاعدايى ورتاشا, جەڭىل نەمەسە سيمپتومسىز جاعدايداعى 244 ناۋقاس بار. نۇر-سۇلتان قالاسىندا – 14, الماتى قالاسىندا 7 ناۋقاس جازىلىپ شىقتى.