مەملەكەت باسشىسى قاسىم-جومارت توقاەۆ حالىقارالىق «الاش» ادەبي سىيلىعىنىڭ يەگەرى, اقىن, سىنشى امانحان ءالىمنىڭ وتباسىنا كوڭىل ايتۋ جەدەلحاتىن جولدادى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي Facebook پاراقشاسىندا جازدى.
«اقىن, سىنشى, ادەبيەتشى, پۋبليتسيست امانحان ءالىمنىڭ قايتىس بولۋىنا بايلانىستى ونىڭ وتباسى مەن تۋعان-تۋىستارىنا قايعىلارىنا ورتاقتاسىپ كوڭىل ايتامىن. امانحان ءالىم ۇلى قازاق ادەبيەتىنىڭ كورنەكتى وكىلدەرىنىڭ ءبىرى ەدى. سونىمەن قاتار ول وتاندىق جۋرناليستيكانىڭ دامۋىنا دا ولشەۋسىز ۇلەس قوستى. قاتارداعى تىلشىدەن باس رەداكتورلىققا دەيىنگى جولدىڭ بارىنەن ءوتتى. ول ۇلتتىڭ وسۋىنە, ادەبيەتتىڭ دامۋىنا كەدەرگى بولاتىن كەرى ارەكەتتەردىڭ بارلىعىن سىن ساداعىنا ءىلدى. امانحان ءالىم قازاق رۋحانياتىنىڭ كوكجيەگىن كەڭەيتۋ ءۇشىن اقيقاتتان اينىماعان قايراتكەر قالامگەر ەدى. مارقۇمنىڭ جاتقان جەرى جايلى, يمانى سالامات بولسىن! قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ» دەپ جازدى بەرىك ءۋالي.