وتىرار قالا جۇرتىندا 2016 جىلى XV-XVI عع. ءتان مەشىت قۇرىلىسىنىڭ جالعاسىن انىقتاۋ ماقساتىندا ارحەولوگيالىق قازبا جۇمىسى جۇرگىزىلگەن بولاتىن. سول كەزدە XV-XVI عع. ءتان قۇرىلىس ورىندارىنىڭ قالدىقتارى انىقتالىپ زەرتتەلدى.
اعىمداعى جىلى جۇرگىزىلىپ جاتقان قازبا ناتيجەسىندە وسى ورىندى XIII-XIV عع. دەڭگەيىنە ءتۇسىرۋ, شارتتى تۇردە بەردىبەك سارايى اتالىپ وتىرعان كەشەننىڭ سولتۇستىك-باتىس بولىگىن انىقتاۋ ماقساتىندا جۇمىستار جالعاسىن تاپتى. قازبا جۇمىسى بارىسىندا XVI عاسىرعا ءتان تۇرعىن ءۇي قۇرىلىسىنىڭ قالدىقتارى انىقتالىپ زەرتتەلدى. بۇل جەردە نازار اۋداراتىن جايت, جوعارعى قۇرىلىس قالدىقتارىنىڭ ساقتالۋى ناشار. تۇرعىن ۇيلەردىڭ تاسناۋا, تاندىر, جەروشاق سەكىلدى نەگىزگى نىساندارى عانا ساقتالىپ وتىر. قازبا جۇمىسىن ءارى قاراي جالعاستىرۋ ماقساتىندا جوعارعى قۇرىلىس قالدىقتارى تولىعىمەن سيپاتتالىپ, سۋرەتتەرى مەن سىزبالارى ءتۇسىرىلىپ, الىنىپ تاستالدى. قازبا جۇمىسى بارىسىندا بوس توپىراق اراسىنان سىرلى-سىرسىز كەراميكا سىنىقتارى مەن شىنى پاستاسىنان جاسالعان مونشاق بولىكتەرى جانە XVI عاسىرعا جاتاتىن 58 دانادان تۇراتىن كۇمىس تەڭگە كومبەسى الىندى. ارحەولوگتاردىڭ پايىمداۋىنشا, كۇمىس تەڭگەلەر بۇحار حانى ابدوللا ءىى-ءنىڭ تۇسىندا سوعىلعانى انىقتالدى. قازىرگى تاڭدا تەڭگەلەر تازالانۋ ۇستىندە.
ءۇرزيا جۇمابايقىزى
تۇركىستان وبلىسى