"بيىل جاھاندىق ەكونوميكا قۇلدىرايدى. بۇل 2008 جىلعى الەمدىك داعدارىستان دا قاۋىپتى", دەپ مالىمدەدى حالىقارالىق ۆاليۋتا قورىنىڭ باسشىسى كريستالينا گەورگيەۆا.
COVID-19 كوروناۆيرۋسىنىڭ كەسىرىنەن ينۆەستورلار دامىپ كەلە جاتقان نارىقتاردان 83 ملرد دوللاردى قايتارىپ العان. بۇل بۇرىن-سوڭدى تىركەلمەگەن ەڭ ۇلكەن كاپيتال اعىنى.
الەمدىك ساۋدا اينالىمىندا ماڭىزدى ءرول اتقاراتىن ەكونوميكاسى ءىرى 20 ەلدىڭ قارجى مينيسترلەرى مەن ورتالىق بانك باسشىلارى اراسىندا وتكەن تەلەكونفەرەنتسيادا ك. گەورگيەۆا بۇل دۇربەلەڭ 2021 جىلى باسىلاتىنىڭ ايتتى. ءارى حۆق داعدارىسپەن كۇرەسۋ ءۇشىن 1 ترلن دوللار بولۋگە دايىن ەكەنىن جەتكىزدى. ونىڭ ايتۋىنشا, 80-گە جۋىق مەملەكەت قارجىلىق كومەك الۋ ءۇشىن قورعا جۇگىنگەن.
ايتا كەتەيىك, كوروناۆيرۋسقا بايلانىستى الەمدەگى كوپتەگەن ءىرى كاسىپورىندار جۇمىسىن توقتاتقان بولاتىن. سونداي-اق شاعىن جانە ورتا بيزنەس وكىلدەرى دە شىعىنعا ۇشىرادى. الەمدىك اۆياكومپانيالار رەيستەردىڭ قىسقارۋىنان ابىگەرگە تۇسۋدە.